ប្រយុទ្ធនឹងកូវីដ១៩ ក្រុមគ្រូពេទ្យជំនាញមកបាញ់ថ្នាំសម្លាប់មេរោគនៅក្នុងបរិវេណវិមានរដ្ឋសភា

89
ចែករម្លែក

ដោយៈសុផល/ភ្នំពេញ ៖ ជាវិធានការមួយ ក្នុងចំណោមវិធានការផ្សេងៗទៀត ក្នុងការការពារការឆ្លងរាលដាលនៃមេរោគកូវីត១៩ ក្រុមគ្រូពេទ្យជំនាញនៃក្រសួងសុខាភិបាល បានចុះមកបាញ់ថ្នាំសម្លាប់មេរោគ នៅក្នុងបរិវេណវិមានរដ្ឋសភា នារសៀលថ្ងៃទី២៥ ខែមីនា ឆ្នាំ២០២០។

ការចុះបាញ់ថ្នាំសម្លាប់មេរោគរបស់ក្រុមគ្រូពេទ្យជំនាញ នៅវិមានរដ្ឋសភាពេលនេះ គឺដើម្បីការពារសុខសុវត្ថិភាពពីការឆ្លងមេរោគ កូវីត១៩ ជូនថ្នាក់ដឹកនាំ និងសមាជិក សមាជិការដ្ឋសភា ព្រមទាំងមន្ត្រីរាជការនៃអគ្គលេខាធិការដ្ឋានរដ្ឋសភាក៏ដូចជាភ្ញៀវដែលមានភារកិច្ចចាំបាច់បំផុតត្រូវអញ្ជើញមកកាន់វិមានរដ្ឋសភាជាដើម។

ក្រៅពីការបាញ់ថ្នាំសម្លាប់មេរោគនេះ ស្ថាប័នរដ្ឋសភា ក៏បានចាត់វិធានការផ្សេងៗមួយចំនួនទៀតសម្រាប់ការការពារការឆ្លងរាលដាលនៃមេរោគកូវីត១៩ នេះដែរ ដូចជា ការប្រើឧបករណ៍វាស់កម្ដៅសម្រាប់អ្នកចូលក្នុងវិមានរដ្ឋសភានៅគ្រប់ច្រកចូលទាំងអស់។

ផ្ដល់ទឹកលាងសម្លាប់មេរោគ ទុកជូនលាងសម្អាតដៃនៅគ្រប់ច្រកចូល និងតាមទីតាំងជាច្រើនទៀតក្នុងអគ្គលេខាធិការដ្ឋានរដ្ឋសភា។ ផ្ដល់សាប៊ូទុកសម្រាប់លាងដៃនៅគ្រប់ទីតាំងបន្ទប់ទឹក។ការចរាចរណ៍ឯកសារផ្សេងៗ គឺធ្វើឡើងតាមរយៈអនឡាញនិងណែនាំមន្ត្រីត្រូវការពារសុខភាពទៅតាមសេចក្ដីណែនាំរបស់ក្រសួងសុខាភិបាលផងដែរ៕/B