បទសម្ភាសន៍​ ​ឯកអគ្គរដ្ឋទូត​នៃ​សាធារណរដ្ឋ​កូរ៉េ វាយតម្លៃ​ពី​កិច្ចសហប្រតិបត្តិការ និង ទំនាក់ទំនង​កម្ពុជា​និង​កូរ៉េ​

523
ចែករម្លែក
  • 131
    Shares


​ដោយៈ ពិស្តារ​ ​ភ្នំពេញៈ​ ទំនាក់ទំនង​ការទូត​រវាង​ព្រះរាជាណាចក្រ​កម្ពុជា​និង​សាធារណរដ្ឋ​កូរ៉េ​ ទើប​តែមាន​អាយុកាល​ត្រឹមតែ ២២ ឆ្នាំ ប៉ុន្តែ​ទំនាក់ទំនង​រវាង​ប្រទេស​ទាំងពីរ​ស្អិតល្មួត និងមាន​ទំនាក់ទំនង​ដ៏​ជិតស្និទ្ធ ។ ក្រោយពី​ប្រទេស​ទាំងពីរ​បើក​នូវ​ទំនាក់ទំនង​ការទូត​នឹង​គ្នា នៅក្នុង​រយៈពេល​នេះ សឹងតែ​គ្រប់​ប្រធានាធិបតី​នៅក្នុង​តំណែង​ទាំងអស់​បានមក​បំពេញ​ទស្សនកិច្ច​នៅ​កម្ពុជា ហើយ​នៅ​ថ្ងៃទី ១៤ ខែ មីនា ឆ្នាំ ២០១៩ នេះ លោក មូ​ន ចេ​អ៊ី​ន ប្រធានាធិបតី​នៃ​សាធារណរដ្ឋ​កូរ៉េ ក៏​នឹង​មក​បំពេញ​ទស្សនកិច្ច​នៅ​កម្ពុជា​។ ដើម្បី​សរ​បញ្ជាក់​អំពី​ទំនាក់ទំនងនេះ​ កាសែត​រស្មី​កម្ពុជា ​បានធ្វើ​បទសម្ភាសន៍​ជាមួយនឹង លោក អូ ណាក់​យ៉ុង ឯកអគ្គរដ្ឋទូត​នៃ​សាធារណរដ្ឋ​កូរ៉េ​ប្រចាំ​នៅ​កម្ពុជា ។ ខ្លឹមសារ​នៃ​កិច្ចសម្ភាសន៍​មាន​ដូចតទៅ​៖

លោក អូ ណាក់​យ៉ុង ឯកអគ្គរដ្ឋទូត​ នៃ​សាធារណរដ្ឋ​កូរ៉េ ​ប្រចាំ​នៅ​កម្ពុជា​

រស្មី​កម្ពុជាៈ លោក​ប្រធានាធិបតី មូ​ន ចេ​អ៊ី​ន គ្រោង​នឹង​មក​បំពេញ​ទស្សនកិច្ច​នៅ​កម្ពុជា ពីថ្ងៃ​ទី ១៤ ដល់ ១៦ ខែមីនា ខាងមុខនេះ ​តើ​លោក​ឯកអគ្គរដ្ឋទូត​មាន​ទស្សនៈ​ ក៏ដូចជា​មតិយោបល់​យ៉ាងណា​ចំពោះ​ដំណើរ​ទស្សនកិច្ច​រយៈពេល​បី​ថ្ងៃនេះ ?
លោក អូ ណាក់​យ៉ុងៈ ប្រទេស​កម្ពុជា​គឺជា ‘​ខ្លា​ថ្មី​នៃ​អាស៊ី (New Tiger ofAsia)’​ដែល​សម្រេចបាន​នូវ​កំណើនសេដ្ឋកិច្ច​ប្រចាំឆ្នាំ​ជា​មធ្យម ៧,៦​ភាគរយ ជា​បន្តបន្ទាប់​គ្នា​នា រយៈពេល​២០​ឆ្នាំកន្លងមក និង​កំពុងតែបន្ត​សម្រេច​កំណើនសេដ្ឋកិច្ច​ដ៏​គួរ​ឲ្យ​កត់សម្គាល់ ដោយ​ឈរលើ​មូលដ្ឋាន ‘​យុទ្ធសាស្ត្រ​ចតុកោណ (Rectangular Strategy)’​។ ខ្ញុំ​គិតថា កូរ៉េ និង​កម្ពុជា​ជា​ដៃគូ​ដ៏​សមស្រប​សម្រាប់​ថ្ងៃ​អនាគត ដើម្បី​កសាង​វិបុលភាព​ជារួម​ក្នុង​ការរស់នៅ​ជាមួយគ្នា​។​

