ប្រមុខ​ធនាគារពិភពលោក និង អង្គការ IMF ជំ​រុញឱ្យ​អាមេរិក និង​ចិន​អនុវត្តតាម​ច្បាប់ពាណិជ្ជកម្ម​

401

​ប្រមុខ​ធនាគារពិភពលោក​និង​អង្គការ​មូលនិធិ​រូបិយវត្ថុ​អន្តរជាតិ (IMF) កាលពី​ថ្ងៃ​ព្រហស្បតិ៍​ទី​១១​តុលា​បាន​ជំ​រុញឱ្យ​សហរដ្ឋអាមេរិក​និង​ចិន​អនុវត្តតាម​ច្បាប់ពាណិជ្ជកម្ម​ពិភពលោក​និង​បន្ថយ​ជម្លោះ​ជុំវិញ​យុទ្ធសាស្ត្រ​អភិវឌ្ឍន៍​បច្ចេកវិជ្ជារ​បស់​រដ្ឋាភិបាល​ក្រុង​ប៉េកាំង ដែល​គំរាម​ធ្វើឱ្យ​ខូចខាត​ដល់​សេដ្ឋកិច្ចពិភពលោក​ទាំង​មូល​។​

​លោកស្រី គ្រីស្ទី​ន ឡា​ហ្គា​ត នាយក​គ្រប់គ្រង​អង្គការ IMF បាន​និយាយថា លោកស្រី​នឹង​ផ្តល់យោបល់​ដល់​ប៉េកាំង​និង​វ៉ាស៊ីនតោន​ដើម្បី​ធ្វើ​ចិត្ត​ឱ្យ​ត្រជាក់ ដោះស្រាយ​បញ្ហា​ប្រព័ន្ធ​ពាណិជ្ជកម្ម​ពិភពលោក ដែល​ត្រូវការ​ការជួសជុល និង “​កុំ​ធ្វើឱ្យ​វា​ខូច​”​។​

​លោកស្រី​ឡា​ហ្គា​ត​និង​ប្រធាន​ធនាគារពិភពលោក លោក ជី​ម យ៉ុង​គីម បាន​ថ្លែង​ដាច់ដោយឡែក​ពីគ្នា​នៅ​ខាងក្រៅ​កិច្ចប្រជុំ​ប្រចាំឆ្នាំ​របស់​អ្នកផ្តល់​ប្រាក់កម្ចី​នៅក្នុង​រមណីយដ្ឋាន​តំបន់​ត្រូពិច​លើ​កោះ​បាលី​របស់​ឥណ្ឌូនេស៊ី​។ ព្រឹត្តិការណ៍​នេះ​បាន​ប្រមូល​ផ្តុំគ្នា​នូវ​រដ្ឋមន្ត្រី​ហិរញ្ញវត្ថុ​និង​ធនាគារកណ្តាល​ពី​ប្រទេស​ជាច្រើន ចំពេល​មានការ​រឹតបន្តឹង​សន្ដិសុខ​យ៉ាងរឹងមាំ​។ កងកម្លាំងប្រដាប់អាវុធ​បាន​តម្រៀប​ជា​ជួរ​នៅតាម​ឆ្នេរ ហើយ​ផ្លូវ​ចូលទៅ​កាន់​តំបន់​នោះ​ត្រូវបាន​គ្រប់គ្រង​យ៉ាង​តឹងរ៉ឹង​។​

​នៅពេល​សួរ​អំពី​ជម្លោះ​កាន់តែខ្លាំង​ឡើង​រវាង​សហរដ្ឋអាមេរិក​និង​ចិន លោកស្រី​ឡា​ហ្គា​ត​បាន​និយាយថា​រហូតមកទល់​ពេលនេះ​មិនមាន “​ផលវិបាក​” នៃ​ការខូចខាត​ធំៗ​ពី​ការ​វាយ​ពន្ធ​ពិន័យ​រវាង​ប្រទេស​ទាំង​២​លើ​ការនាំចេញ​របស់​គ្នា​ទៅវិញទៅមក​នៅឡើយ​ទេ ប៉ុន្តែ​វា​បានធ្វើឱ្យ​ប៉ះពាល់​ដល់ “​អ្នក​ឈរ​មើល​ដែល​គ្មាន​កំហុស​”​។​

​លោកស្រី​ឡា​ហ្គា​ត​បាន​និយាយថា ដំបូន្មាន​របស់លោក​ស្រី​មាន​៣​ផ្នែក​គឺ “​បន្ថយ​ជម្លោះ​។ ជួសជុល​ប្រព័ន្ធ​ពាណិជ្ជកម្ម​។ កុំ​ធ្វើឱ្យ​វា​ខូច​”​។​

​លោកស្រី​បាន​និយាយថា អង្គការ​ពាណិជ្ជកម្ម​ពិភពលោក នៅ​ទីក្រុង​ហ្សឺ​ណែវ ដែលជា​អ្នកបង្កើត​ច្បាប់ពាណិជ្ជកម្ម គឺមាន​វិធី​ដោះស្រាយ​ការតវ៉ារ​របស់​សហរ​ដ្ឋ​អាមេរិក​ដែលថា គោលនយោបាយ​របស់​ចិន​គឺ​កំពុង​កេង​យកចំណេញ​ផ្នែក​បច្ចេកវិជ្ជា​ទំនើប​យ៉ាង​អយុត្តិធម៌ និង​កំពុង​ធ្វើឱ្យ​ក្រុមហ៊ុន​បរទេស​មានគុណ​វិបត្តិ​ក្នុងការ​ជំរុញ​វិស័យ​ឧស្សាហកម្ម​របស់ខ្លួន​។ ប៉ុន្តែ​លោកស្រី​បាន​បន្ថែមទៀតថា អង្គការ​ពាណិជ្ជកម្ម​ពិភពលោក​ត្រូវធ្វើ​ការដោះស្រាយ​បញ្ហា​ជាច្រើន​ទៀត ដូចជា ការឧបត្ថម្ភ​ធន​។​

​លោក​គីម​វិញ​បាន​និយាយថា ធនាគារពិភពលោក​កំពុងធ្វើការ​ជាមួយ​បណ្តា​ប្រទេស​កំពុង​អភិវឌ្ឍ​ដើម្បី​ត្រៀម​សម្រាប់​ភាព​យ៉ាប់យ៉ឺន​កាន់តែខ្លាំង​ជាងនេះទៀត​។ លោក​បន្តថា ប្រសិនបើ​ការ​វាយ​ពន្ធ​ត្រូវបាន​អនុវត្ត​ចំពោះ​ដែន​កំណត់​ចុងក្រោយ​បំផុត​របស់​ពួកគេ នោះ​នឹងមាន “​ការថយចុះ​សេដ្ឋកិច្ច​យ៉ាងច្បាស់​ក្រឡែត ហើយ​ផលប៉ះពាល់​មកលើ​ប្រទេស​កំពុង​អភិវឌ្ឍ​នឹងមាន​សភាព​ធំធេង​”៕ ដោយ៖ កញ្ញាដាលីស

លោកស្រី គ្រីស្ទី​ន ឡា​ហ្គា​ត នាយក​គ្រប់គ្រង​អង្គការ IMF