នៅថ្ងៃនេះ លោក ផែង វណ្ណៈ នឹងត្រូវ​ដោះលែង​ចេញពី​ពន្ធនាគារ

661
ចែករម្លែក

ដោយ​:​ឆាយា​នាថ​
​ភ្នំពេញ​:
នាពេល​ថ្មីៗ​នេះ តាម​ការសម្រេច​របស់​សាលាដំបូង​រាជធានី​ភ្នំពេញ គឺ បានកំណត់​ការផ្តន្ទាទោស​លោក ផែង វណ្ណៈ ជា​មន្ត្រី​យោធា និង ជា​និពន្ធ​នាយក​សារព័ត៌​មានខ្លួន​ឯង​ផង​នោះ ដាក់ពន្ធនាគារ​រយៈពេល​១​ឆ្នាំ តែ​អនុវត្ត​ទោស​ត្រឹម​២​ខែ​១៥​ថ្ងៃ ប៉ុណ្ណោះ ពាក់ព័ន្ធ​បទល្មើស​បរិហារកេរ្តិ៍​ជា​សាធារណៈ និង បទ​ញុះញង់​ឲ្យ​ប្រព្រឹត្ត​បទឧក្រិដ្ឋ​ជាអាទិ៍ តាម​បណ្តឹង​របស់លោក គី តិច មេធាវី​តំណាង​ដោយ​អាណត្តិ​របស់​សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា ។​

​បើតាម​គិត​រយៈពេល​នៃ​ការឃុំខ្លួន​លោក ផែង វណ្ណៈ កាលពី​ថ្ងៃទី​៣ ខែមេសា ឆ្នាំ​២០១៩ កន្លងទៅ គឺ បង្ហាញថា លោក ផែង វណ្ណៈ នឹងត្រូវ​ដោះលែង​ចេញពី​ពន្ធនាគារ​វិញ នៅ​ថ្ងៃទី​១៨ ខែមិថុនា នេះ ហើយ​មួយខែ​ក្រោយ​សាលក្រម​នឹង​ចូល​ជា​ស្ថាពរ ប្រសិនបើ​ជនជាប់ចោទ ផែង វណ្ណៈ ឬ ព្រះរាជអាជ្ញា មិន​ប្តឹង​ឧទ្ធរណ៍​ទេនោះ ។ ក្រោយ​សាលក្រម​ចូល​ជា​ស្ថាពរ លោក​ផែង វណ្ណៈ នឹងមាន​ឋានៈ​ជា​“​ទណ្ឌិត​” ។

​បញ្ហា​នេះ មហាជន​មាន​ចម្ងល់​ថា តើ​លោក ផែង វណ្ណៈ នឹង​អស់​ក្របខ័ណ្ឌ​ជាម​ន្ត្រី​យោធា​ដែរឬទេ ហើយ​អាច​ប្រកប​វិជ្ជាជីវៈ​សារព័ត៌មាន បាន​ទៀត​ឬ​យ៉ាងណា ? ។​

​ឆ្លើយតប​ចម្ងល់​ទាំងនេះ នាយ​ឧ​ត្ត​ម​សេនីយ៍ ឈុំ សុជាតិ អ្នកនាំពាក្យ​ក្រសួងការពារជាតិ ថ្លែងប្រាប់​នៅ​ព្រឹក​ថ្ងៃទី​១៨ ខែមិថុនា នេះ ជាគោលការណ៍ ប្រធាន​អង្គភាព​សា​ម៉ី បាន​ចាត់ចែង​តួនាទី​លោក ផែង វណ្ណៈ តាំងពី​ពេល​សមត្ថកិច្ច ចាប់ខ្លួន​លោក​មកម្ល៉េះ ។

​លោក ឈុំ សុជាតិ អះអាងថា​”​លោក ផែង វណ្ណៈ ត្រូវអស់​ក្របខ័ណ្ឌ​ហើយ តែ​អតីតភាព​ការងារ​លោក​ប៉ុន្មាន​ឆ្នាំ​ហើយ​នោះ គឺ មិន​ចងចាំ​ទេ​”​។​

​មាត្រា​២៨ ច្បាប់​ស្តីពី លក្ខន្តិកៈ​ទូទៅ​ចំពោះ​យោធិន​នៃ​កងយោធពល​ខេមរភូមិន្ទ ចែងថា អាច​ត្រូវ​តែងតាំង​ជា​នាយទាហាន​អាជីព​បាន ចំពោះ​ជន​ណា​ដែល ៖ មាន​សញ្ជាតិ​ខ្មែរ , មាន​លិខិត​ថ្កោលទោស​ដែល​បញ្ជាក់ថា​គ្មាន​ទោស , មាន​សម្បទា​តាម​តម្រូវការ ដើម្បី​បំពេញ​មុខងារ ។

​ត្រង់ចំណុច​នេះ អាច​បង្ហាញ​យ៉ាងច្បាស់​ថា លោក ផែង វណ្ណៈ មាន​លិខិត​ថ្កោលទោស ដោយ​បញ្ជាក់ថា ធ្លាប់​មានទោស​ពីមុនមក គឺ មិនអាច​ធ្វើជា​មន្ត្រី​យោធា​បាន​ទៀត​ទេ ។​

​ដោយឡែក​ជុំវិញ ការប្រកប​វិជ្ជាជីវៈ​សារព័ត៌មាន​រប​ស់លោក ផែង វណ្ណៈ វិញ , អ្នកនាំពាក្យ​ក្រសួង​ព័ត៌មាន លោក អ៊ុក គឹម​សេង ថ្លែង​ប្រាប់ថា ក្នុងករណី​តុលាការ មិនបាន​កំណត់ ថា ជនជាប់ចោទ មិនអាច​ប្រកប​វិជ្ជាជីវៈ​សារព័ត៌មាន បាន មានន័យថា អ្វីៗ​ជាធម្មតា ។​

​លោក អ៊ុក គឹម​សេង បន្តថា “​គ្មាន​ច្បាប់​ណា​ហាមឃាត់ បើសិន​តុលា​ការមិន​កំណត់ គាត់​មាន​សិទ្ធិសេរីភាព ដូច​គេ​ដូច​ឯង​ដែរ អត់​ពាក់ព័ន្ធ​នឹង​ប្រកាស​របស់​ក្រសួង​ព័ត៌មាន​ទេ​”​។​

​គេ​នៅ​ចាំបាន​ថា កាល​ពេល​ប្រកាស​សាលក្រម គឺ តុលាការ​ពុំបាន​កំណត់​អំពី​ការហាមឃាត់​មិនអោយ​លោក ផែង វណ្ណៈ ប្រកប​វិជ្ជាជីវៈ​សារព័ត៌មាន​នោះទេ ។​

​ទោះបីយ៉ាងណា នៅ​ថ្ងៃទី​១៨ ខែមិថុនា នេះ លោក ផែង វណ្ណៈ នឹងត្រូវ​ដោះលែង​ចេញពី​ពន្ធនាគារ ។ ប៉ុន្តែ មិនអាច​សុំ​ការបញ្ជាក់​បន្ថែម​ពី​លោក នុត សវ​នា អ្នកនាំពាក្យ​អគ្គនាយកដ្ឋាន​ពន្ធនាគា​រ បានទេ ដោយសារ​ទូរស័ព្ទ​ទាំង​២​ប្រព័ន្ធ ទូរស័ព្ទ​មិន​ចូល​ទាំង​២ ៕ ល​