មេបញ្ជាការ​កងទ័ពជើងគោក​ថ្មី​ប្តេជ្ញា​បូជា​អាយុជីវិត​ដើម្បី​បុព្វហេតុ​ការពារ​ប្រជាជន និង​ជាតិ​មាតុភូមិ​

295

​ដោយៈ មុនី​រ័ត្ន​/​ភ្នំពេញៈ​ឧ​ត្ត​ម​សេនីយ៍​ឯក ហ៊ុន ម៉ា​ណែ​ត មេបញ្ជាការ​កងទ័ពជើងគោក បាន​ថ្លែងថា ផ្ទេរ​ភារកិច្ច​មេបញ្ជាការ​កងទ័ពជើងគោក​នេះ មិនមែន​មានន័យថា ជាការ​ផ្ទេរសិទ្ធិ ឬ​ផ្ទេរអំណាច​នោះទេ ប៉ុន្តែ​ជាការ​ផ្ទេរ​នូវ​ការទទួលខុសត្រូវ​បន្ត​មួយ និង​ផ្តល់​កិត្តិយស ផ្តល់ឱកាស​ក៏ដូចជា​លទ្ធភាព​ដ៏​ធំធេង​បន្ថែមទៀត​សម្រាប់​រូប លោក​បាន​ចូលរួម​បម្រើ​ប្រទេសជាតិ​ឲ្យ​បាន​កាន់តែ​ទូលំទូលាយ ពោលគឺ​ចូលរួម​បម្រើ​កងយោធពល​ខេមរភូមិន្ទ ក្នុងការ​ធានាបាន​សុខសន្តិភាព ស្ថិរភាព សន្តិសុខ អធិបតេយ្យភាព បូរណភាព​ទឹកដី និង​ការអភិវឌ្ឍន៍​មាតុភូមិ​។​

នាយ​ឧ​ត្ត​ម​សេនីយ៍ មាស សុភា ផ្ទេរ​ភារកិច្ច​ជូន​លោក​ឧ​ត្ត​ម​សេនីយ៍​ឯក ហ៊ុន ម៉ា​ណែ​ត

​ ​ការបញ្ជាក់​នេះ នៅក្នុង​ពិធី​ផ្ទេរ​កិច្ច​មេបញ្ជាការ​កងទ័ពជើងគោក នៅ​បញ្ជាការដ្ឋាន​កងទ័ពជើងគោក កាលពី​ព្រឹក​ថ្ងៃទី​១២ ខែកញ្ញា ឆ្នាំ​២០១៨​។

​ ​មេបញ្ជាការ​កងទ័ពជើងគោក​បាន​បន្តថា កងយោធពល​ខេមរភូមិន្ទ​មាន​តួនាទី​ចម្បង ក្នុង​កិច្ចការពារ​អធិបតេយ្យភាព ឯករាជ្យភាព និង​បូរ​ភាព​ទឹកដី នៃ​ព្រះរាជាណាចក្រ​កម្ពុជា ព្រមទាំង​រួមចំណែក​នៅក្នុង​ការធានា​ស្ថិរភាព សុវត្ថិភាព និង​សន្តិសុខ ដែលជា​តម្រូវ​ការចាំបាច់ និង​ជា​មូលដ្ឋាន​ដ៏​ចម្បង ដើម្បី​ធានា​ដល់​ការអភិវឌ្ឍ​ប្រទេសជាតិ​លើ​គ្រប់​វិស័យ​។ ជាពិសេស​នៅក្នុង​យុទ្ធនាការ​អនុវត្ត​នយោបាយ​ឈ្នះ ឈ្នះ របស់​សម្តេច​តេ​ជោ​នាយករដ្ឋមន្ត្រី ក្នុង​យុទ្ធសាស្ត្រ​បង្រួបបង្រួម​ជាតិ ការបញ្ចប់​ទាំងស្រុង​ង​នៅ​ទុក្ខវេទនា​របស់​ប្រជាជន​ខ្មែរ​ក្នុងសម័យ​សង្គ្រាម និង​ការរំលាយ​ជា​ស្ថាពរ​នៃ​អង្គការ​ចាត់តាំង​នយោបាយ និង​យោធា​របស់​ខ្មែរក្រហម ក្នុង​ឆ្នាំ​១៩៩៨ ដោយបាន​នាំ​ឲ្យ​ប្រទេសជាតិ​ទទួលបាន​សុខសន្តិភាព និង​ការអភិវឌ្ឍន៍​លើ​គ្រប់​វិស័យ​។
​ ​ជាមួយគ្នានេះ ឧ​ត្ត​ម​សេនីយ៍​ឯក ហ៊ុន ម៉ា​ណែ​ត បាន​ប្តេជ្ញាចិត្ត​ថា ស្មោះត្រង់​ដាច់ខាត​ចំពោះ​ជាតិ សាសនា និង​ព្រះមហាក្សត្រ អស់​មួយជីវិត​។ គោរព​និង​អនុវត្តតាម​ជានិច្ច​នូវ​រដ្ឋធម្មនុញ្ញ នៃ​ព្រះរាជាណាចក្រ​កម្ពុជា​។ ដើរ​តាម​មាគ៌ា​ដឹកនាំ​ដ៏​ថ្លៃថ្លា​របស់​រាជរដ្ឋាភិបាល ជាពិសេស​គោរព និង​អនុវត្តតាម​គោលនយោបាយ​របស់​រាជ​រដ្ឋាភិបាល​អាណត្តិ​ទី​៦​។ គោរព​និង​អនុវត្តតាម​គោលការណ៍ និង​លក្ខន្តិកៈ​កងយោធពល​ខេមរភូមិន្ទ​ឲ្យ​បាន​ខ្ជាប់ខ្ជួន​បំផុត និង​ខិតខំ​ប្រឹងប្រែង​អនុវត្ត​ឲ្យ​បាន​ចំពោះ​តួនាទី​របស់ខ្លួន និង​ហ៊ាន​បូជា​អាយុជីវិត មិន​ស្តាយស្រណោះ ដើម្បី​បុព្វហេតុ​ការពារ​ប្រជាជន និង​ជាតិ​មាតុភូមិ​។​