​ទំនាក់ទំនង​រវាង​ប្រទេស​កូរ៉េ​ និង​កម្ពុជា​ បាន និង​កំពុងតែ​អភិវឌ្ឍន៍​យ៉ាង​ឆាប់រហ័ស ។​បន្ទាប់ពី​មានការ​បង្កើត​ ទំនាក់ទំនង​ការទូត​ឡើងវិញ ​កាលពី​ឆ្នាំ​១៩៩៧ ទំហំ​នៃ​ពាណិជ្ជកម្ម​ រវាង​ប្រទេស​ទាំងពីរ​ បានសម្រេច ​៩៧៥​ លាន​ដុល្លារ​សហរដ្ឋ​អាម៉េរិក ក្នុង​ឆ្នាំមុន ​ដោយមាន​ការកើនឡើង​ជិត​ ២០ ​ដង​ធៀប​នឹង​ឆ្នាំ​១៩៩៧ ហើយ​មាន​សហគ្រាស​កូរ៉េ​ ចំនួន​ប្រមាណ​ជា​ ២០០ ​សហគ្រាស ដែល​បាន​បណ្តាក់ទុន​ នៅ​កម្ពុជា​កំពុងតែ​ចូលរួមចំណែក ​ក្នុងការ​បង្កើត​វិបុលភាព​ ជារួម​ក្នុង​ការរស់នៅ ​ជាមួយគ្នា ព្រមទាំង​មានការ​ផ្លាស់ប្តូរ​ រវាង​ប្រជាជន និង​ប្រជាជន ​ប្រចាំឆ្នាំ​បច្ចុប្បន្ន​ជិត​ ៤០​ ម៉ឺន​នាក់ គឺ​ត្រូវបាន​កើនឡើង​ជាង​ ២០០ ​ដង ដោយ​មានតែ​ប្រមាណ​ជាង ​១.០០០​ នាក់​ប៉ុណ្ណោះ​ ក្នុង​ឆ្នាំ​១៩៩៧​។​

ដំណើរ​ទស្សនកិច្ច​ផ្លូវរដ្ឋ​ លើក​នេះ​ គឺជា​លើក​ទី​៣ បន្ទាប់ពី​ដំណើរ​ទស្សនកិច្ច​ ក្នុង​ឆ្នាំ​២០០៦ និង​ឆ្នាំ​២០០៩ គឺជា​ដំណើរ​ទស្សនកិច្ច​ផ្លូវរដ្ឋ​ របស់​ប្រធានាធិបតី​នៃ​សាធារណរដ្ឋ​កូរ៉េ​ ដែល​នឹង​ធ្វើឡើង​ ក្រោយពី​ដំណើរ​ទស្សនកិច្ច​ លើក​ទី​ពីរ​កាលពី​១០​ឆ្នាំមុន​។ ​ដូច្នេះ​ខ្ញុំ​រំពឹងថា​ ដំណើរ​ទស្សនកិច្ច​លើក​នេះ​ នឹង​ជួយ​ពង្រឹង​កិច្ចសហប្រតិបត្តិការ ​រ​វាង​ប្រទេស​ទាំងពីរ​ កាន់តែ​ស៊ីជម្រៅ ​ក៏ដូចជា​លើកកម្ពស់​ទំនាក់ទំនង​របស់​ប្រទេស​ទាំងពីរ​ ឲ្យ​កាន់តែ​ឈានឡើង​ខ្ពស់ ជាង​មុន​មួយកម្រិត​ទៀតផង​ដែរ​។​

​ជាមួយគ្នានេះដែរ​ ដំណើរ​ទស្សនកិច្ច​លើក​នេះ​ មាន​អត្ថន័យ​ក្នុងការ​រៀបចំ​មូលដ្ឋាន​ដើម្បី​ប្រារព្ធ​កិច្ចប្រជុំ​កំពូល​ពិសេស ​កូរ៉េ​-​អាស៊ាន​ និង​កិច្ចប្រជុំ​កំពូល​កូរ៉េ​-​មេគង្គ​ ដែល​គ្រោង​នឹង​ប្រារព្ធ​នៅក្នុង​ប្រទេស​កូរ៉េ​ នៅ​ឆមាស​ទី​២​ ឆ្នាំនេះ​។ ​កិច្ចប្រជុំ​កំពូល​ពិសេស​កូរ៉េ​-​អាស៊ាន​ គ្រោង​នឹង​ប្រារព្ ធ​ដើម្បី​រំលឹក​ទំនាក់ទំនង​កិច្ចសន្ទនា ​រយៈពេល​៣០​ឆ្នាំកន្លងមក​រវាង​កូរ៉េ​និង​អាស៊ាន​។​ ឯ​កិច្ចប្រជុំ​កំពូល​កូរ៉េ​-​មេគង្គ​នឹងមាន​ការលើក​កម្រិត​ពី​ថ្នាក់​រដ្ឋមន្ត្រីការបរទេស ​ឲ្យ​ទៅជា​ថ្នាក់​កំពូល ហើយ​នេះ​គឺជា​ចំណុច​ដ៏​មាន​អត្ថន័យ​យ៉ាងខ្លាំង ដោយសារ​សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​ជា​អ្នក​ផ្តួច​ផ្តើមគំនិត​នេះ​។​

សកម្មភាព​លោក អូ ណាក់​យ៉ុង ឯកអគ្គរដ្ឋទូត​ នៃ​សាធារណរដ្ឋ​កូរ៉េ​ ប្រចាំ​នៅ​កម្ពុជា ​នាពេល​កន្លងទៅ​

