មន្ត្រី​ក្រសួងបរិស្ថាន​ផ្សព្វផ្សាយ និង​អប់រំ​អំពី​បញ្ហា​បរិស្ថាន ដល់​សិស្សានុសិស្ស​នៅ​វិទ្យាល័យ​អង្គរ​

1067
ចែករម្លែក
មន្ត្រី​ក្រសួងបរិស្ថាន​ផ្សព្វផ្សាយ​និង​អប់រំ​អំពី​បញ្ហា​បរិស្ថាន ដល់​សិស្សានុសិស្ស​នៅ​វិទ្យាល័យ​អង្គរ​

​ដោយ​: គូលែន / សៀមរាប​: មន្ត្រី​ក្រសួងបរិស្ថាន​បាន​បញ្ជាក់ថា ការផ្សព្វផ្សាយ​និង​អប់រំ​អំពី​បញ្ហា​បរិស្ថាន​ដល់​សិស្សានុសិស្ស គឺជា​រឿង​សំខាន់​មួយ​ដែល​ផ្ដល់​ចំណេះដឹង​ផ្នែក​គាំពារ​បរិស្ថាន រក្សា​ជីវៈចម្រុះ និង​ការអភិវឌ្ឍន៍​ដោយ​ចីរភាព សម្រាប់​ថ្ងៃ​អនាគត​។ លោក ខ្វៃ អាទិ​ត្យា មានប្រសាសន៍​ដូច្នេះ ក្នុងឱកាស​បើក​សិក្ខា​លា​សា​ស្តីពី ការផ្សព្វផ្សាយ​អប់រំ​បរិស្ថាន ដើម្បី​ការអភិវឌ្ឍន៍​ដោយ​ចីរភាព នៅ​វិទ្យាល័យ​អង្គរ ក្នុង​ក្រុង​សៀមរាប នា​ព្រឹក​ថ្ងៃទី​២៧ ខែមិថុនា ឆ្នាំ​២០១៨​នេះ ដោយមាន​ការចូលរួម​ពី​ស្ថាប័ន​ពាក់ព័ន្ធ លោកគ្រូ អ្នកគ្រូ និង​សិស្សានុសិស្ស​ជាច្រើន​នាក់​។​

​លោក ខ្វៃ អាទិ​ត្យា អគ្គនាយករង នៃ​អគ្គនាយកដ្ឋាន​ចំណេះដឹង និង​ព័ត៌មាន​បរិស្ថាន នៃ​ក្រសួងបរិស្ថាន បាន​មានប្រសាសន៍ថា ការផ្សព្វផ្សាយ​និង​អប់រំ​អំពី​បញ្ហា​បរិស្ថាន​ដល់​សិស្សានុសិស្ស​នាពេលនេះ គឺជា​រឿង​ចាំបាច់ និង មាន​សារៈប្រយោជន៍​សំខាន់​ខ្លាំងណាស់ ដែល​ផ្ដល់​ចំណេះដឹង​ដល់​ពួកគេ ផ្នែក​គាំពារ​បរិស្ថាន រក្សា​ជីវៈចម្រុះ និង​ការអភិវឌ្ឍន៍​ដោយ​ចីរភាព ហើយ​ជួយ​ផ្សព្វផ្សាយ​បន្ត និង​បញ្ជ្រាប​ចំណេះដឹង​អំពី​ភាពចាំបាច់ ដល់​ប្រជាពលរដ្ឋ​នៅតាម​មូលដ្ឋាន​នាបច្ចុប្បន្ន និង ពួកគេ​ជា​អ្នកមាន​សមត្ថភាព​ខ្ពស់​ផ្នែក​បរិស្ថាន​សម្រាប់​ថ្ងៃ​អនាគត​។​