នាយ​ឧ​ត្ត​ម​សេនីយ៍ មាស សុភា ទេសរដ្ឋមន្ត្រី​ទទួលបន្ទុក​បេសកកម្ម​ពិសេស​

​ចំណែក​នាយ​ឧ​ត្ត​ម​សេនីយ៍ មាស សុភា ទេសរដ្ឋមន្ត្រី​ទទួលបន្ទុក​បេសកកម្ម​ពិសេស ថ្លែង​នៅក្នុង​ពិធី​សំណេះ សំណាល​និង​ផ្ទេរ​ភារកិច្ច​មេបញ្ជាការ​កងទ័ពជើងគោក​ថា លោក​សូម​អបអរសាទរ ឧ​ត្ត​ម​សេនីយ៍​ឯក ហ៊ុន ម៉ា​ណែ​ត ដែល​ព្រះមហាក្សត្រ​បាន​ត្រាស់បង្គាប់​តែងតាំង​មុខងារ​ជា​មេបញ្ជាការ​កងទ័ពជើងគោក​បន្ថែម​លើ​មុខងារ​បច្ចុប្បន្ន​។ ការផ្ទេរ​ភារកិច្ច គឺ​យោងតាម​ច្បាប់​ដែល​បានកំណត់​និង​សំណូមពរ​ភារកិច្ច​ជាក់ស្តែង​ក្នុង​ផែនការ​កំណែទម្រង់កងទ័ព​ដើម្បី​ផ្ដល់ឱកាស​ឱ្យ​អ្នកជំនាន់ក្រោយ​បន្តវេន​។ កាលពី​អតីតកាល​ការផ្ទេរ​ភារកិច្ច​គឺ​នៅ ក្រោម​ស្នូរ​គ្រាប់កាំភ្លើង​ប៉ុន្តែ​បច្ចុប្បន្ននេះ​ការផ្ទេរ​ភារកិច្ច​ពីក្រោម​ដំបូល​សុខសន្តិភាព​។​

​លោក​បាន​បញ្ជាក់ថា លោក​មាន​មោទនភាព​ណាស់​ដែល​បាន​ចូល​បម្រើកងទ័ព​ក្នុង​រយៈពេល​៥០ ឆ្នាំនេះ ដែល​បាន​ចែករំលែក​បទពិសោធន៍ និង​ទទួលបាន​លទ្ធផល​នៃ​ការដឹកនាំ​កងទ័ព​ក្នុងការ​ការពារ​បូរណភាព​ទឹកដី​និង​ស្វែងរក​សុខសន្តិភាព​ជូន​ជាតិ​មាតុភូមិ​។ សមិទ្ធផល​ជាច្រើន​ដែល​កងទ័ព​យើង​សំរេចបាន​គឺមាន​ច្រើនណាស់​រួមមាន ការថែរក្សា​សុខសន្តិភាព សណ្ដាប់ធ្នាប់​សង្គម សន្តិសុខ​សាធារណៈ កំណែទម្រង់កងទ័ព​ទាំង​បរិមាណ​និង​គុណភាព ការងារ​ហ្វឹកហ្វឺន ការងារ​សង្គម ពង្រឹង​សម្ព័ន្ធមេត្រីភាព​ជាមួយនឹង​វិស័យ​ស៊ីវិល​(​ឯកជន​) ការ​សហប្រតិបត្តិការ​ល្អ​ជាមួយ​ប្រទេស​នៅក្នុង​តំបន់​និង​អន្តរជាតិ មានការ​ឯកភាព​សាមគ្គីភាព​ផ្ទៃក្នុង​។ សូម​បន្ត​អនុវត្ត​យុទ្ធសាស្ត្រ​ចតុកោណ​ដំណាក់កាល​ទី ៤​របស់​រាជរដ្ឋាភិបាល និង​ចូលរួម​ការពារ​សុខសន្តិភាព​សមិទ្ធិផល​ជាច្រើន​ដែល​យើង​សំរេចបាន បន្ត​គោរព​ច្បាប់ ការពារ​រដ្ឋធម្មនុញ្ញ រដ្ឋាភិបាល​ស្របច្បាប់ និង​បន្ត​អភិវឌ្ឍ​អង្គភាព​ឲ្យ​បាន​រីកចម្រើន​៕SRN