រស្មី​កម្ពុជាៈ យោងទៅតាម​សេចក្តីថ្លែងការណ៍​របស់ លោក មូ​ន ចេ អ៊ី​ន ផ្ញើជូន​វេទិកាព័ត៌មាន នៃ​បណ្តាញ​ព័ត៌មាន​អាស៊ី (Asia News Network or ANN) លោក​ប្រធានាធិបតី​បាន​សង្កត់ធ្ងន់ អំពី​អារម្មណ៍ និង​មនោសញ្ចេតនា នឹង​ភាព​ផ្សារភ្ជាប់​ជាច្រើន​រវាង​អាស៊ាន និង សាធារណរដ្ឋ​កូរ៉េ ដូច្នេះ តើ​លោក​ឯកអគ្គរដ្ឋទូត អាច​ពន្យល់​លំអិត​បន្តិច​អំពី​គោលនយោបាយ​ទិសដៅ​ខាងត្បូង​ថ្មី​របស់លោក​ប្រធានាធិបតី មូ​ន មកកាន់​អាស៊ាន ?

លោក អូ ណាក់​យ៉ុងៈ គោលនយោបាយ​ទិសដៅ​ខាងត្បូង​ថ្មី​គឺជា គោលនយោបាយ​ការបរទេស​ស្នូល និង​ជា​កិច្ច​ផ្តួចផ្តើម​ផ្លូវ​ការទូត​ ដែល​លោក​ប្រធានាធិបតី​ មូ​ន​ចេ​អ៊ី​ន​បានប្រកាស​ជា​ផ្លូវការ ​តាមរយៈ​សុន្ទរកថា​គន្លឹះ ​ក្នុង​វេទិកា​ធុរជន​កូរ៉េ​-​ឥណ្ឌូនេស៊ី ​កាលពី​ថ្ងៃទី​៩ ខែ វិច្ឆិកា ឆ្នាំ​២០១៧​។ ចំណុច​ស្នូល​នៃ​គោលនយោបាយ​នេះ​គឺជា​ការលើកកម្ពស់​ កម្រិត​កិច្ចសហប្រតិបត្តិការ​ រ​វាង​បណ្តា​ប្រទេស​ ជា​សមាជិក​អាស៊ាន​ឲ្យ​ស្មើនឹង​កម្រិត​របស់​ប្រទេស​មហាអំណាច​ទាំង​បួន​នៅ​ជុំវិញ​ប្រទេស​កូរ៉េ​។​គឺ​ប្រទេស​អាម៉េរិក ចិន ជប៉ុន និង​រុស្ស៊ី ដោយ​ផ្តោតជាសំខាន់​លើ 3P គឺ​មនុស្ស​(People)​ស​និ្ត​ភាព​(Peace)​វិបុលភាព​(Prosperity)​។​មិនមែន​យកចិត្តទុកដាក់​លើ​តែ​ពា​ណិ​ជ្ចក​ម្ម​ទំនិញ​ប៉ុណ្ណោះ​ទេ ត្រូវមាន​ការពង្រីក​វិសាលភាព​រហូតដល់​បច្ចេក​វិជ្ជា វប្បធម៌ សិល្បៈ និង ការផ្លាស់ប្តូរ​រវាង​ប្រជាជន និង​ប្រជាជន ហើយក៏​យកចិត្តទុកដាក់​លើ​ការពង្រឹង​កិច្ចសហប្រតិបត្តិការ​និង​ការជួយ​គ្នា​ទៅវិញទៅមក​ក្នុង​ការធ្វើសកម្មភាព​រួម​គ្នា​ទប់ស្កាត់​កម្មវិធី​អាវុធ​នុយក្លេអ៊ែរ​របស់​ប្រទេស​កូរ៉េខាងជើង​ក្នុង​កម្រិត​ការពារជាតិ​ផងដែរ​។​

សកម្មភាព​លោក អូ ណាក់​យ៉ុង ឯកអគ្គរដ្ឋទូត​ នៃ​សាធារណរដ្ឋ​កូរ៉េ​ ប្រចាំ​នៅ​កម្ពុជា ​នាពេល​កន្លងទៅ​

ក្នុងចំណោម​3P បើ​ទាក់ទង​នឹង​មនុស្ស​(People) គឺជា​ការធ្វើ​សហគមន៍​ដែល​ត្រូវបាន​ត​ភ្ជាប់​រវាង​មនុស្ស និង​មនុស្ស​(people to people) ទឹកចិត្ត និង​ទឹកចិត្ត​(heart to heart) ដោយមាន​ការពង្រីក​ការផ្លាស់ប្តូរ​រវាង​ប្រជាជន និង​ប្រជាជន​គ្រប់​ជាន់ថ្នាក់​។ អ្នកដំណើរ​ទស្សនកិច្ច​ទៅវិញទៅមក​រវាង​កូរ៉េ និង​អាស៊ាន​បាន និង​កំពុងតែ​កើនឡើង ប្រមាណ​១០​ភាគរយ​ជា​រៀងរាល់ឆ្នាំ គឺ​ក្នុង​ឆ្នាំ​២០១៦ មាន​ចំនួន​៨,៦៥​លាន​នាក់​ឆ្នាំ​២០១៧​មាន​ចំនួន​៩,៧៨​លាន​នាក់ និង​ឆ្នាំ​២០១៨​មាន​ចំនួន​ជាង​១០​លាន​នាក់​។​

