នាយ ក្រឹម ទៅដល់​ផ្ទះ​នាយ​ឆ្លាំង ទាំងយប់​ក្រោយ​ទទួលដំណឹង​មរណភាព

359

(​ភ្នំពេញ​) ៖ ក្រោយពី​ទទួលបាន​ដំណឹង​មរណភាព​របស់​ភរិយា​របស់​នាយ ឆ្លាំង កាលពី​រសៀល​ថ្ងៃទី​២១ ខែមិថុនា ឆ្នាំ​២០១៧​ដោយសារ​ជំងឺ​ទាច​ទឹក ភ្លាមៗ​នោះបាន​ធ្វើ​ឲ្យ​មហាជន​ជាច្រើន​សម្តែង​ក្តី​អាណិតអាសូរ ជាមួយ​ការចូលរួម​រំលែក​ទុក្ខ​នេះ​ដ៏​សោកសៅ​ដល់​គ្រួសារ​នាយ ឆ្លាំង ផងដែរ​។​

​យ៉ាងណា​ម៉េ​ញ ប្រធាន​ក្រុម​កំប្លែង​រួម​ក្រុម គឺ​នាយ ក្រឹម ក៏បាន​ដឹកនាំ​ក្រុមការងារ​ចុះទៅ​ដល់ផ្ទះ​នាយ ឆ្លាំង ដើម្បី​ចូលរួម​រំលែក​ទុក្ខ និង​នាំយក​ថវិកា​មួយចំនួន ដើម្បី​ឧបត្ថម្ភ​ចូលរួម​បុណ្យសព​ប្រពន្ធ​នាយ ឆ្លាំង ផងដែរ ខណៈ​តារាចម្រៀង​លោក ហេង ពិ​ទូ​ក៏បាន​ចូល​បុណ្យសព​ប្រពន្ធ​នាយ​ឆ្លាំង ចំនួន​២០​ម៉ឺន​រៀល​ផង​នោះ​។​

​ប្រភពពី​អ្នកសិល្បៈ​រួម​អាជីព​ជាមួយ​នាយ ឆ្លាំង បាន​បង្ហើប​ថា ខណៈពេលដែល​ប្រពន្ធ​ចាប់ផ្តើម​ធ្លាក់ខ្លួន​ឈឺ​ជំងឺ​ទាច​ទឹក​ដំណាក់កាល​ដំបូង ដោយសារ​មាន​ជីវភាព​ខ្វះ​ខាត់​នោះ នាយ ឆ្លាំង ពុំមាន​លទ្ធភាព​បញ្ជូន​ប្រពន្ធ​ទៅ​ព្យាបាល​នៅ​មន្ទីរពេទ្យ​ឡើយ​ពោលគឺ​ត្រឹមតែ​សម្រាក​ព្យាបាល​នៅផ្ទះ​តាមរយៈ​គ្រូខ្មែរ​ប៉ុណ្ណោះ​(​ទឹក​ថ្នាំខ្មែរ​)​។ លើសពីនេះ​ទៀត ពេលដែល​ភរិយា​របស់​នាយ ឆ្លាំង ស្លាប់​នេះដែរ​គឺ​នាយ​ស្ទើរ​រកប្រាក់​ធ្វើបុណ្យ​ឲ្យ​ភរិយា​គ្មាន​ផង ដោយហេតុថា បច្ចុប្បន្ន​នាយ ឆ្លាំង សឹងតែ​រក​អង្ករ​ច្រក​ឆ្នាំង​ក៏​គ្មាន​។​ប៉ុន្តែ​ដោយមាន​ក្តី​អាណិតអាសូរ ក៏មាន​ប្រជាពលរដ្ឋ​អ្នករស់នៅ​ក្នុងភូមិ​ជាមួយ​នាំគ្នា ជួយ​ម្នាក់​បន្តិចៗ​ដើម្បី​បាន​ប្រាក់​ធ្វើបុណ្យ​ឱ្យ​ប្រពន្ធ​។​

​ពេលនេះ​សព​ប្រពន្ធ​របស់​តារា​កំប្លែង​នាយ ឆ្លាំង បច្ចុប្បន្ន គឺ​កំពុង​តម្កល់ទុក​ធ្វើបុណ្យ​ស្ថិតនៅ​ទឹកដី​ឃុំ​វាំង​ចាស់ ស្រុក​ឧដុង្គ ខេត្តកំពង់ស្ពឺ​។​

​ក្រោយ​ទទួល​ព័ត៌មាន​មរណភាព​នេះ លោក សុះ ម៉ាច តំ​ណាត​ឲ្យ​មូលនិធិ​សិល្បៈ​ចាស់ជរា កាលពី​ថ្ងៃ​២២​មិថុនា​ក៏បាន​នាំយក​ថវិការ​១​លាន​រៀល អង្ក​វីតាមីន​៥​កេះ និង ភេសជ្ជៈ​ទឹក​សំរង មក​ចូល​បុណ្យសព​ប្រពន្ធ​របស់​នាយ​ឆ្លាំង​ផងដែរ​។​

​បើ​បងប្អូន សប្បុរសជន សម្តេច​ឯកឧត្តម មានបំណង​ចូល​បុណ្យ​សូម​ទាក់​ទង់​តាម​លេខ​ទូ​ស័ព្ទ 077762626/ 017990332​។

​សូមបញ្ជាក់ថា ភរិយា​នាយ ឆ្លាំង បាន​ធ្លាក់ខ្លួន​ឈឺ​ជំងឺ​ទាច​ទឹក គឺមាន​រយៈពេល​យូរ​ឆ្នាំ​មកហើយ ក្នុងនោះ​ដោយ​ទ្រាំទ្រ​នឹង​ជំងឺ​ពុំបាន ភរិយា​នាយ ឆ្លាំង ក៏បាន​លាចាក​លោក ដោយ​ល​បន្សល់ទុក​កូន​ប្រុស​-​ស្រី​កំព្រា​ចំនួន​២​នាក់ នា​រសៀល​ថ្ងៃទី​២១ ខែ មិថុនា កន្លងមកនេះ​៕​