មន្ត្រីជាន់ខ្ពស់​ពីររូប​រំពឹងថា ការផ្តល់សេវា​សាធារណៈ​ក្នុង​ខេត្តពោធិ៍សាត់​កាន់តែ​ល្អប្រសើរ​ឡើង ក្រោយ​ផ្លាស់ប្តូរ​ប្រធាន​មន្ទីរ​ពាណិជ្ជកម្ម​ថ្មី

861
ចែករម្លែក

ដោយ​: ពៅ និមល / ភ្នំពេញ​: ដើម្បី​រួមចំណែក​និង​អនុវត្ត​យុទ្ធសាស្ត្រ​កំណែទម្រង់​ការងារ​រប​ស់រាជ​រដ្ឋាភិបាល ពិសេស​ការផ្តល់​សេវាសាធារណៈ​ជាមួយ​វិស័យ​ឯកជន ត្រូវបាន​មន្ត្រីជាន់ខ្ពស់​នៃ​កម្ពុជា​ចំនួន​ពីររូប​រំពឹងទុក​ថា វិស័យ​ពាណិជ្ជកម្ម​នៅក្នុង​ខេត្តពោធិ៍សាត់​នឹង​កាន់តែ​ល្អប្រសើរ​បន្តទៀត ក្រោយ​ផ្លាស់ប្តូរ​ប្រធាន​មន្ទីរ​ខេត្ត​ថ្មី​។​

​មានប្រសាសន៍​ក្នុង​ពិធី​ប្រកាស​ចូលកាន់​មុខតំណែង​ប្រធាន​មន្ទីរ​ពាណិជ្ជកម្ម​ថ្មី​ប្រចាំខេត្ត​ពោធិ៍សាត់ កាលពី​រសៀល​ថ្ងៃទី​០២ ខែកក្កដា ឆ្នាំ​២០១៨​កន្លងទៅ លោក ប៉ាន សូរ​ស័ក្តិ រដ្ឋមន្ត្រីក្រសួង​ពាណិជ្ជកម្ម បាន​លើកឡើងថា ការតែងតាំង​ថ្នាក់ដឹកនាំ​ថ្មី​របស់​មន្ទីរ​ពាណិជ្ជក​ម្ម​ខេត្តពោធិ៍សាត់ គឺជា​ភស្តុតាង​ដែល​បញ្ជាក់​ពី​ការចូលរួម​របស់​ក្រសួងពាណិជ្ជកម្ម ក្នុងការ​អនុវត្ត​យុទ្ធសាស្ត្រ​កំណែទម្រង់​វិមជ្ឈការ និង​វិសហមជ្ឈការ ព្រមទាំង​កម្មវិធី​អភិបាលកិច្ច​ល្អ​ដែលជា​ស្នូល​នៃ​យុទ្ធសាស្ត្រ​ចតុកោណ​ដំណាក់កាល​ទី​៣​របស់​រាជរដ្ឋាភិបាល​។​

​ក្នុងឱកាស​នោះ លោក​រដ្ឋមន្ត្រី​បាន​កោតសរសើរ​អតីត​ប្រធាន​មន្ទីរ ដែល​បាន​លះបង់​កម្លាំងកាយ​ចិត្ត ដើម្បី​បំពេញភារកិច្ច​គ្រប់គ្រង និង​ដឹកនាំ​មន្ទីរ​ពាណិជ្ជកម្ម រហូត​ក្លាយទៅជា​អង្គភាព​មួយ​ដែល​ទទួលបាន​ការគាំទ្រ​ពី​វិស័យ​ឯកជន និង​គណៈ​អភិបាលខេត្ដ​គ្រប់​ជំនាន់​។ លោក​ក៏បាន​ថ្លែងអំណរគុណ​ដល់​អាជ្ញាធរខេត្ត​ពោធិ៍សាត់ ដែល​កន្លងមក​បានផ្ដល់​នូវ​កិច្ចសហការ​ល្អ និង​តែង​គាំទ្រ​រាល់​កម្ម​ភាព​របស់​មន្ទីរ​ពាណិជ្ជ​កម្ម ព្រមទាំង​បានស្នើ​លោក​ប្រធាន​មន្ទីរ​ថ្មី​ខិតខំ​យកចិត្តទុកដាក់​បំពេញ​ការងារ​ឲ្យ​បានល្អ ជាពិសេស​ត្រូវ​ពង្រឹង​កិច្ចសហការ​ជាមួយ​មន្ត្រី​កាំកុងត្រូល និង​អាជ្ញាធរខេត្ត ដើម្បី​ចុះ​ត្រួតពិនិត្យ​ទំនិញ​នៅតាម​ទីផ្សារ​ឲ្យ​បាន​ដូច​ភ្លៀងរលឹម ដើម្បី​ការពារ​សុខមាលភាព​ជូន​ប្រជាជន​។

​នៅ​ជាមួយគ្នានេះ លោក ម៉ៅ ធនិន អភិបាលខេត្ត​ពោធិ៍សាត់ បានស្នើ​ដល់​ប្រធាន​មន្ទីរ​ថ្មី​ខិតខំ​ពង្រឹង​ការអភិវឌ្ឍ​សមត្ថភាព​របស់ខ្លួន​ដើម្បី​ដឹកនាំ​មន្ត្រីក្រោមឱវាទ​និង​មន្ទីរ​ពាណិជ្ជកម្ម​ខេត្ត សំដៅ​នាំមក​នូវ​សមិទ្ធផល​ថ្មីៗ​ជូន​ប្រជាជន នង​វិស័យ​ពាណិជ្ជកម្ម​ជាតិ​។ លើសពីនេះ​លោក​អភិបាលខេត្ត ក៏បាន​ស្នើ​មន្ត្រី​មន្ទីរ​ពាណិជ្ជកម្ម​ទាំងអស់ ពង្រឹង​ការផ្តល់​សេវាសាធារណៈ​និង​បម្រើ​ប្រជាពលរដ្ឋ​ឲ្យ​បានល្អ​ទៅមុខ​បន្តទៀត​។​

​សូមបញ្ជាក់ថា ពោធិ៍សាត់ គឺជា​ខេត្ត​មួយ​ដែល​ស្ថិតនៅ​ភាគ​ខាងលិច​នៃ​ប្រទេស​កម្ពុជា អម​ទៅដោយ​បឹង​ទន្លេសាប​ដែលជា​ជង្រុក​ត្រី​ដ៏​ធំ​របស់​កម្ពុជា​។ ក្រៅពី​សម្បូរ​ទៅដោយ​តំបន់​ទេសចរណ៍ធម្មជាតិ និង​រមណីយដ្ឋាន​ប្រណិតៗ ខេត្តពោធិ៍សាត់ ក៏​សម្បូរ​ដោយ​ដី​មាន​ជីជាតិ ដែលមាន​លក្ខណៈ​អំណោយផល​សម្រាប់​វិស័យ​កសិកម្ម ជាពិសេស​ដំណាំ​ស្រូវ​និង​ឈើ​ហូប​ផ្លែ​គ្រប់​ប្រភេទ​៕ ល​