​ប្រជាជន​កូរ៉េ​ចូលចិត្ត​ទីកន្លែង​រមណីយដ្ឋាន​ទេសចរណ៍​នៅ​តំបន់​អាស៊ីអាគ្នេយ៍​ហើយ​នៅ​កម្ពុជា​ចំនួន​ភ្ញៀវទេសចរ​កូរ៉េ​ទទួលបាន​ចំណាត់ថ្នាក់​លេខ​៤​ផងដែរ ។ ជាមួយគ្នានេះដែរ​នៅ​កម្ពុជា K-drama, K-pop, K-food​កំពុងតែ​ត្រូវ​បានទទួល ការពេញនិយម​យ៉ាងខ្លាំង​ដោយ​ផ្អែកលើ​ប្រជាប្រិយភាព​របស់​រលក​កូរ៉េ​(Korean Wave)​នៅ​តំបន់​អាស៊ីអាគ្នេយ៍​ដូច ជា​ប្រទេស​កម្ពុជា ជាដើម​។​

P ទី​ពីរ​. ជា​វិបុលភាព​រួម​(Co-Prosperity)​គឺជា​ការជំរុញ​កិច្ចសហប្រតិបត្តិការ​សេដ្ឋកិច្ច​ប្រកបដោយ​ផលប្រយោជន៍ ទៅវិញទៅមក​ក្នុង​ទំនាក់ទំនង​ឈ្នះ​-​ឈ្នះ រវាង​កូរ៉េ និង​បណ្តា​ប្រទេស​អាស៊ាន​។ អាស៊ាន​ជាទី​ផ្សា​របស់​វិស័យ​សំណង់ ការវិនិយោគ និង​ពាណិជ្ជកម្ម​ទី​ពីរ​នៃ​ប្រទេស​កូរ៉េ ហើយ​ទំហំ​នៃ​ពាណិជ្ជកម្ម​រវាង​កូរ៉េ​និង​អាស៊ាន​កំពុងតែបន្ត​កើនឡើង ដោយ​ក្នុង​ឆ្នាំ​២០១៦ មាន​ទឹកប្រាក់​ចំនួន​១១៩.០០០​លាន​ដុល្លារ​ឆ្នាំ​២០១៧​មាន​ទឹកប្រាក់​ចំនួន​១៥៣.០០០​លាន ដុល្លារ​ឆ្នាំ​២០១៨​មាន​ទឹកប្រាក់​ជាង​១៦០.០០០​លាន​ដុល្លារ​។​យើងខ្ញុំ​សង្ឃឹមថា​កូរ៉េ​-​អាស៊ាន​នឹង​បន្តធ្វើ​កិច្ចសហប្រតិបត្តិការ​ដោយ​ផ្តោត​សំខាន់​ទៅលើ​វិស័យ​ចរាចរណ៍ ថាមពល ការគ្រប់គ្រង​ធនធានទឹក បច្ចេកវិទ្យា​ទូរគមនាគមន៍​និង ព័ត៌មាន​(ICT)​វៃឆ្លាត និង​កសិកម្ម ជាដើម​។​

P ​ចុងក្រោយ គឺជា​ការកសាង​សហគមន៍​សន្តិភាព​។ យើងខ្ញុំ​សង្ឃឹមថា កូរ៉េ និង​បណ្តា​ប្រទេស​អាស៊ាន​ក៏​នឹង​បន្ត​ពង្រីក កិច្ចសហប្រតិបត្តិការ​លើ​វិស័យ​ការពារជាតិ​ព្រមទាំង​សហការ​លើ​វិស័យ​មួយចំនួន​ដែល​មិនសូវ​បានធ្វើ​កិច្ចសហការ​កន្លងមក​ដូចជា​សកម្មភាព​ទប់ស្កាត់​គ្រោះមហន្តរាយ​ការប្រឆាំង​ភេរវកម្ម​ការការពារ​សន្តិសុខ​លើ​បណ្តាញ​អ៊ិន​ធើ​ណេ​ត​(cyber security) ជាដើម ក៏ដូចជា​បន្តធ្វើ​កិច្ចសហប្រតិបត្តិការ ក្នុងការ​សម្រេច​សន្តិភាព និង​ស្ថិរភាព​ក្នុង​តំបន់​អាស៊ី​បូព៌ា​ផងដែរ​។ ខ្ញុំ​សូម​ធ្វើការ​វាយតម្លៃ​ខ្ពស់​ដល់​អាស៊ាន​ដែល​បាន និង​កំពុងតែ​ដើរតួនាទី​យ៉ាងសកម្ម ក្នុង​ការកសាង​សន្តិភាព​ក្នុង​ឧបទ្វីប​កូរ៉េ ដូចជា ការអញ្ជើញ​ប្រទេស​កូរ៉េខាងត្បូង និង​កូរ៉េខាងជើង ចូលរួម​ក្នុងការ​ប្រកួត​កីឡា​អាស៊ាន​នៅ​ប្រទេស​ឥណ្ឌូនេស៊ី ការ​ប្រារព្ធ​កិច្ចប្រជុំ​កំពូល​កូរ៉េខាងជើង និង​អាមេរិក​នៅ​ប្រទេស​សិង្ហ​បុរី និង​វៀតណាម​ជាដើម​។​

