ផ្លូវ​ល្បឿន​លឿន ភ្នំពេញ​-​ព្រះសីហនុ សាង​ប្រវត្តិសាស្ត្រ​សម័យ​តេ​ជោ​

454
ចែករម្លែក

គម្រោង​ផ្លូវ​ល្បឿន​លឿន ភ្នំពេញ​-​ព្រះសីហនុ ចម្ងាយ​ជាង ១៩០ គីឡូម៉ែត្រ​បាន​បើកការដ្ឋាន​សាងសង់​កាលពី​ព្រឹក​ថ្ងៃទី​២២ ខែមីនា ឆ្នាំ​២០១៩​។ គម្រោង​ជា​ប្រវត្តិ​មួយ​នេះ វិនិយោគ​ដោយ​ក្រុមហ៊ុន​ប្រមាណ ២.០០០​លាន​ដុល្លារ និង​ចំណាយពេល​សាងសង់​បួន​ឆ្នាំ ​ក្រោមរូបភាព សាងសង់ ធ្វើ​អាជីវកម្ម និង​ផ្ទេរ ហៅ​កាត់​ថា ប៊ី​អូ​ធី (BOT ) ក្នុង​រយៈពេល ៥០​ឆ្នាំ​។​

​នៅពេល​សាងសង់​រួចរាល់​នៅ​ខែមីនា​ឆ្នាំ​២០២៣ ផ្លូវ​ល្បឿន​លឿន ដែល​ពុំ​ធ្លាប់មាននៅ​កម្ពុជា​នេះ តាម​សំណើ​របស់​រាជរដ្ឋាភិបាល​កម្ពុជា​ពេល​ដាក់​ឲ្យ​ដំណើរការ​នោះ ក្រុមហ៊ុន​ចិន ក៏បាន​ឯកភាព មិន​យក​ថ្លៃ​យានយន្ត​គ្រប់​ប្រភេទ ដែល​បើកបរ​លើផ្លូវល្បឿន​លឿន​នេះ ក្នុង​រយៈពេល​មួយខែ​ដំបូង និង​បញ្ចុះតម្លៃ​២០​ភាគរយ​សម្រាប់​រយៈពេល​មួយឆ្នាំ​ថែមទៀត​។ លើសពីនេះ​ទៀត ក្រុមហ៊ុន​បាន​យល់ព្រម​កែសម្រួល​កម្រៃ សេវា​ឆ្លងកាត់ ក្នុង​រយៈពេល​ប្រាំ​ឆ្នាំ​ម្តង នៃ​ប្រតិ​ប​តិ្ត​ការ​អាជីវកម្ម​របស់ខ្លួន​ផងដែរ​។​

​គម្រោង​សាងសង់​ផ្លូវ​ល្បឿន​លឿន​ភ្នំពេញ​-​ក្រុងព្រះសីហនុ​មាន​ប្រវែង​សរុប​ជាង ១៩០​គីឡូម៉ែត្រ ត​ភ្ជាប់​ពី​ភូមិ​១ សង្កាត់​សំរោងក្រោម ខណ្ឌ​ពោធិ៍​សែន​ជ័យ រាជធានី​ភ្នំពេញ ដល់​ភូមិ​១ សង្កាត់​លេខ​៣ ក្រុងព្រះសីហនុ​។ ផ្លូវ​នេះ​ឆ្លងកាត់​រាជធានី ភ្នំពេញ ប្រវែង ៨,៣០ គីឡូម៉ែត្រ ខេត្តកណ្តាល ប្រវែង ៩,១០​គីឡូម៉ែត្រ​ខេត្តកំពង់ស្ពឺ ប្រវែង ៨០,៨០​គីឡូម៉ែត្រ ខេត្តកោះកុង ប្រវែង ១,៩២ គីឡូម៉ែត្រ និង​ខេត្ត​ព្រះសីហនុ ប្រវែង ៨៩,៨៩ គីឡូម៉ែត្រ​។​

