មន្ត្រី​ឧ​ទ្យា​នុ​រក្ស​២៤​នាក់​ចូល​ស្បថ​តុលាការខេត្ត​ស្ទឹងត្រែង​

1011
ចែករម្លែក

ដោយ​: សុខុម / ស្ទឹងត្រែង​: មន្ដ្រី​ឧ​ទ្យា​នុ​រក្ស នៃ​មន្ទីរ​បរិស្ថាន​ខេត្តស្ទឹងត្រែង ប្រមាណ​ជា​២៤​នាក់ ចូលទៅ​ស្បថ​នៅ​ចំពោះមុខ​លោកតា​ដំបង​ដែក សាលាដំបូង​ខេត្ត កាលពី​ថ្ងៃទី​២១​ខែកញ្ញា​ឆ្នាំ​២០១៨​។ ការ​ទៅ​ស្បថ​នោះ ដើម្បី​ចូលខ្លួន​ជា​ភ្នាក់ងារ​នគ​បាល​យុត្តិធម៌​បង្ការ​បង្ក្រាប​បទល្មើស​ធ​ន​ធាន​ធម្មជាតិ និង​ការពារ​ព្រៃឈើ ជីវៈចំរុះ​នៅ​តំបន់​អភិរក្ស​ក្នុង​ខេត្តស្ទឹងត្រែង​។​

​នៅ​ចំពោះមុខ​លោកតា​បំបង​ដែក និង​ចំពោះមុខ​លោក អៀង គឹម ថុល ប្រធាន​សាលាដំបូង​ខេត្តស្ទឹងត្រែង មន្ត្រី​ឧ​ទ្យា​នុ​រក្ស​ទាំងអស់ បានធ្វើការ​សច្ចារ​ប្រណិធាន ប្តេជ្ញា​ការពារ​ធនធានធម្មជាតិ ជីវៈចំរុះ និង​បង្ក្រាប​រាល់​បទល្មើស​ដែល​កើតមាន​ក្នុង​ដែន​សមត្ថកិច្ច​របស់ខ្លួន ព្រមទាំង​កសាង​រាល់​សំណុំរឿង​បទល្មើស ក្នុង​ដែន​សមត្ថកិច្ច​របស់ខ្លួន​ជូន​ដល់​តុលាការ ដើម្បី​មាន​វិធានការ និង​នាំយក​ជន​ទុច្ចរិត​ទៅ​អនុវត្តតាម​ផ្លូវច្បាប់​។ ប៉ុន្តែ​ផ្ទុយទៅវិញ បើសិនជា​មន្ត្រី​ឧ​ទ្យា​នុ​រក្ស​មិនបាន​អនុវត្តតាម​តួនាទី ឬ​មាន​ចេតនា​ទុច្ចរិត​នោះ​និង​ត្រូវ​ទទួលខុសត្រូវ​ចំពោះមុខ​ច្បាប់​ជា​ធរមាន​។​

​លោក គឹម ហុង​សាន ព្រះរាជអាជ្ញារង​អម​សាលាដំបូង និង​ជា​តំណាង​អាយ្យ​ការ បាន​និយាយថា ការចូល​សច្ចារ​ប្រណិធាន​របស់​មន្ត្រី​ឧ​ទ្យា​នុ​រក្ស​ធ្វើឡើង​យោងទៅតាម​បទ​ប​ញ្ញាតិ​មាត្រា​៨២​នៃ​ក្រមព្រហ្មទណ្ឌ ដែល​ចែង​អំពី​ការផ្តល់​សម្បទារ​ដល់​ម​ន្ត្រី​សាធារណៈ​ដទៃទៀត​ជា​ភ្នាក់ងារ​នគ​បាល​យុត្តិធម៌​។ ដូចនេះ មន្ត្រី​បរិស្ថាន​ត្រូវបាន​ដាក់​ឲ្យ ស្ថិតនៅក្រោម​អំណាច​រប​ស់​ព្រះរាជអាជ្ញា ក្នុងការ​បំពេញមុខ​ងា​រ​ជា​ភ្នាក់ងារ​នគ​បាល​យុត្តិធម៌​។ ដូច្នេះ​រាល់​បទល្មើស​ទាំងឡាយណា ដែល​កើតឡើង​ក្នុង​ដែន​អភិរក្ស​ដែល​ការពារ ដោយ​មន្ត្រី​ឧ​ទ្សា​នុ​រក្ស​ត្រូវ​សហប្រតិបត្តិ ជាមួយ​ព្រះរាជអាជ្ញា​ក្នុងការ​បង្ក្រាប​។ មួយវិញទៀត មន្ត្រី​ឧ​ទ្សា​នុ​ក្ស​ដែល​ស្បថ​ចូលខ្លួន​ជា​ភ្នាក់ងារ​នគ​បាល​យុត្តិធម៌ ត្រូវ​ពិនិត្យមើល​រាល់​បទល្មើស ក្នុង​ដែន​សមត្ថកិច្ច​របស់ខ្លួន​។​