សកម្មភាព​លោក អូ ណាក់​យ៉ុង ឯកអគ្គរដ្ឋទូត​ នៃ​សាធារណរដ្ឋ​កូរ៉េ​ ប្រចាំ​នៅ​កម្ពុជា ​នាពេល​កន្លងទៅ​

ក្នុង​អត្ថន័យ​ដើម្បី​ព​ន្លឿ​ន​នូវ​គោលនយោបាយ​ទិសដៅ​ខាងត្បូង​ថ្មី​ដែល​ផ្តោត​សំខាន់​លើ​3P លោក​ប្រធានាធិបតី មូ​ន ចេ អ៊ី​ន បានជ្រើសរើស​ប្រទេស​បី​ក្នុង​តំបន់​អាស៊ាន គឺ កម្ពុជា ព្រុយ​ណេ និង​ម៉ាឡេស៊ី ជា​ប្រទេស​គោលដៅ​នៃ​ដំណើរ​ទស្សនកិច្ច​ទៅកាន់​ប្រទេសក្រៅ​របស់លោក ដែល​ត្រូវ​ចាប់ផ្តើម​ធ្វើ​ឡើងជា​លើកដំបូង​ក្នុង​ឆ្នាំ​២០១៩​។ រដ្ឋាភិបាល​សាធារណរដ្ឋ​កូរ៉េ​សង្ឃឹមថា បន្ទាប់ពី​ដំណើរ​ទស្សនកិច្ច​ផ្លូវរដ្ឋ​លើក​នេះ កិច្ចសហប្រតិបត្តិការ​ជា​យុទ្ធសាស្ត្រ​រវាង​កូរ៉េ និង​អាស៊ាន នឹង​ត្រូវបាន​ពង្រីក និង​ពង្រឹង​បន្ថែមទៀត តាមរយៈ​កិច្ចប្រជុំ​កំពូល​ពិសេស​កូរ៉េ​-​អាស៊ាន និង​កិច្ចប្រជុំ​កំពូល​កូរ៉េ​-​មេគង្គ​នា​ចុងឆ្នាំ​នេះ​។​

សកម្មភាព​នានា ​ក្រោម​កិច្ចសហការ​ រវាង​សាធារណរដ្ឋ​កូរ៉េ​ និង​កម្ពុជា

​រស្មី​កម្ពុជាៈ បើ​និយាយ​អំពី​នយោបាយ​ការបរទេស​របស់​មហា​អំណាច​ដែលមាន​ឥទ្ធិពល​នៅ​អាស៊ាន ដូចជា ជប៉ុន និង​អាមេរិក គឺ​គេ​ផ្តោត​សំខាន់​ទៅលើ​គំនិត​ផ្តួចផ្តើម នៃ​យុទ្ធសាស្ត្រ តំបន់​ឥណ្ឌូ​-​ប៉ាស៊ីហ្វិក​សេរី និង បើកចំហរ ( Free and Open Indo-Pacific strategy) ហើយ​ចិន គឺ​គំនិត​ផ្តួចផ្តើម​ក្រវ៉ាត់​មួយ​និង​ផ្លូវ​មួយ​(One Belt, One Road Initiative) ដោយឡែក​លោក​ប្រធានាធិបតី មូ​ន ចេ អ៊ី​ន បានលើកឡើង​ពី​គោលនយោបាយ​ទិសដៅ​ខាងត្បូង​ថ្មី​(New Southern Policy) ដូច​បានបញ្ជាក់​នៅក្នុង​សារ​ជូន ANN ! ដូច្នេះ តើ​លោក​ឯកអគ្គរដ្ឋទូត អាច​ជម្រាប​បានទេ​ថា តើ​នយោបាយ​នេះ នឹង​ផ្សារភ្ជាប់​ជាមួយនឹង អាស៊ាន ជាពិសេស​កម្ពុជា យ៉ាងដូចម្តេច ?

លោក អូ ណាក់​យ៉ុងៈ រវាង​កូរ៉េ និង​កម្ពុជា​ត្រូវបាន​កសាង​មូលដ្ឋាន​រឹងមាំ​រួចជាស្រេច​ដើម្បី​បង្កើត​សហគមន៍​សន្តិភាព និង​វិបុលភាព​ដោយ​ផ្តោត​សំខាន់​ទៅលើ​មនុស្ស ដូចជា ការផ្លាស់ប្តូរ​រវាង​ប្រជាជន​និង​ប្រជាជន​រហូតដល់​៤០​ម៉ឺន​នាក់​។​សហគមន៍​ប្រជាជន​កម្ពុជា​នៅក្នុង​ប្រទេស​កូរ៉េ​ប្រមាណ​៤៥.០០០​នាក់ និង​សហគមន៍​ជនជាតិ​កូរ៉េ​នៅក្នុង​កម្ពុជា​ប្រមាណ​១៥.០០០​នាក់ ពលករ​កូរ៉េ រួមទាំង​សកម្មភាព​យ៉ាងសកម្ម​របស់​អង្គការ​ក្រៅ រដ្ឋាភិបាល កូរ៉េ​នៅ​កម្ពុជា ជាដើម​។​ល​។