​ផ្លូវ​ល្បឿន​លឿន​ភ្នំពេញ​-​ព្រះសីហនុ ត្រូវ​សាងសង់​មាន​ទទឹង​រហូតដល់ ២៤,៥ ម៉ែត្រ ដោយ​ក្រាល​បេតុង​កៅស៊ូ (AC) កម្រាស់ ១០​សង់ទីម៉ែត្រ និង​មាន​ទទឹង ២៣​ម៉ែត្រ ដែល​ក្នុងនោះ រួមមាន​៖ គន្លង​ផ្លូវ ធ្វើចរាចរ សម្រាប់​រថយន្ដ មាន​ទទឹង ១៥ ម៉ែត្រ ចែកជា ៤​គន្លង (២​គន្លង ទៅ ២​គន្លង​មក​) ដែល​គន្លង​នីមួយៗ មាន​ទទឹង ៣,៧៥​ម៉ែត្រ ដែល អនុញ្ញាតឱ្យ​យានយន្ត​គ្រប់​ប្រភេទ អាច​បើកបរ​ក្នុង​ល្បឿន​រហូតដល់ ១០០​គីឡូម៉ែត្រក្នុង​មួយ​ម៉ោង និង​កន្លែង​ខ្លះ អាច​ដល់ ១២០​ ​​ ​គីឡូម៉ែត្រក្នុង​មួយ​ម៉ោង​។ ផ្លូវ​នេះ​ក៏​បំពាក់​គ្រឿង បរិក្ខារ​ផ្លូវថ្នល់ រួមមាន ស្លាក​សញ្ញា​ចរាចរណ៍ ភ្លើង​សញ្ញា​ចរាចរណ៍ និង​គំនូស​សញ្ញា ចរាចរណ៍ តាម​ស្តង់ដារ​ត្រឹមត្រូវ​។​

​ជាការ​ពិត សមិទ្ធផល​ផ្លូវ​ល្បឿន​លឿន ពី​ភ្នំពេញ ទៅកាន់​ខេត្ត​ព្រះសីហនុ លើ​គម្រោងថវិកា ពីរពាន់​លាន​ដុល្លារ ដែល​ចាប់ផ្តើម​បើក​ការដ្ឋាន​សាងសង់​កាលពី​ថ្ងៃទី​២២ ខែមីនា គឺ​នឹង​ជួយ​ពង្រឹង​សេដ្ឋកិច្ចជាតិ​កម្ពុជាឲ្យ​កាន់តែ​រឹងមាំ​។​

​ខេត្ត​ព្រះសីហនុ ជា​ប៉ូល​សេដ្ឋកិច្ច​ទី​២ បន្ទាប់ពី​ភ្នំពេញ​។ បច្ចុប្បន្ន ខេត្ត​ព្រះសីហនុ ក៏​កំពុង​រីកចម្រើន​យ៉ាងគំហុក ដោយសារ​កំណើន​វិនិយោគ ពិសេស​អ្នកវិនិយោគ​ចិន ចូលមក​កាន់តែច្រើន​។ អគារ​ខ្ពស់ៗ ក៏ត្រូវ​បាន​សាងសង់​យ៉ាងច្រើន​រាប់មិនអស់​។​

​ក្រៅពីនេះ ខេត្ត​ព្រះសីហនុ ក៏មាន​កំពង់ផែ​ស្វយ័ត​ដែលជា​ការនាំចេញ​នាំចូល​ទំនិញគ្រប់​ប្រទេស​ដ៏​ធំ​របស់​កម្ពុជា​។ ការដឹកនាំ​ជញ្ជូន​ដ៏​មមាញឹក ទាំង​ផ្លូវគោក តាមផ្លូវ​ជាតិ លេខ​៤ និង​តាមផ្លូវ​រថភ្លើង ដែល​មួយថ្ងៃៗ ទំនិញ​រាប់លាន​តោន បាន​ឆ្លងកាត់​កំពង់ផែ ស្វយ័ត​ខេត្ត​ព្រះសីហនុ​។​

