មន្ត្រី​ក្របខណ្ឌ​ក្រសួងមហាផ្ទៃ​ចំនួន​៤៨​នាក់ បានទទួល​ការបណ្តុះបណ្តាល នៅ​ខេត្តសៀមរាប​

735
ចែករម្លែក

ដោយ​: គូលែន / សៀមរាប​: មន្ត្រីរាជការ​ស៊ីវិល​នៃ​ក្រសួងមហាផ្ទៃ​ចំនួន​៤៨​នាក់​ក្នុងនោះ​ស្រី​ចំនួន​១៤​នាក់ ដែល​ប្រឡង​ជាប់​ក្នុង​ឆ្នាំ​២០១៧ បាន​កំពុង​បម្រើ​ការងារ​នៅតាម​អង្គភាព​ក្នុង ខេត្តសៀមរាប , កំពត , កែប , ឧ​ត្ត​រ​មានជ័យ , ព្រះវិហារ និង ខេត្តកោះកុង បានទទួល​ការបណ្តុះបណ្តាល​បឋម​មួយ នៅ​សាលា​ខេត្តសៀមរាប នា​ព្រឹក​ថ្ងៃទី ១៦ ខែតុលា ឆ្នាំ​២០១៨​នេះ ដែល​រៀបចំឡើង​ដោយ​នាយកដ្ឋាន​បណ្តុះបណ្តាល នៃ​អគ្គនាយកដ្ឋាន​រដ្ឋបាល ក្រសួងមហាផ្ទៃ​។​

​លោកស្រី យូ សុភា អភិបាលរង​ខេត្តសៀមរាប បាន​បញ្ជាក់ថា ការអនុវត្ត​កំណែទម្រង់ និង ការអភិវឌ្ឍ​តាមបែប​ប្រជាធិបតេយ្យ​នៅ​ថ្នាក់ក្រោម​ជាតិ គឺ ជា​ដំណើរការ​កំណែទម្រង់​ដែលមាន​ចរិតលក្ខណៈ​ជា​នយោបាយ​ផង និង​រដ្ឋបាល​ផង ក្នុងនោះ​លើ​ផ្នែក​នយោបាយ គឺ​បានរៀបចំ​ឲ្យ​មាន​រដ្ឋបាល​រាជធានី ខេត្ត ក្រុង ស្រុក ខណ្ឌ និង​ឃុំ សង្កាត់ ជា​នីតិបុគ្គល​ដែលមាន​តំណាង​ជា​ក្រុមប្រឹក្សា​កើតឡើង​ពី​ការបោះឆ្នោត​ដោយផ្ទាល់ និង​មិនផ្ទាល់ និង​លើ​ផ្នែក​រដ្ឋបាល គឺ​បានរៀបចំ​ឡើងវិញ​នូវ​រចនាសម្ព័ន្ធ និង​ប្រព័ន្ធគ្រប់គ្រង​រដ្ឋបាល​នៅតាម​ថ្នាក់​នីមួយៗ​នៅ​ថ្នាក់ក្រោម​ជាតិ ព្រមទាំង​បានរៀបចំ​ឲ្យ​រដ្ឋបាល​នីមួយៗ​មាន​បុគ្គលិក មុខងារ និង​ហិរញ្ញវត្ថុ​ផ្ទាល់ខ្លួន​។​

​លោកស្រី យូ សុភា បានបញ្ជាក់​បន្ថែមថា វគ្គ​បណ្តុះបណ្តាល​នេះ ពិតជា​នឹង​ផ្តល់នូវ​ចំណេះដឹង​ជា​មូលដ្ឋាន ដល់​ក្មួយៗ សម្រាប់​ការចាប់ផ្តើម​អាជីព​ជា​មន្ត្រីរាជការ​នៅតាម​រដ្ឋបាល​សាមី ដើម្បី​បម្រើ​សេចក្តីត្រូវការ និង​សំណូមពរ​របស់​ប្រជាពលរដ្ឋ ប្រកបដោយ​ប្រសិទ្ធភាព សំដៅ​រួមចំណែក​កាត់បន្ថយ​ភាពក្រីក្រ​នៅ​មូលដ្ឋាន​ឱ្យ​កាន់តែ​ឆាប់រហ័ស​៕ ល​