មេបញ្ជាការ​កងទ័ពជើងគោក​កម្ពុជា​ជួប​ជាមួយ​គណៈប្រតិភូ​កងទ័ព​អ៊ីស្លាម​ប៉ា​គី​ស្ថាន​

255
ចែករម្លែក

ដោយ​: មុនី​រ័ត្ន / ភ្នំពេញ​: នៅក្នុង​ជំនួប​ជាមួយ​គណៈប្រតិភូ​កងទ័ព​នៃ​សាធារណរដ្ឋ​អ៊ីស្លាម​ប៉ា​គី​ស្ថាន ឧ​ត្ត​ម​សេនីយ៍​ឯក ហ៊ុន ម៉ា​ណែ​ត អគ្គ​មេបញ្ជាការរង នៃ​កងយោធពល​ខេមរភូមិន្ទ និង​ជា​មេបញ្ជាការ​កងទ័ពជើងគោក​កម្ពុជា បាន​ស្វាគមន៍ និង​អរគុណ​ចំពោះ​ដំណើរ​ទស្សនកិច្ច​របស់​គណៈប្រតិភូ នៃ​សាធារណរដ្ឋ​អ៊ីស្លាម​ប៉ា​គី​ស្ថាន​មកកាន់​កម្ពុជា ដែល​ដំណើរ​ទស្សនកិច្ច​នេះ បាន​ជំរុញ​ការទំនាក់ទំនង និង​កិច្ចសហប្រតិបត្តិការ​យោធា​នៃ​ប្រទេស​ទាំងពីរ​ឱ្យ​កាន់តែ​ប្រសើរ​។ មេបញ្ជាការ​កងទ័ពជើងគោក​កម្ពុជា បាន​រៀបរាប់​អំពី​ប្រវត្តិ នៃ​ការបង្កើត​បញ្ជាការដ្ឋាន​កងទ័ពជើងគោក​រយៈ​ពេល​២០​ឆ្នាំ ​ដែល​បាន​ឆ្លងកាត់​ឧបសគ្គ និង​ការលំបាក​ជាច្រើន​ក្រោម​ការដឹកនាំ​របស់​នាយ​ឧ​ត្ត​ម​សេនីយ៍ មាស សុភា អតីត​មេបញ្ជាការ​កងទ័ពជើងគោក ដែល​បាន​ខិតខំ​ប្រឹងប្រែង​សម្រេចបាន​នូវ​សមិទ្ធផល​ជាច្រើន​ដូច​ពេលបច្ចុប្បន្ន ហើយក៏​ជា​រយ​:​ពេលដែល​កម្ពុជា បានទទួល​សុខសន្តិភាព​នៅ​ទូទាំងប្រទេស​ក្រោម​នយោបាយ​ឈ្នះ​ឈ្នះ​របស់​សម្ដេច​តេ​ជោ ហ៊ុន សែន​។

​លោក​ឧ​ត្ត​ម​សេនីយ៍​ឯក ក៏បាន​បង្ហាញ​ពី​ការងារ​អាទិភាព​សំខាន់ៗ​ក្រោយពី​ដំណាក់កាល​ឆ្លងកាត់​ពេលវេលា​ដ៏​លំបាក​នៃ​ការបញ្ចប់​សង្គ្រាម​ក្រោម​នយោបាយ​ឈ្នះ​-​ឈ្នះ​។ កងទ័ពជើងគោក​បាន​ពោះ​ពារ​ខិតខំ​ប្រឹងប្រែង​លើ​ការងារ​ជាច្រើន ក្នុងនោះ​ការងារ​អទិភាព​គឺ​ការងារ​កំណែទម្រង់​កង​យោធពលខេមរភូមិន្ទ និង​ការបណ្ដុះបណ្ដាល​ធនធាន​មនុស្ស​។​

​គោលបំណង​នៃ​ជំនួប​មេបញ្ជាការ​កងទ័ពជើងគោក​កម្ពុជា និង​អគ្គបញ្ជាការដ្ឋាន កងទ័ព​នៃ​សាធារណរដ្ឋ​អ៊ីស្លាម​ប៉ា​គី​ស្ថាន គឺជា​ការផ្លាស់ប្ដូរ​បទ​ពិសោធន៍ រឹតចំណង​មិត្តភាព និង​ពង្រីក​កិច្ចសហប្រតិបត្តិការ​យោធា នៃ​ប្រទេស​ទាំងពីរ​ឲ្យ​កាន់តែ​ប្រសើរ ជាពិសេស​ផ្ដោតលើ​ការបណ្ដុះបណ្ដាល​ធនធាន​មនុស្ស និង​កិច្ចសហប្រតិបត្តិការ​ផ្សេងៗ ដើម្បី​ថែរក្សា​សុខសន្តិភាព​នៅក្នុង​តំបន់​។​