ដោយ​ឈរលើ​មូលដ្ឋាន​រឹងមាំ​ដូចនេះ រដ្ឋាភិបាល​កូរ៉េ​មានបំណង​ចង់​ពង្រឹង​កិច្ចសហប្រតិបត្តិការ​ ជាមួយ​កម្ពុជា​ កាន់តែ​ស៊ីជម្រៅ​លើ​គ្រប់​វិស័យ​។ ក្នុង​កម្រិត​មនុស្ស (People) បន្ត​ជំរុញ​ការផ្លាស់ប្តូរ​ រវាង​ប្រជាជន និង​ប្រជាជន និង​វប្បធម៌​កាន់តែច្រើន ព្រមទាំង​បន្ត​ពង្រឹង​មូលដ្ឋាន​វិស័យ​ច្បាប់​ ដើម្បី​បង្កើន​សិទ្ធិ និង​ការការពារ​សម្រាប់​ប្រជាជន​នៃ​ប្រទេស​ទាំងពីរ​ដែល​កំពុងស្នាក់នៅ​ប្រទេស​កូរ៉េ និង​កម្ពុជា​។​

ក្នុងឆ្នាំនេះ ស្ថានទូត​កូរ៉េ​កំពុងតែ​រៀបចំ​កម្មវិធី​ផ្សេងៗ​ជាច្រើន ដូចជា K-pop World Festival ការប្រកួត​កីឡា​តេ​ក្វាន់​ដូ​ពានរង្វាន់​ឯកអគ្គរដ្ឋទូត​កូរ៉េ ពិធី​មហោស្រព​ភាពយន្ត​កូរ៉េ កម្មវិធី​វប្បធម៌​កូរ៉េ​នៅ CKCC ជាដើម​។ ម្យ៉ាងទៀត ប្រជាជន​កូរ៉េ​ជាច្រើន​កំពុងធ្វើការ​ស្វែងយល់ និង​ទស្សនា​វប្បធម៌​កម្ពុជា ដូចជា របាំ​អប្សរា និង ប្រាសាទ អង្គរវត្ត តាមរយៈ​ឧបករណ៍​បង្កើត​ពិភព​សិប្ប​និមិត្ត​(VR)​ជាដើម នៅ​មជ្ឈមណ្ឌល​វប្បធម៌​អាស៊ាន​ដែល​ស្ថិតនៅ​ទីក្រុង​ប៊ូសាន​។​

សកម្មភាព​នានា ​ក្រោម​កិច្ចសហការ​ រវាង​សាធារណរដ្ឋ​កូរ៉េ​ និង​កម្ពុជា

ជាមួយគ្នានេះ​ផងដែរ ប្រទេស​កូរ៉េ មានបំណង​រួមចំណែក​ក្នុងការ​កែលំអរ​គុណភាព​ជីវភាព​របស់​ប្រជាជន​កម្ពុជា តាមរយៈ​ជំនួយ​អភិវឌ្ឍន៍​ផ្លូវការ​(ODA) ដូចជា​ការសាងសង់​មន្ទីរពេទ្យ​កុមារ​ជាតិ​ឡើងវិញ និង​ការអនុវត្ត​គម្រោង​ថែទាំ​សុខភាព​មាតា និង​ទារក​ជារួម ក្នុង​ខេត្ត​ចំនួន​៣​នៅ​ភូមិភាគ​ឦសាន នៃ​ប្រទេស​កម្ពុជា ជាដើម​។​

ក្នុង​កម្រិត​វិបុលភាព​ (Prosperity)​ រដ្ឋាភិបាល​កូរ៉េ​ នឹង​ពង្រឹង​កិច្ចសហប្រតិបត្តិការ​សេដ្ឋកិច្ច​របស់​ប្រទេស​ទាំងពីរ​ឲ្យ​កាន់តែ​រឹងមាំ​។ កាលពី​ឆ្នាំមុន ទំហំ​ពាណិជ្ជកម្ម​របស់​ប្រទេស​ទាំងពីរ​សម្រេចបានរ​ហូត​ដល់ ៩៧០​លាន​ដុល្លារ ហើយ​ក្នុងឆ្នាំនេះ យើង​រំពឹងថា វា​នឹង​សម្រេចបាន​ក្នុង​ទំហំ​លើស ​១.០០០​ លាន​ដុល្លារ​។ ម្យ៉ាងទៀត ប្រជាជន​កម្ពុជា​ជិត​៤​ម៉ឺន​នាក់​កំពុងតែ​ចូលរួមចំណែក​ក្នុង​វិស័យសេដ្ឋកិច្ច​កូរ៉េ ដោយ​ធ្វើការ​នៅក្នុង​ប្រទេស​កូរ៉េ តាមរយៈ​ប្រព័ន្ធ​អនុញ្ញាតិ​មុខរបរ​(EPS) ដែល​ផ្តល់​ប្រសិទ្ធភាព​ឈ្នះ​-​ឈ្នះ លើ​វិស័យសេដ្ឋកិច្ច​របស់​ប្រទេស​ទាំងពីរ​។​ ​