លោក ខ្វៃ អាទិ​ត្យា មានប្រសាសន៍​ទៀតថា ក្នុង​សិក្ខាសាលា​នេះ ក៏បាន​ធ្វើ​បទ​បង្ហាញ​លើ​ការគ្រប់គ្រង​សំណល់​ប្លា​ស្ទិ​ក ឲ្យ​បាន​សមស្រប​សំដៅ​កែប្រែ​ផ្នត់គំនិត និង​ឥរិយាបទ​មហាជន គ្រប់​មជ្ឈដ្ឋាន ឲ្យ​ទៅជា​កម្លាំងចលករ ដើម្បី​រួមចំណែក​ដល់​ការលើកកម្ពស់​ប្រសិទ្ធភាព​ការងារ​គ្រប់គ្រង ធនធានធម្មជាតិ និង​បរិស្ថាន នៅលើ​ភពផែនដី ស្របទៅតាម​ទស្សន​:​ទាន ការអភិវឌ្ឍន៍​ដោយ​ចីរភាព និង ឆ្លើយតប​ទៅនឹង​ការជំរុញ​ឲ្យ​មានការ​ចូលរួម​ការកាត់បន្ថយ​សំណល់​ប្លា​ស្ទិ​ក ដែល​រាជរដ្ឋាភិបាល​បានដាក់​ចេញ​នូវ​អនុក្រឹត្យ​លេខ ១៦៨ អនក្រ​.​បក ចុះ​ថ្ងៃទី​១០ ខែតុលា ឆ្នាំ​២០១៧ ស្តីពី​ការគ្រប់គ្រង​ថង់​ប្លា​ស្ទិ​ក ដើម្បី​បញ្ជ្រាប​ដល់​ប្រជាពលរដ្ឋ ឲ្យ​ចេះ​ស្រឡាញ់​បរិស្ថាន និង​ជំរុញ​ដល់​មហាជន​ទាំងអស់ រួមគ្នា​គិត រួមគ្នា​ធ្វើ រួមគ្នា​បំបាត់​ការបំពុល​ដោយ​ប្លា​ស្ទិ​ក ដើម្បី​សុខភាព​យើង​និង​ភពផែនដី​។​

​លោក ខ្វៃ អាទិ​ត្យា បាន​សំណូមពរ​ដល់​សិស្សានុសិស្ស​ទាំងអស់ ចូលរួម​កាត់បន្ថយ​ប្លា​ស្ទិ​ក ជាពិសេស​កុំ​បោះ​សំណល់ ឬ​ថង់​ប្លា​ស្ទិ​ក​ចោល​ទៅក្នុង​បរិស្ថាន ព្រោះ​សារធាតុ​គីមី​ក្នុង​ប្លា​ស្ទិ​ក​អាច​បង្ក​ឲ្យ​មានការ​បំពុល​ដល់​គុណភាព​ដី គុណភាព​ទឹក និង​មាន​គ្រោះថ្នាក់​ដល់​ប្រព័ន្ធ​អេកូឡូស៊ី និង​ជីវៈចម្រុះ ជាពិសេស កុំ​ដុត​ថង់​ប្លា​ស្ទីក ដែល​ធ្វើ​ឲ្យ​ប៉ះពាល់​ស្រទាប់អូស្សូន បំពុលបរិយាកាស និង​សុខភាព​។​

​សូមបញ្ជាក់ថា បន្ទាប់ពី​ការធ្វើ​បទ​បង្ហាញ​បញ្ជ្រាប​ពី​ចំណេះដឹង​ពី​វិស័យ​បរិស្ថាន​ហើយ កម្មវិធី​ក៏មាន​វេទិកា​សំណួរ និង​ចម្លើយ និង​ចែក​រង្វាន់​ថង់​បរិស្ថាន និង​សម្ភារ​សិក្សា​ដល់​សិស្សានុសិស្ស ដើម្បី​ពង្រឹង​ចំណេះដឹង​វិស័យ​បរិស្ថាន និង ជំរុញឱ្យមាន​ការចូល​រួម​យ៉ាងសកម្ម​ថែមទៀត ពី​យុវជន ក្នុងការ​គ្រប់គ្រង​ធនធានធម្មជាតិ និង​ការអភិរក្ស​ជីវៈចម្រុះ​ឱ្យមាន​ប្រសិទ្ធភាព​ឲ្យ​កាន់តែ​ល្អប្រសើរ​៕ ល​