យន្តហោះ​ចម្បាំង​បំបាំងកាយ J-20 របស់​ចិន ត្រៀម​រួចរាល់​សម្រាប់​ការប្រយុទ្ធ​ទាំងឡាយ​

1198

​យោងតាម​លោក​យ៉ាង វៃ អ្នកស្រាវជ្រាវ​នៅ​បណ្ឌិត្យសភា​វិទ្យាសាស្ត្រ​ចិន​បានឱ្យដឹងថា យន្តហោះ​ចម្បាំង J-20 របស់​ចិន​គឺ​ត្រៀមខ្លួន​ជាស្រេច​សម្រាប់​ការប្រយុទ្ធ​នៅពេល​ណាមួយ​។​

​យន្ដហោះ​នេះ​ត្រូវបាន​ប្រគល់ឱ្យ​កងទ័ព​រំដោះប្រជាជន​ចិន​ជា​លើកដំបូង​កាលពី​រដូវ​ស្លឹកឈើ​ជ្រុះ ដោយ​ធ្វើឱ្យ​វា​ក្លាយជា​យន្ដហោះ​មិនមែន​របស់​រុស្ស៊ី និង​មិនមែន​របស់​អាមេរិក​ដំបូង​គេ ដែលមាន​សមត្ថភាព​បំបាំងកាយ​។​

​លោក​យ៉ាង​បាន​និយាយប្រាប់​កាសែត People’s Daily ថា យន្ដហោះ​ដែលមាន​លក្ខណៈ​ស្រដៀង​គ្នា​ទៅនឹង​យន្តហោះ F-22 Raptor នេះ គឺ “​មាន​សមត្ថភាព​ស្មើនឹង​យន្តហោះ​ជំនា​ន់ទី ៥ មកពី​សហរដ្ឋអាមេរិក​និង​រុស្ស៊ី​ដែរ​”​។ អ្នកស្រាវជ្រាវ ដែលជា​អ្នក​រចនា​ម៉ូដ​យន្តហោះ J-20 ផងដែរ​នោះ បាន​សម្តែង​ក្តី​សង្ឃឹមថា យន្ដហោះ​នេះ​នឹង​អាចអនុវត្ត​គ្រប់​បេសកកម្ម ដែល​គេ​ដាក់ឱ្យ​វា​ធ្វើ​។​

​ការខ្វះខាត​ដ៏​ធំ​បំផុត​សម្រាប់​យន្តហោះ J-20 គឺ​ម៉ាស៊ីន​របស់​វា ដែល​ប្រើ​ម៉ាស៊ីន WS-10G ជំនា​ន់ទី​៤ យក​គំរូ​តាម​ម៉ាស៊ីន AL-31 របស់​រុស្ស៊ី ដែលជា​ប្រភេទ​ម៉ាស៊ីន​ប្រើ​សម្រាប់​គ្រប់​ប្រភេទ​យន្តហោះ Sukhoi Su-27s និង Su-27 ។​

​ក្រុមហ៊ុន​ផលិត​យន្តហោះ​ចិន​ទាំងអស់​បាន​កំពុង​ខិតខំ​ធ្វើការ​យ៉ាងខ្លាំង​លើ​ការផលិត​ម៉ាស៊ីន WS-15 ដែលមាន​សមត្ថភាព​ខ្ពស់ជាង​ម៉ាស៊ីន WS-10G ហើយ​វា​អាច​ប្រៀបធៀប​ទៅនឹង​ម៉ាស៊ីន Pratt & Whitney F119 ដែល​បំពាក់​លើ​យន្តហោះ F-22 Raptors របស់​អាមេរិក​។​

​យន្តហោះ F-35 និង F-22 មាន​សមត្ថភាព​ហោះហើរ​ក្នុង​ល្បឿន​លឿន​ជាង​សំឡេង​ដោយ​មិនចាំបាច់​បើកភ្លើង​ហ្គាស​ពីក្រោយ​វា​ទេ ខណៈ​យន្តហោះ​ប្រភេទ J-10, J-11 និង J-20 ត្រូវតែ​បើកភ្លើង​ហ្គាស​ពីក្រោយ ដើម្បី​បើក​ឱ្យបាន​ល្បឿន​លឿន​ធៀប​នឹង​យន្តហោះ​អាមេរិក​។ ក្រុម​អ្នកជំនាញ​ខាង​អាកាសចរណ៍​និយាយថា ភ្លើង​ហ្គាស​ពីក្រោយ​នេះ គឺ​ងាយ​ធ្វើ​ឱ្យគេ​តាមដាន​ដឹង​នូវ​យន្តហោះ​ចម្បាំង​បែប​នោះ​ខ្លាំងណាស់​៕ ដោយ៖ កញ្ញាដាលីស

យន្តហោះ​ចម្បាំង​បំបាំងកាយ J-20 របស់​ចិន