កម្ពុជា​គឺជា​មូលដ្ឋាន​នៃ​មជ្ឈមណ្ឌល​កិច្ចសហប្រតិបត្តិការ ​លើ​វិស័យ​ព្រៃឈើ​កូរ៉េ​-​មេគង្គ​ហើយ​កម្ពុជា​បាន​ចុះឈ្មោះ​ជា​សមាជិក​នៃ​អង្គការ​សហប្រតិបត្តិកា​រ ព្រៃឈើ​អាស៊ី​(AFoCo)​ កាលពី​ឆ្នាំមុន​។ ខ្ញុំ​ជឿជាក់ថា កិច្ចសហប្រតិបត្តិការ​លើ​វិស័យ​ព្រៃឈើ​នឹងចូលរួម​ចំណែក ក្នុងការ​បង្កើត​បរិស្ថាន​ដ៏​ល្អ​សម្រាប់​ការរស់នៅ​របស់​ប្រជាជន​ទាំងអស់គ្នា​។​

កម្ពុជា គឺជា​ប្រទេស​កសិកម្ម​តាំងពី​សម័យមុនៗ ដែលមាន​ការនាំចេញ​ដំណាំ​កសិផល ដូចជា អង្ករ ដំឡូង​មី ម្រេច ម្ទេស និង​ស្វាយ ជាដើម ហេតុដូច្នេះ កិច្ចសហប្រតិបត្តិការ​កសិកម្ម​ក៏​ជា​វិស័យ​ដ៏​មាន​សក្តានុពលភាព​ផងដែរ​។ រោងចក្រ​សម្អាត​ផលិតផល​កសិផល​ត្រូវបាន​សម្ពោធ កាលពី​ខែកុម្ភៈ​ឆ្នាំនេះ ក្រោម​កិច្ចសហការ​រវាង​សហគ្រាស​នៃ​ប្រទេស​ទាំងពីរ គេ​រំពឹងថា រោងចក្រ​នេះ​នឹង នាំចេញ​ស្វាយ​កម្ពុជា​ដែលមាន​រសជាតិ​ឆ្ងាញ់​ទៅ​ប្រទេស​កូរ៉េ ហើយ​ប្រជាជន​កូរ៉េ​ក៏​អាច​សាកល្បង​ទទួលទាន​ផ្លែស្វាយ​ដ៏​មានឱជារស​ពី​កម្ពុជា​បាន​ផងដែរ​។​

រដ្ឋាភិបាល​កូរ៉េ​កំពុងតែ​អនុវត្ត​គម្រោង​ពង្រីក​និង​ពង្រឹង​សហគមន៍​ជនបទ​កម្ពុជា និង​ផ្តល់ជំនួយ​សម្រាប់​ការបង្កើត​ប្រព័ន្ធ​ឃ្លាំង​ស្តុក​អង្ករ តាមរយៈ​អង្គការ ក​យ​កា​(KOICA) និង កូ​ព្យា​(KOPIA) ។ ជាមួយគ្នានេះដែរ ក្នុងឆ្នាំនេះ ស្ថានទូត​កូរ៉េ​គ្រោង​នឹង​ប្រារព្ធ​កម្មវិធី​ផ្សព្វផ្សាយ​ម្ហូបអាហារ​ដែល​កែច្នៃ​ពី​ដំណាំ​កសិផល​កម្ពុជា​នៅ​ភ្នំពេញ ដែល​កម្មវិធី​នេះ​ត្រូវបាន​ប្រារព្ធ​ឡើង​ម្តង​រួចមកហើយ​កាលពី​ឆ្នាំមុន​ក្នុង​គោលបំណង​ដើម្បី​ណែនាំ​ម្ហូបអាហារ​កូរ៉េ ដែល​ផលិត​ពី​កសិផល​ដ៏​មាន​គុណភាព​ខ្ពស់​របស់​កូរ៉េ​ដល់​ប្រជាជន​កម្ពុជា​។​

សកម្មភាព​នានា ​ក្រោម​កិច្ចសហការ​ រវាង​សាធារណរដ្ឋ​កូរ៉េ​ និង​កម្ពុជា

ទាក់ទង​នឹង​សន្តិភាព​ដែលជា​កត្តា​ស្នូល​ចុងក្រោយ​ក្នុងចំណោម​3P​នៃ​គោលនយោបាយ​ទិសដៅ​ខាងត្បូង​ថ្មី​គឺ​រដ្ឋាភិបាល​កូរ៉េ នឹងធ្វើ​កិច្ចសហប្រតិបត្តិការ​ក្នុងការ​ពង្រឹង​គុណ​តម្លៃ បទ​បញ្ញា​ត្តិ និង​ប្រព័ន្ធ​ពហុភាគី​ព្រមទាំង​កាត់បន្ថយ​នូវ​ការជំទាស់​ក្នុង​តំបន់​អាស៊ី​។ ទន្ទឹមគ្នានេះ ក៏​នឹង​រួមចំណែក​ក្នុង​ការកសាង​រចនាសម្ព័ន្ធ​តំបន់​ប្រកបដោយ​ភាពអនុគ្រោះ តម្លាភាព និង​ភាព​បើកចំហ​ផងដែរ​។​

