ប្រកួត​គម្រោង​ខ្នាតតូច បំផុស​ឱ្យ​យុវជន​មានគំនិត​ច្នៃប្រឌិត​ចេះ​បង្កើត​របរ​ឆ្លើយតប​ទៅនឹង​បរិបទ​ថ្មី និង​ការរីកចំរើន​នៃ​សង្គម​

1541
ចែករម្លែក
ការិយាល័យ​ទីភ្នាក់ងារ​ឧ​ត្ត​ម​សិក្សា​ប្រើប្រាស់​ភាសា​បារាំង ប្រចាំ​នៅ​ប្រទេស​កម្ពុជា និង​គ្រឹះស្ថាន​ឧ​ត្ត​មសិ​ក្សា​ជា​សមាជិក​បានរៀបចំ​កា​រ​ប្រកួតប្រជែង​គម្រោង​ខ្នាតតូច កាលពីពេល​ថ្មីៗ​នេះ នៅ​វិទ្យាស្ថាន​បច្ចេកវិទ្យា​កម្ពុជា​(​រូប សុផល​)

​ដោយ​៖ សុផល / ភ្នំពេញ​៖ ការិយាល័យ​ទីភ្នាក់ងារ​ឧ​ត្ត​ម​សិក្សា​ប្រើប្រាស់​ភាសា​បារាំង (AUF) ប្រចាំ​នៅ​ប្រទេស​កម្ពុជា សហការ​ជាមួយ​គ្រឹះស្ថាន​ឧ​ត្ត​មសិ​ក្សា ជា​សមាជិក​បានរៀបចំ​ការប្រកួតប្រជែង​គម្រោង​ខ្នាតតូច (Concours Mini-projet) នៅ​ថ្ងៃទី​២៣ ខែ​មិនា ឆ្នាំ ២០១៨ នៅ​វិទ្យាស្ថាន​បច្ចេកវិទ្យា​កម្ពុជា​។​

​ការប្រកួត​នេះ រៀបចំឡើង​ក្នុង​ទិវា នៃ​ការប្រើប្រាស់​ភាសា​បារាំង​ក្នុង​គោលបំណង​ឆ្លុះបញ្ចាំង​នូវ​ចំណេះដឹង​ទូទៅ​គំនិត​ច្នៃប្រឌិត ក្នុង​ការកសាង​គម្រោង និង​ភាពឆ្លាតវៀងវៃ​នៃ​និស្សិត​ដែល​សិក្សា​ជា​ភាសា​បារាំង នៅតាម​បណ្តា​គ្រឹះស្ថាន​ឧ​ត្ត​មសិ​ក្សា​នានា ក្នុង​បរិយាកាស​សប្បាយរីករាយ​។​

​តំណាង​ស្ថាប័ន ថ្នាក់ដឹកនាំ​ក្រសួង​អប់រំ​យុវជន​និង​កីឡា ស្ថានទូត​បារាំង​ប្រចាំ​នៅ​កម្ពុជា ព្រឺទ្ធសភា គ្រឹះស្ថាន​ឧ​ត្ត​មសិ​ក្សា សភាពាណិជ្ជកម្ម​អឺរ៉ុប​និង​បារាំង សាស្ត្រាចារ្យ​និង​និស្សិត ប្រមាណ​៣០០​នាក់​បាន​ចូលរួម​ទស្សនា​និង​គាំទ្រ​ការប្រកួត​Concours Mini-projet ។​

​នេះ​ជា​លើក​ទី​១​ហើយ​ដែល​ទីភ្នាក់ងារ​ឧ​ត្ត​មសិ​ក្សា​ប្រើប្រាស់​ភាសា​បារាំង​(AUF)​រៀបចំ​ការប្រកួត គម្រោង​ខ្នាតតូច​នេះ​ក្នុង​គោលដៅ​បំផុស​ឱ្យ​យុវជន​មានគំនិត​ច្នៃប្រឌិត ចេះ​កសាង​គម្រោង​ឬ​បង្កើត​របរ​ឆ្លើយតប​ទៅនឹង​បរិបទ​ថ្មី​នៅលើ​ពិភពលោក​និង​ការរីកចំរើន​នៃ​សង្គម​។​

​និស្សិត​ចំនួន​៤​ក្រុម​មកពី​សាកលវិទ្យាល័យ​ខុសៗ​ក្នុង​រាជធានី​ភ្នំពេញ​រួមមាន​សាកលវិទ្យាល័យ​ភូមិន្ទ​ភ្នំពេញ សាកលវិទ្យាល័យ​ភូមិន្ទ​វិចិត្រសិល្បៈ សាកលវិទ្យាល័យ​ភូមិន្ទ​នីតិសាស្ត្រ​និង​វិទ្យាសាស្ត្រ​សេដ្ឋកិច្ច និង​វិទ្យាស្ថាន​បច្ចេកវិទ្យា​កម្ពុជា​បាន​ចូលរួម​ប្រកួត​ដណ្តើម​ជ័យលាភី​ក្នុងឆ្នាំនេះ​។

​និស្សិត​ដែលមាន​សមាសភាព​ចំនួន​៣​នាក់​ក្នុង​មួយក្រុមៗ​ត្រូវ​ឆ្លើយ​សំណួរ​ទាក់ទង​នឹង​ចំណេះដឹង​ទូទៅ​ទាក់ទិន​នឹង​កីឡា ភាសា​បារាំង ព្រឹត្តិការ​ណ៏​នានា​និង​វប្បធម៌ ទាំង​ក្នុង​និង​ក្រៅប្រទេស មុននឹង​ឆ្លង​ចូល​វគ្គ​ការពារ​គម្រោង​នៅ​ចំពោះមុខ​គណៈកម្មការ​មេ​ប្រយោគ ដែលមាន​សមាសភាព​តំណាង​ស្ថានទូត​បារាំង​ប្រចាំ​នៅ​កម្ពុជា សភាពាណិជ្ជកម្ម​អឺរ៉ុប​និង​ក្រុមហ៊ុន​។​

​នាឱកាស​នោះ​ផងដែរ​ក៏មាន​សកម្មភាព​សិល្បៈ​ជាច្រើន​ដូចជា​ការ​ច្រៀង​ជា​បុគ្គល​ជា​ក្រុម​និង​ការលេង​ភ្លេង​របស់​ប្អូនៗ និស្សិត​ដែល​សិក្សា​ជា​ភាសា​បារាំង​មកពី​សាកលវិទ្យាល័យ​នានា នៅក្នុង​រាជធានី​ភ្នំពេញ និង​អង្គការ​ភាព​ញញឹម នៃ​កុមារ ដើម្បី​ញ៉ាំង​បរិយាកាស​នៃ​ការប្រកួត​អោយ​កាន់តែ​ឱឡារិក​និង​សប្បាយរីករាយ​។​

​និស្សិត​ដែល​ទទួលបាន​ជ័យលាភី​ក្នុងការ​ប្រកួត​នេះ គឺ​ជ័យលាភី​លេខ​១ បាន​ទៅលើ​ក្រុមនិស្សិត​មកពី​សាកលវិទ្យាល័យ​ភូមិន្ទ​វិចិត្រសិល្បៈ​, និស្សិត​សាកលវិទ្យាល័យ​ភូមិន្ទ​ភ្នំពេញ​ជ័យលាភី​លេខ​២ និង​សាកលវិទ្យាល័យ​ភូមិន្ទ​នីតិសាស្ត្រ​និង​វិទ្យាសាស្ត្រ​សេដ្ឋកិច្ច បាន​ចំណាត់ថ្នាក់​លេខ​៣៕L