​ខេត្ត​ព្រះសីហនុ​ក៏​ជា​ប៉ូល​ទេសចរណ៍​ដ៏​សំខាន់ៗ​របស់​កម្ពុជា​បន្ទាប់ពី​ភ្នំពេញ​និង​ខេត្តសៀមរាប​។ ក្រៅពី​ការធ្វើដំណើរ​តាមផ្លូវ​គោក តាម​រថយន្ត និង​តាម​រថភ្លើង នៅ​ខេត្ត ព្រះសីហនុ ក៏មាន​ព្រលានយន្តហោះ​កងកេង បានទទួល​អ្នកទេសច​រ​ជាតិ​-​អន្តរជាតិ និង​អ្នកវិនិយោគ មិនតិច​នោះទេ​។​

​ប៉ុន្តែ​នៅពេល​ផ្លូវ​ល្បឿន​លឿន ត្រូវបាន​សាងសង់​រួចរាល់ នៅ​ខែមីនា ឆ្នាំ​២០២៣ នោះ​កាន់តែ​ធ្វើ​ឲ្យ​ប៉ូល​សេដ្ឋកិច្ច និង​ប៉ូល​ទេសចរណ៍​មាត់សមុទ្រ​របស់​កម្ពុជា កាន់តែ​ខិតជិត​ភ្នំពេញ​មួយកម្រិត​ទៀត​។​

​ជាមួយនឹង​ការវិនិយោគ​របស់​ក្រុមហ៊ុន​ចិន​នេះ ប្រមុខ​រាជរដ្ឋាភិបាល​កម្ពុជា ក៏បាន ប្រកាស​ស្វាគមន៍ និង​ទទួល​រាល់​អ្នកវិនិយោគ​បរទេសមកពី​គ្រប់ទិសទី​ដោយ​គ្មាន ការរើសអើង ឲ្យ​តែ​ចូលមក​វិនិយោគ​នៅ​កម្ពុជា ហើយ​លើ​វិស័យ​ណាក៏ដោយ​។

​សព្វថ្ងៃនេះ ព័ត៌មាន​ចុះផ្សាយ​មិន​លោះ​ថ្ងៃ​នោះទេ​ដោយសារតែ​កំណើន​រីកចម្រើន យ៉ាងគំហុក ពិសេស​ការដឹកនាំ​ជញ្ជូន​ទំនិញ​តាម​រថយន្ត និង​ជាពិសេស​នៅ​ផ្លូវជាតិ លេខ​៤ ក៏​ដូច​ផ្លូវជាតិ​លេខ​៣ រវាង​ភ្នំពេញ និង​ខេត្ត​ព្រះសីហនុ​បាន​បង្ក​ឲ្យ​មាន​គ្រោះថ្នាក់ជាយ​ហេតុ បណ្តាល​ឲ្យ​ស្លាប់ និង​របួស​ជា​ញឹកញាប់ ពិសេស​តាមផ្លូវ​ជាតិ​លេខ​៤ ដោយសារ​ផ្លូវ​តូច ហើយ​មាន​រថយន្ត​ច្រើន​ឆ្លងកាត់​។​

របាយការណ៍​គ្រោះថ្នាក់​ចរាចរ​បង្ហាញថា គ្រាន់តែ​រយៈពេល​ខែមករា និង​ខែកុម្ភៈ ឆ្នាំ​២០១៩ គ្រោះថ្នាក់​ចរាចរណ៍​ផ្លូវគោក នៅ​ទូទាំងប្រទេស បាន​កើតឡើង​ចំនួន ៦៩៣​លើក បណ្តាល​ឲ្យ​ស្លាប់​ចំនួន​៣១០ នាក់ និង​របួស​ចំនួន ១.០៧៧​នាក់​។ ចំនួន​ជនរងគ្រោះ ជា​មធ្យម ក្នុង​មួយថ្ងៃ ស្លាប់​ចំនួន​ជាង ៥ នាក់ និង​របួស​ចំនួន ១៨​នាក់ ។​

