ពិធីបុណ្យ​អុំទូក​ខាងមុខ សាលាក្រុង​ភ្នំពេញ​គ្រោង​ពង្រាយ​បន្ទប់ទឹក​និង​ធុងសំរាម​ប្រមាណ​២០០០​កន្លែង​

999
ចែករម្លែក

​ដោយ : ពៅ និមល / ភ្នំពេញ : សាលា​រាជធានី​ភ្នំពេញ​បាន​ឲ្យ​ដឹងថា ក្នុងឱកាស​ព្រះរាជ​ពិធីបុណ្យ​អុំទូក​នា​សប្តាហ៍​ខាងមុខ នឹងដាក់​ពង្រាយ​បន្ទប់ទឹក​ប្រមាណ​ជិត​៥០០​បន្ទប់ និង​ធុងសម្រាម​ចំនួន​១.៦០០​ធុង សរុប​ប្រមាណ​២.១០០​ក្នុង​ទីតាំង​សំខាន់ៗ​ផ្សេងគ្នា ដែល​ប្រារព្ធ​ពិធី​នេះ​ឡើង​។​

រូបឯកសារ

​លោក ម៉េ​ត មាស​ភក្តី អ្នកនាំពាក្យ​សាលា​រាជធានី​ភ្នំពេញ បាន​ប្រាប់​កាសែត​រស្មី​កម្ពុជា​នៅ​រសៀល​ថ្ងៃទី​១៦ ខែវិច្ឆិកា ឆ្នាំ​២០១៨​ថា ការគ្រោង​ដាក់ពង្រាយ​ធុងសំរាម​ជាច្រើន​ខាងលើនេះ​ក្នុង​គោលបំណង​គ្រប់គ្រង​បញ្ហា​សំរាម​ឲ្យ​ល្អប្រសើរ ក្នុងនោះ​ក៏​នឹងមាន​ការចុះ​ផ្សព្វផ្សាយ​ចំនួន​០២​ដង ដើម្បី​ឲ្យ​ប្រជាពលរដ្ឋ​បាន​យល់ដឹង​ពី​ការគ្រប់គ្រង​សំរាម​ផងដែរ​។ ដោយឡែក បញ្ហា​បង្គន់​អនាម័យ​គឺ​ដើម្បី​ជួយ​សម្រួល​ដល់​ភ្ញៀវទេសចរ​ជាតិ​អន្តរជាតិ ក៏ដូចជា​ក្រុម​កីឡាករ​ចំណុះ​ទូក​បង្ករ​ភាពងាយស្រួល​ដល់​ពួកគាត់ ដោយ​ក្នុងនោះ​មាន​ទាំង​បន្ទប់ទឹក​ថ្ម បន្ទប់ទឹក​ចល័ត និង​បន្ទប់ទឹក​នៅ​ទីតាំង​ស្នាក់នៅ​របស់​កីឡាករ​ចំណុះ​ទូក​សរុប​ទាំងអស់​ប្រមាណ​៥០០​បន្ទប់​។​

​លោកអ្នក​នាំពាក្យ​បាន​លើកឡើងថា ការដាក់​ពង្រាយ​យ៉ាងច្រើន​នេះ​ដោយសារ​កាលពី​ឆ្នាំ​កន្លងទៅ បងប្អូន​ប្រជាពលរដ្ឋ​ដែល​ចូលរួម​ពិធីបុណ្យ​អុំទូក​នៅ​ក្រុងភ្នំពេញ​មាន​រហូតដល់​ប្រមាណ​០១​លាន​នាក់​កន្លះ ក្នុង​មួយថ្ងៃ​។ ហើយ​ឆ្នាំនេះ​ចំណុះ​ជើង​ជូ​ក​ក៏មាន​ការកើនឡើង​ផងដែរ ដែល​កើន​ដល់​ចំនួន​២៩៨​ទូក ស្មើនឹង​ជាង​០២​ម៉ឺន​នាក់​។​

រូបឯកសារ

​លោក ភក្តី បានធ្វើការ​រម្លឹក​ពី​ភាព​រីកចម្រើន​និង​អ៊ូរ​អ៊​រ​សព្វថ្ងៃនេះ គឺ​កើតចេញពី​ប្រទេស​ដែល​គ្មាន​សង្គ្រាម សុខសន្តិភាព ភាពសម្បូរ​សប្បាយ ពិសេស​មាន​ថ្នាក់ដឹកនាំ​ដ៏​ល្អ​របស់​សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា ទើប​ធ្វើ​ឲ្យ​ប្រទេសជាតិ​កាន់តែ​មានការ​អភិវឌ្ឍ​ទៅមុខ​បន្តទៀត​។ ទន្ទឹមនេះ លោក​ក៏បាន​អំពាវនាវ​បន្ថែម​ទៅដល់​ប្រជាពលរដ្ឋ​ទាំងអស់​ចូលរួម​ក្នុង​ពិធីបុណ្យ​អុំទូក ចូលរួម​គោរព​ច្បាប់​ចរាចរ​រណ៍ ចេះ​អធ្យាស្រ័យ​គ្នា​ទៅវិញទៅមក​និង​នាំ​ការសប្បាយ​ត្រឡប់ទៅផ្ទះ​វិញ​ដោយ​សុវត្ថិភាព និង​គិតគូរ​ទុកដាក់​ឲ្យ​បាន​ត្រឹមត្រូវ​មុននឹង​ចាក​ចេញពីផ្ទះ​ទៅ​តំបន់​ណាមួយ ចៀសវាង​កើតឡើង​ជាយថាហេតុ​ណាមួយ​ក្នុង​គ្រួសារ​។

ព្រះរាជពិធីបុណ្យអុំទូកនឹងប្រារព្ធឡើងរយៈពេល០៣ថ្ងៃជាប់គ្នា ចាប់ពីថ្ងៃទី២១ដល់២៣ ខែវិច្ឆិកា ឆ្នាំ២០១៨ខាងមុខ៕