បុរស​ម្នាក់​ដាំ​ដើមឈើ​មួយ​ដើម​រាល់ថ្ងៃ​លើដី​កោះ​ខ្សោះ​រហូត​ក្លាយជា​ព្រៃខ្លា និង​ដំរី​

1237
ចែករម្លែក

​ហេតុតែ​មានចិត្ត​ស្រឡាញ់ និង​ការប្តេជ្ញាចិត្ត​មោះមុត​ក្នុងការ​អភិរក្ស​ពិភព​ធម្មជាតិ បុរស​ម្នាក់ បាន​ព្យាយាម​ដាំ​ដើមឈើ​មួយ​ដើម​រាល់ថ្ងៃ​លើដី​កោះ​ខ្សោះ​គ្មាន​ជីជាតិ​រហូត​ក្លាយជា​ព្រៃធំ​ដែលមាន​ហ្វូង​ខ្លា និង​ដំរី​រស់នៅ​ស្ទើរ​មិនគួរ​ឱ្យ​ជឿ​។
​ ​
​លោក ចា​ដាវ ប៉ា​យ៉េ​ង (Jadav Payeng) ដែលមាន​កូន​បីនាក់​រស់នៅ​លើ​កោះ​ម៉ា​ជូ​លី (Majuli) រដ្ឋ​អាសា​ម (Assam) ប្រទេស​ឥណ្ឌា ដែលជា​កោះ​ទន្លេធំ​បំផុត​របស់​ពិភពលោក​ព្រួយបារម្ភ យ៉ាងខ្លាំង​ចំពោះ​ការបំផ្លិចបំផ្លាញ​មកលើ​ទឹកដី​នេះ បន្ទាប់ពី​មាន​ទឹកជំនន់ និង​គ្រោះរាំងស្ងួត ធ្ងន់ធ្ងរ​ជា​បន្តបន្ទាប់​នៅ​ឆ្នាំ​១៩៧៩​។

​ដើម្បី​ទប់ស្កាត់​កុំឱ្យ​ធម្មជាតិ​បំផ្លិចបំផ្លាញ​ទឹកដី​កំណើត​របស់គាត់​បន្ថែម​ទៀត លោក ចា​ដាវ ប៉ា​យ៉េ​ង ដែល​កាលនោះ​មាន​វ័យ​ទើបតែ ១៦ ឆ្នាំ​បានសម្រេច​ចិត្ត​ដាំ​ដើមឈើ​មួយ​ដើម​រាល់ថ្ងៃ​។ រយៈពេល ៣៩ ឆ្នាំ​ក្រោយមក ដើមឈើ​ដែល​គាត់​ដាំ​បាន​ក្លាយជា​ព្រៃ​ដ៏​ធំ​មួយ​ដែលមាន​ទំហំ​ជាង ៥,៥ គីឡូម៉ែត្រ​ក្រឡា ហើយ​សព្វថ្ងៃ​វា​បាន​ក្លាយជា​ជម្រក​របស់​សត្វ​ខ្លា រមាស ត្មាត និង​ដំរី​ដែលមាន​ចំនួន​ដល់​ទៅ ១១៥ ក្បាល​។

​ដោយសារតែ​បែបនេះ គាត់​ត្រូវបាន​គេ​ដាក់​រហស្សនាម​ថា “Forest Man of India” (​បុរស​ព្រៃឈើ​ឥណ្ឌា​)​។ ហើយ​សូម្បី​តែព្រៃ​ដែល​គាត់​បាន​ដាំ​ក៏មាន​ឈ្មោះ​ដែរ​គឺ “​ព្រៃ​មូ​ឡៃ កា​ថូ​នី​” (Mulai Kathoni Forest)​។

​នៅក្នុង​ខ្សែភាពយន្ត​ឯកសារ​មាន​ឈ្មោះថា “Forest Man” (​បុរស​ព្រៃឈើ​) ដែលមាន​អ្នក ទស្សនា​រហូតដល់​ទៅ​ជាង ២,៧ លាន​នាក់​តាម​យូ​ធ្យូ​ប (YouTube) អ្នកកាសែត​ឈ្មោះ ជី​ទូ កាលី​តា (Jitu Kalita) ដែល​បានមក​ថត​ផ្តិត​យក​រូបភាព​លើ​កោះ​ខាងលើនេះ​កាលពី​ឆ្នាំ​២០០៧ និយាយថា គាត់​ស្ទើរតែ​មិន​ជឿ​ភ្នែក​ខ្លួនឯង ពេល​ឃើញ​ព្រៃឈើ​នៅលើ​ដី​កោះ​ដែល​ខ្សោះ គ្មាន​ជីជាតិ​បែបនេះ​៕ ប្រែ​សម្រួល​: ខុម​