កាលពី​ឆ្នាំមុន​កម្ពុជា​ បាន​ស្វាគមន៍ និង​គាំទ្រ​ដល់​ការ​ប្រារព្ធ​កិច្ចប្រជុំ​កំពូល​ជា​ប្រវត្តិសាស្ត្រ រវាង​កូរ៉េខាងត្បូង និង​កូរ៉េខាងជើង ដូចនេះ​ខ្ញុំ​សូម​ថ្លែងអំណរគុណ​ដល់​រាជរដ្ឋាភិបាល​កម្ពុជា ដែលជា​មិត្ត​ល្អ​តែង​បាននិងកំពុង​ជួយ​គាំទ្រ​ដោយ​គ្មាន​ការប្រែប្រួល​ដល់​ការកសាង​សន្តិភាព ប្រកបដោយ​និរន្តរភាព​លើ​ឧបទ្វីប​កូរ៉េ​។ កាលពី​ឆ្នាំមុន​សិក្ខាសាលា​ស្តីពី​ស្ថានភាព​នៃ​ឧបទ្វីប​កូរ៉េ​ត្រូវ​ប្រារព្ធ​ឡើង​ក្រោម​កិច្ច សហការគ្នា​រវាង​ស្ថានទូត​កូរ៉េ និង​វិទ្យាស្ថាន​ខ្មែរ​សម្រាប់​សហប្រតិបត្តិ​ការ និង​សន្តិភាព​(CICP) ហើយ​ឆ្នាំនេះ យើង​ក៏​នឹង​បន្ត​នូវ​កិច្ច​សហការគ្នា​នេះ​ផងដែរ​។​

កូរ៉េ និង​កម្ពុជា​កំពុងតែ​ចូលរួម​សកម្មភាព​កងកម្លាំងរ​ក្សា​សន្តិភាព​ពហុ​ជាតិ​(PKO)​របស់​អង្គការសហប្រជាជាតិ​(UN) ដូច្នេះ​រដ្ឋាភិបាល​កូរ៉េ​នឹង​បន្តធ្វើ​ការផ្លាស់ប្តូរ និង​សហការ​លើ​វិស័យ​PKO​រវាង​ប្រទេស​ទាំងពីរ ព្រមទាំង​បន្ត​ពង្រឹង​កិច្ចសហប្រតិបត្តិការ​លើ​វិស័យ​ការពារជាតិ ដែល​មិនសូវមាន​ការសហការ​គ្នា​កាលពីពេល​កន្លងទៅ ដូចជា ការចែករំលែក​ នូវ​វិធីសាស្ត្រ​ស៊ើបអង្កេត​បទល្មើស​តាម​បណ្តាញ​អ៊ី​ន​ធើ​ណែ​ត​ដ៏​ឆ្នើម​របស់​កូរ៉េ​ជាដើម ខណៈដែល​បទល្មើស​តាម​បណ្តាញ​អ៊ី​ន​ធើ​ណែ​ត​នេះ កំពុងតែបន្ត​កើនឡើង​ជា​លំដាប់​ស្របគ្នា​ជាមួយនឹង​ការវិវត្តន៍​នៃ​បច្ចេកវិទ្យា​។​

សកម្មភាព​នានា ​ក្រោម​កិច្ចសហការ​ រវាង​សាធារណរដ្ឋ​កូរ៉េ​ និង​កម្ពុជា

​រស្មី​កម្ពុជាៈ តើ​មាន​កិច្ចព្រមព្រៀង​ឬ​ឯកសារ ចំនួន​ប៉ុន្មាន​ដែល​នឹងត្រូវ​ចុះហត្ថលេខា ក្នុង អំឡុងពេល​ដំណើរ​ទស្សនកិច្ច​របស់​លោក ប្រធានាធិបតី មូ​ន ចេ អ៊ី​ន​នាពេលនេះ​?

លោក អូ ណាក់​យ៉ុងៈ ប្រទេស​ទាំងពីរ​កំពុង​តែ​រៀបចំ​ពិធី​ចុះហត្ថលេខា​លើ​កិច្ចព្រមព្រៀង​សហប្រតិបត្តិការ និង អនុស្សរណៈ​យោគយល់​គ្នា​មួយចំនួន​ស្តីពី​ជំនួយ​អភិវឌ្ឍន៍​ផ្លូវការ​(ODA) កិច្ចសហប្រតិបត្តិការ​បច្ចេកវិទ្យា​ឧស្សាហកម្ម និង​ការជំរុញ​នូវ​ការផ្លាស់ប្តូរ​រវាង​ប្រជាជន និង​ប្រជាជន​ជាដើម​។​

ក្រោយ​កិច្ចប្រជុំ​កំពូល​នឹងមាន​កម្មវិធី​ប្រកាស​លទ្ធផល​រួម​នៃ​កិច្ចប្រជុំ​កំពូល​ចំពោះ​សារព័ត៌មាន​។​ហេតុដូច្នេះ​សូមមេត្តា​រង់ចាំ​ទស្សនា​លទ្ធផល​នៃ​កិច្ចប្រជុំ​កំពូល​រវាង​ថ្នាក់ដឹកនាំ​កំពូល​របស់​ប្រទេស​ទាំងពីរ នា​ថ្ងៃទី​១៤ ខែមីនា​ខាងមុខនេះ​៕Ha/v