​លោក​បន្តថា រាល់​ការចុះ​បង្ក្រាប​បទល្មើស​ដែល​កើតឡើង​ក្នុង​តំបន់​អភិរក្ស​ធនធានធម្មជាតិ ព្រះរាជអាជ្ញា​ជា​អ្នកដឹកនាំ​និង​សម្របសម្រួល​ការងារ​រ​បស់​នគ​បាល​យុ​ត្តិ​ធ​ម៍ ដូចដែល​មន្ត្រី​ឧ​ទ្យា​នុ​រក្ស​បាន​សិក្សា​រួចមក​ហើយពី​និតិ​វិធី ដែលមាន​ចែង​និង​ពាក់ព័ន្ធ​នៅក្នុង​ច្បាប់​បទដ្ឋាន​គតិយុត្ត​។ បើ​មាន​បទល្មើស​កើតឡើង ត្រូវ​មានការ​សហប្រតិបត្តិ​ការ​ជាមួយ​ព្រះរាជអាជ្ញា​ក្នុងការ​បង្ក្រាប​។​

​លោក ជា សុខ​ហឿន មន្ត្រី​ឧ​ទ្សា​នុ​រក្ស​ដែន​ជំរក​ព្រៃ​ឡង់​ដែល​បាន​ចូលរួម​ស្បថ បាន​និយាយថា លោក​រួមទាំង​មន្ត្រី​ឧ​ទ្យា​នុ​រក្ស​២៣​នាក់​ផ្សេងទៀត បាន​ប្តេជ្ញា​ការពារ​ធនធានធម្មជាតិ ឲ្យ​បាន​គង់វង្ស​ឲ្យ​សមស្រប និង​ទំនុកចិត្ត ដែល​រាជរដ្ឋាភិបាល​ផ្តល់ជូន ព្រមទាំង​និង​ខិត​ប្រឹងប្រែង​ធ្វើការ​ប្រកប​ដោ​ឆន្ទៈ ក្នុងការ​បំពេញការងា​រ​ឱ្យបាន​ល្អប្រសើរ​តាមរយៈ​ការបង្កើន​កិច្ច​សហការគ្នា ជាមួយ​អាជ្ញា​ធរមាន​សមត្ថកិច្ច​នៅតាម​មូលដ្ឋាន ចុះបង្ក្រាប​បទល្មើស​ឱ្យមាន​ប្រសិទ្ធភាព​។​

​លោក​បានបញ្ជាក់​ផងដែរ​ថា ការការពារ​ធនធាន​ធម្មជាតិ​ឲ្យ​បាន​គង់វង្ស​បានល្អ​នោះ ក៏​មិនមែន​ផ្អែក​តែ​លើ​ក្រុមមន្ត្រី​ឧ​ទ្យា​នុ​រក្ស​នោះឡើយ តែ​ត្រូវមាន​ការចូល​រួមសហកា​រ​ពី​អាជ្ញាធរ​ពាក់ព័ន្ធ និង​ប្រជាពលរដ្ឋ​ចូលរួម​ក្នុងការ​ទប់ស្កាត់ ឬ​រាយការណ៍​រាល់​បញ្ហា​បទល្មើស​ដែល​កើតមានឡើង​ក្នុង​តំបន់​អភិរក្ស​ផងដែរ​៕