បង្គោល​ភ្លើង មិនមាន​សរ​សៃ​ដែក​

912
ចែករម្លែក

ភ្លៀង​ធ្លា​ក់មួយ​មេ​លាយ​ឡំនឹង​ខ្យល់​កន្ត្រាក់ កាលពី​ល្ងាច​ថ្ងៃទី​៤ ខែមិថុនា ឆ្នាំ​២០១៩ បណ្តាល​ឲ្យ​បាក់​បង្គោល​ភ្លើងអគ្គិសនីអស់​ចំនួន ១៩​ដើម បណ្តាល​ឲ្យ​សង្កត់​លើអ្នកលក់ដូរ​តាម​ចិញ្ចើមផ្លូវ ព្រមទាំង​សង្កត់​លើ​រថយន្ត ដែល​ឈប់​ចត​តាម​ដងផ្លូវ រង​ការខូចខាត​យ៉ាងធ្ងន់ធ្ងរ នៅតាម​បណ្តោយ​ផ្លូវជាតិ​លេខ​៤ ម្តុំ​បុរី​ពិភពថ្មី ផ្សារ​កំបូល ទល់មុខ​កន្លែង​បណ្តុះបណ្តាល​ប៉េអឹមកំបូល ដែល​ស្ថិតនៅ​ភូមិ​គល់ សង្កាត់​កន្ទោក ខណ្ឌ​ពោធិ៍​សែន​ជ័យ រាជធានី​ភ្នំពេញ​។
​ ​
​នៅ​មុនពេល​កើតហេតុ ដោយមាន​ភ្លៀង​ធ្លាក់​មួយ​មេ​យ៉ាង​ធំ ព្រមទាំង​មាន​ខ្យល់​កន្ត្រាក់ ដែល​បង្ក​ឲ្យ​បាក់​បង្គោល​ភ្លើង​អស់​ចំនួន ១៧​បង្គោល និង​បាក់​សង្កត់​លើ​បង្គោល​ភ្លើងបំភ្លឺ​ផ្លូវ​ចំនួនពីរ​ដើម​ទៀត ហើយ​បាក់​សង្កត់​លើ​រថយន្ត​កុងតឺន័រ ឈប់​ចត​តាម​ដងផ្លូវ ប្រមាណ​ពីរ​គ្រឿង រួម​នឹង​បាក់​សង្កត់​លើ​អ្នកលក់ដូរ​លក់​ខោអាវ​ជជុះ និង​ជួសជុល​ម៉ូតូនៅតាម​ចិញ្ចើមផ្លូវ បណ្តាល​ឲ្យ​រងរបួស​ធ្ងន់​ស្រាល និង​ស្លាក​ប៉ាន់​ណូ រលំ​បាក់​ដួលជាច្រើន​កន្លែង និង​បណ្តាល​ឲ្យ​រង​ការខូចខាត​យ៉ាងធ្ងន់ធ្ងរ​ផងដែរ​។​

​ហេតុការណ៍ បាក់​បង្គោល​ភ្លើងអគ្គិសនីនៅ​ផ្លូវជាតិ​លេខ​៤ នៅ​កំបូល​នេះ នាំ​ឲ្យ​ភ្លើងអគ្គិសនី ត្រូវ​កាត់ផ្តាច់ ពិសេស​នៅក្នុង​ខណ្ឌ​ពោធិ៍​សែន​ជ័យ រាជធានី​ភ្នំពេញ​ផងដែរ​។​
​ ​
​រូបភាព​បង្គោល​បេតុង ដែលជា​បង្គោល​ភ្ជាប់​បណ្តាញ​អគ្គិសនី ដែល​បាក់​ជាច្រើន​ដើមនោះ ត្រូវបាន​គេ​ថត​បង្ហោះ និង​បញ្ចេញ​មតិយោបល់​យ៉ាង​ផុលផុស​តាម ហ្វេ​ស​ប៊ុ​ក នា​ថ្ងៃទី​៥ ខែមិថុនា ឆ្នាំ​២០១៩​។


