ប្រមុខ​អង្គការសហប្រជាជាតិ​នឹង​ស្វែងរក​វឌ្ឍនភាព​អំពី​កូរ៉េខាងជើង​ក្នុងអំឡុង​ជួបជុំ​របស់​ក្រុម​មេដឹកនាំ​ពិភពលោក​

2817
ចែករម្លែក

​លោក Antonio Guterres អគ្គលេខាធិការ​អង្គការសហប្រជាជាតិ​បាន​និយាយ​កាលពី​ថ្ងៃ​ចន្ទ​ទី​២០​សីហា​ថា​លោក​គ្រោង​នឹង​ពិភាក្សា​អំពី​មធ្យោបាយ​នានា​ដើម្បី​លើក​ទឹក​​ចិត្ត​ដល់​ការលុបបំបាត់​នុយគ្លេអ៊ែ​រ​នៅ​ឧបទ្វីប​កូរ៉េ​ក្នុងអំឡុង​កិច្ចប្រជុំ​នៃ​ក្រុម​មេដឹកនាំ​ពិភពលោក​នៅ​ខែក្រោយ​នៅឯ​អង្គការសហប្រជាជាតិ​។​

​លោក Antonio Guterres បាន​ស្វាគមន៍​ចំពោះ​ការរៀបចំ​ឱ្យមាន​ការជួបជុំ​គ្រួសារ​កូរ៉េ​ទាំង​២ ដែល​បានចាប់ផ្តើម​កាលពី​ថ្ងៃ​ចន្ទ​ជា​លើកដំបូង ដែល​បាន​ធ្វើឡើង​ក្នុង​រយៈ​​ពេល​៣​ឆ្នាំ​ចុង​ក្រោយនេះ បន្ទាប់ពី​ទំនាក់ទំនង​ការទូត​មាន​ភាពល្អ​ប្រសើរឡើង​នៅ​ឧបទ្វីប​នេះ​។​

​កាលពី​ថ្ងៃ​ចន្ទ សមាជិកគ្រួសារ​កូរ៉េខាងជើង​និង​កូរ៉េខាងត្បូង​ដែល​បែក​គ្នា​ក្នុង​សង្គ្រាម​កូរ៉េ​បាន​ជួបគ្នា​នៅ​ប្រទេស​កូរ៉េខាងជើង​។​

​អ្នកនាំពាក្យ​របស់​អគ្គ​លេខាធិការ​អង្គការសហប្រជាជាតិ បាន​និយាយ​នៅក្នុង​សេចក្តីថ្លែងការណ៍​មួយ​ថា​” លោក Antonio Guterres សង្ឃឹមថា​ការរៀបចំ​ឱ្យមាន​ការជួប​មុខ​​គ្នា​នៃ​ក្រុមគ្រួសារ​កូរ៉េ​បែបនេះ នឹង​ក្លាយជា​ការរៀបចំ​ឱ្យមាន​ការជួបគ្នា​ជាធម្មតា​នៅពេល​អនាគត និង​ស្វាគមន៍​កិច្ច​ខំប្រឹងប្រែង​ដោយ​កូរ៉េ​ទាំង​២​ដើម្បី​បន្ត​ទំនាក់ទំនង​​ល្អ​របស់​ពួកគេ និង ដើម្បី​កសាង​ទំនុកចិត្ត​និង​ការជឿជាក់​គ្នា​”​។​

​លោក Antonio Guterres បាន​និយាយថា លោក​សង្ឃឹមថា​នឹងមាន​ការពិភាក្សាគ្នា​អំពី​មធ្យោបាយ​ដែល​លោក អាចជួយ​ដល់​ភាគី​នានា​បន្ថែមទៀត​នៅក្នុង​កិច្ច​ខំប្រឹងប្រែង​ផ្នែក​ការទូត​របស់​ពួកគេ​ដើម្បី​នាំមក​នូវ សន្តិភាព សន្តិសុខ និង ការរំលាយចោល​អាវុធ​នុយក្លេអ៊ែរ​ទាំងស្រុង​នៅ​ឧបទ្វីប​កូរ៉េ ក្នុងអំឡុងពេល​មាន​មហាសន្និបាត​អង្គការសហប្រជាជាតិ​នៅពេល​ឆាប់​ខាង​មុននេះ​។​

​ប្រធានាធិបតី​អាមេរិក លោក​Donald Trump គ្រោង​នឹងចូលរួម​កិច្ចប្រជុំ​នៃ​ក្រុម​មេដឹកនាំ​ពិភពលោក​នេះ​នៅ​ទីស្នាក់ការ​ធំ​របស់​អង្គការសហប្រជាជាតិ​នៅ​ទីក្រុង​ញូវយ៉ក ​ដែល​ចាប់ផ្តើម​នៅ​ថ្ងៃទី​២៦​ខែកញ្ញា​ខាងមុខនេះ ស្រប​ពេលដែល ប្រធានាធិបតី​កូរ៉េខាងត្បូង លោក Moon Jae-in និង​រដ្ឋមន្ត្រីការបរទេស​កូរ៉េខាងជើង លោក Ri Yong Ho នឹងចូលរួម​ផងដែរ​៕​ដោយ​៖​សុខា​/sn

​លោក Antonio Guterres អគ្គលេខាធិការ​អង្គការសហប្រជាជាតិ​