​លោក​ឧត្ដមសេនីយ៍ឯក មូ​ហា​ម៉ាត់ ជី​រ៉ា​ក់ ហៃ​ឌឺរ ( MOHAMMAD CHIRAGH HAIDER ) នាយសេនាធិការ​ចម្រុះ អគ្គបញ្ជាការដ្ឋាន កងទ័ព​នៃ​សាធារណរដ្ឋ​អ៊ីស្លាម​ប៉ា​គី​ស្ថាន បាន​ស្វាគមន៍​នៅក្នុង​កិច្ចសហប្រតិបត្តិកា​រវិ​ស័​យ​យោធា នៃ​ប្រទេស​ទាំងពីរ​តាមរយៈ​ការផ្ដល់​ឱកាស នៃ​ការសិក្សា​បណ្ដុះបណ្ដាល​ធន​ធាន​មនុស្ស និង​ការហ្វឹកហាត់​រួមគ្នា​នៅក្នុង​ពេលវេលា​សមស្រប​ណាមួយ នៅពេល​ខាងមុខ​។ នាឱកាស​នោះ​អគ្គបញ្ជាការដ្ឋាន កងទ័ព​នៃ​សាធារណរដ្ឋ​អ៊ីស្លាម​ប៉ា​គី​ស្ថាន បាន​គោរព​អញ្ជើញ​ឧ​ត្ត​ម​សេនីយ៍​ឯក ហ៊ុន ម៉ា​ណែ​ត អគ្គមេបញ្ជាការ​រង​នៃ​កងយោធពល​ខេមរភូមិន្ទ និង​ជា​មេបញ្ជាការ​កងទ័ពជើងគោក​កម្ពុជា អញ្ជើញ​ធ្វើ​ទស្សនកិច្ច​នៅ​សាធារណរដ្ឋ​អ៊ីស្លាម​ប៉ា​គី​ស្ថាន នៅពេល​វេលា​សមស្រប​នៅពេល​ខាងមុខ​។

​ចុងបញ្ចប់​នៃ​ជំនួប​ពិភាក្សា​នៃ​ថ្នាក់ដឹកនាំ​កងទ័ព​នៃ​ប្រទេស​ទាំងពីរ​បានធ្វើ​ការផ្លាស់​ប្ដូរ​វត្ថុ​អនុស្សាវរីយ៍​ជូន​គ្នា​ទៅវិញទៅមក​ក្រោម​បរិយាកាស​ស្និទ្ធស្នាល និង​រីករាយ​ក្រៃលែង​។

​សូមបញ្ជាក់ថា នៅ​រសៀល​ថ្ងៃទី ៨ ខែតុលា ឆ្នាំ​២០១៩ ឧ​ត្ត​ម​សេនីយ៍​ឯក ហ៊ុន​ម៉ា​ណែ​ត អគ្គមេបញ្ជាការ​រង​ក​ង​យោធពលខេមរៈភូមិន្ទ និង​ជា​មេបញ្ជាការ​កងទ័ព ជើងគោក​បានទទួល​ជួបពិភាក្សា​ការងារ​ជាមួយ ឯកឧត្តម ឧត្ដមសេនីយ៍ឯក មូ​ហា​ម៉ាត់ ជី​រ៉ា​ក់ ហៃ​ឌឺរ ( MOHAMMAD CHIRAGH HAIDER ) នាយសេនាធិការ​ចម្រុះ អគ្គបញ្ជាការដ្ឋាន កងទ័ព​នៃ​សាធារណរដ្ឋ​អ៊ីស្លាម​ប៉ា​គី​ស្ថាន​នៅ​បញ្ជាការដ្ឋាន​កងទ័ពជើងគោក ក្នុងឱកាស​ដែល ឯកឧត្តម បាន​ដឹកនាំ​គណៈប្រតិភូ​កងទ័ព ប៉ា​គី​ស្ថាន​មក​ធ្វើ​ទស្សនកិច្ច​ជា​មិត្តភាព និង​ជា​ផ្លូវការ​នៅ​ព្រះរាជាណាចក្រ​កម្ពុជា​៕