​តាម​រូបភាព បង្គោល​ភ្លើងធ្វើ​ពី​ថ្ម​បេតុង​ទាំងនោះ មិនឃើញ​មាន​ដែក​សូម្បី​តែមួយ សរសៃ​។ តែ​អ្នកខ្លះលើកឡើង​នូវ​ការបកស្រាយ​ថា បង្គោល​ភ្លើង មិន​ថា​នៅ​ស្រុក​គេ ឬ​នៅ​ស្រុក​យើង​ទេ គឺ​គេ​ធ្វើ​ដោយ​ដាក់​ដែកថែប ជា​ប្រភេទ​ដែក​រស់ ដែល​យើង​មើលមិនឃើញនៅពេល​បាក់​នោះទេ ព្រោះ​ជា​ដែក​រស់ ហើយ​រុញ​ចូលក្នុង​បេតុង​។ ល​។ និង​។​ល​។​
​ ​
​យ៉ាងណាក៏ដោយ ហេតុការណ៍​បាក់​បង្គោល​ថ្មភ្ជាប់​បណ្តាញ​ខ្សែភ្លើង​អគ្គិសនី មិនមែនទើបតែ​កើតមាននៅពេលនេះ​ទេ​។ ពោលគឺ​ក្នុងពេល​កន្លងមក ពិសេស​នៅ​រដូវវស្សា កាលពី​ឆ្នាំមុន បង្គោល​ថ្ម ភ្ជាប់​ខ្សែភ្លើង នៅ​ជិត​សាលា ACE ក្នុង​ខណ្ឌដូនពេញ រាជធានី​ភ្នំពេញ ក៏បាន​បាក់​រលំ នៅពេល​មាន​ភ្លៀង​ផងដែរ​។ កាលណោះ បង្គោល​ភ្លើងដែល​បាក់​នោះ គេ​ឃើញ​មាន​ដែក​តូចៗ ហើយ​តែ ១ ឬ ២​សរសៃ​ប៉ុណ្ណោះ​។​
​ ​
​មែនទែនទៅ មិនមែន​បង្គោល​ភ្លើង​មិនមាន​គុណភាព​នោះទេ ព្រោះថា នៅ​ភ្នំពេញ ក៏ដូចជានៅ​ទូទាំងប្រទេស បង្គោល​ភ្លើង​មាន​រាប់លាន​ដើម តែ​មិនបាន​បាក់​រលំ​ទាំងអស់នោះឡើយ​។​
​ ​
​យ៉ាងណា​ក៏ដោយចុះ ដើម្បី​ធានា​សុវត្ថិភាព និង​បង្ការ​ការខាតបង់ គេ​គួរតែ​ពិនិត្យ​លើគុណភាព​បង្គោល​ភ្លើង​របស់ខ្លួន ពិសេស​បង្គោលដែល​បាក់​រលំ​ទាំងនោះ​ឡើងវិញ ហើយ​រក​វិធីដើម្បី​បង្ការ កុំ​ឲ្យ​បាក់​រលំ​តទៅទៀត​។

ករណី​បាក់​បង្គោល​ភ្លើង​ទាំងនេះ ត្រឹមតែ​គ្រោះថ្នាក់​ដល់​ឡាន របស់របរ និង​អ្នកលក់ដូរ តែ​ចុះបើ​មាន​អ្នកស្លាប់​វិញ តើម្ចាស់​ស្ថាប័ន ត្រូវ​ទទួលខុសត្រូវ​បែបណា​ទៅវិញ​? អ៊ីចឹង​ហើយ យើង​ត្រូវការពារ ប្រសើរ​ជាង​ព្យាបាល​។​
​ ​
​មួយវិញទៀត​ក៏​គួរតែ​បន្ថែម​បច្ចេកទេស ឬ​គុណភាព​នៃ​បង្គោល​ថ្ម​បេតុង​របស់ខ្លួន ដើម្បី​បង្កើន​គុណភាព កុំ​ឲ្យ​គ្រាន់តែ​ខ្យល់​បក់ ក៏​បាក់​រលំ ដាច់ចេញ​ពីគ្នា ដោយ​មិនមែនត្រឹមតែ​ទ្រេ​ត​នោះឡើយ​។ បង្គោល​ភ្លើង សុទ្ធតែ​នៅ​អម​សងខាង​ផ្លូវ ហើយ​មានផ្ទះ ប្រជាពលរដ្ឋ​នៅជាប់ៗ​គ្នា ចុះបើរ​លំបាក់​សង្កត់​អ្នកធ្វើដំណើរ និង​ផ្ទះ​ប្រជាពលរដ្ឋ តើ​មហន្តរាយ​នឹង​កើនឡើង​យ៉ាងណាខ្លះ​?​។​
​ ​
​នៅពេលនេះ​ទៀត​ចូលដល់​រដូវវស្សា ភ្លៀងខ្យល់​កើតមាន​ញឹកញាប់ អាជ្ញាធរ​ជំនាញ គួរតែមាន​វិធានការ​ត្រួតពិនិត្យ​បង្គោល​ភ្លើង ដែល​មិនទាន់​បាក់​រលំ ពិសេស​បង្គោលចាស់ៗ គួរតែ​ជួសជុល ដក​ដាក់​ថ្មី ឬក៏​រក​វិធី​ការពារ​កុំ​ឲ្យ​បាក់​រលំ ដែល​អាច​នឹងបង្ក​គ្រោះថ្នាក់​ដល់​ប្រជាពលរដ្ឋ អ្នកដំណើរ ទ្រព្យសម្បត្តិ ពិសេស​ដើម្បី​កុំ​ឲ្យ​ប៉ះពាល់អាយុជីវិត​របស់​អ្នក​ដែល​មិនដឹង​រឿង​អី​សោះ នៅ​សុខៗ បែរជា​រងគ្រោះ​ដោយសារតែបង្គោល​ភ្លើងទៅវិញ​៕ ដោយៈ ម៉េង​ឆៃ /Ha