​គ្រោះថ្នាក់​ចរាចរ​ផ្លូវគោក ភាគច្រើន កើតឡើង នៅ​រាជធានី​ភ្នំពេញ ខេត្តកណ្តាល និង​ខេត្តកំពង់ស្ពឺ ហើយ​ច្រើនជាងគេ កើតឡើង​លើផ្លូវ​ជាតិ​លេខ​៤​រវាង​ភ្នំពេញ​-​កណ្តាល -​ខេត្តកំពង់ស្ពឺ​-​កោះកុង និង​ខេត្ត​ព្រះសីហនុ​។ មូលហេតុ​នៃ​គ្រោះថ្នាក់​ចរាចរណ៍ គឺ​ការបើកបរ​លើស​ល្បឿន មិន​គោរព​សិទ្ធិ និង​មិន​ប្រកាន់​ស្តាំ ជាដើម​។

​ដូច្នេះហើយ នៅពេល​ផ្លូវ​ល្បឿន​លឿន ភ្នំពេញ​-​ខេត្ត​ព្រះសីហនុ ធ្វើ​រួចរាល់ គឺ​អត្រា គ្រោះថ្នាក់​ចរាចរ​ផ្លូវគោក តាមផ្លូវ​ជាតិ​លេខ​៤ នឹងត្រូវ​កាត់បន្ថយ ព្រោះថា ផ្លូវ​ល្បឿន លឿន ភ្នំពេញ​-​ខេត្ត​ព្រះសីហនុ នឹងត្រូវ​សាងសង់ឡើង ដោយមាន​ទ្រូងផ្លូវ ជា​សួន ពុះ​កណ្តាល ចែកផ្លូវ​ជា​ពីរ ទំហំ ៣​ម៉ែត្រ ដោយ​មិន​ឲ្យ​ឆ្លង​បញ្ច្រាសទិស​គ្នា ដូច​ផ្លូវ ជាតិ​លេខ​៤ សព្វថ្ងៃ​ទេ​។ ក្នុងនោះ ផ្លូវ​ថ្មី​នេះ មាន​ចម្ងាយ​តិចជាង​ផ្លូវជាតិ​លេខ​៤ ហើយក៏​មិន​អនុញ្ញាត​ឲ្យ​មានការ​ឆ្លងកាត់​ទទឹង​ផ្លូវ​ដែល​អាច​បង្ក​ជា​គ្រោះថ្នាក់​ជាយហេតុ​នោះដែរ​។​

​សរុបមក ការវិនិយោគ​របស់​ក្រុមហ៊ុន​ចិន លើផ្លូវ​ល្បឿន​លឿន ភ្នំពេញ​-​ព្រះសីហនុ ក្នុង​រយៈពេល ៥០​ឆ្នាំ ដោយ​យកលុយ​ពី​អ្នកដំណើរ​ក៏ដោយ ក៏​ផ្លូវ​ថ្មី​ជា​ប្រវត្តិសាស្ត្រ ពុំ​ធ្លាប់​មាននៅ​កម្ពុជា នឹងចូលរួម​បន្ថែមទៀតក្នុងការ​ពង្រឹង​សេដ្ឋកិច្ចជាតិ​កម្ពុជា ឲ្យ​កាន់តែ​រឹងមាំ ព្រមទាំង​ចូលរួម​កាត់បន្ថយ​គ្រោះថ្នាក់​ចរាចរ នៅ​កម្ពុជា​ដែល​កំពុង សម្លាប់​មនុស្ស​យ៉ាងហោចណាស់ ជា​មធ្យម​ជាង ៥​នាក់ និង​របួស​ប្រមាណ ១៨ នាក់ ក្នុង មួយថ្ងៃៗ​៕ ដោយៈ ម៉េង​ឆៃ​/Ha