យន្តហោះ​ហ្វីលីពីន​ឆ្ពោះទៅ​ទីក្រុង​ម៉ានីល​ចុះចត​បន្ទាន់​នៅ​ទីក្រុង​ឡូ​ស​អ៊ែន​ជេ​ឡេស

203
ចែករម្លែក

អាជ្ញាធរ​និយាយថា​ជើងហោះហើរ​របស់​ក្រុមហ៊ុន​អាកាសចរណ៍​ហ្វីលីពីន ដែល​ធ្វើដំណើរ​ទៅកាន់​ទីក្រុង​ម៉ានីល​បាន​ជួប​បញ្ហា​គាំងម៉ាស៊ីន​កាលពី​ថ្ងៃ​ព្រហស្បតិ៍ (២១ វិច្ឆិកា​) ភ្លាមៗ​បន្ទាប់ពី​ហោះ​ចេញពី​ទីក្រុង​ឡូ​ស​អ៊ែន​ជេ​ឡេស ហើយ​បាន​ចុះចត​បន្ទាន់​។​

​អាកាសយានដ្ឋាន​អន្តរជាតិ​ឡូ​ស​អ៊ែន​ជេ​ឡេស​និយាយថា អ្នកបើក​យន្តហោះ​នៃ​ជើងហោះហើរ​លេខ ១១៣ បានប្រកាស​អាសន្ន​ហើយ​បាន​រាយការណ៍​ពី​ការ​គាំងម៉ាស៊ីន​នៅលើ​យន្តហោះ Boeing 777​។ សាក្សី​នៅលើ​ដី​និយាយថា​បានឃើញ “​ការផ្ទុះ​ឆេះ​ចេញ​អណ្តាតភ្លើង​” ពី​ម៉ាស៊ីន​។​

​ភ្លាមៗ​មិនទាន់មាន​សេចក្តីរាយការណ៍​អំពី​ការរង​របួស​នោះទេ ហើយ​គេ​មិនទាន់​ដឹង​ច្បាស់​ថា​មាន​មនុស្ស​ប៉ុន្មាន​នាក់​ជិះ​នៅលើ​យន្ដហោះ​នេះ​។​

​រដ្ឋបាល​អាកាសចរណ៍​សហព័ន្ធ​បាន​និយាយថា​យន្ដហោះ​បាន​វិលត្រឡប់​មកវិញហើយ​ចុះចត​ដោយ​គ្មាន​ឧបទ្ទវហេតុ​។ ស្ថានីយទូរទស្សន៍ ABC-7 នៅ​ទីក្រុង​ឡូ​ស​អ៊ែន​ជេ​ឡេស​បាន​ចាក់ផ្សាយ​វីដេអូ​នៃ​យន្ដហោះ​នេះ​បន្ទាប់ពី​ហោះ​ឡើង ដោយ​បង្ហាញ​អណ្តាតភ្លើង​និង​ផ្សែង​ចេញពី​ម៉ាស៊ីន​ខាងស្តាំ​។​

​អាកាសយានដ្ឋាន​បាន​និយាយថា យន្តហោះ​បាន​ចុះចត​នៅ​ម៉ោង​ប្រហែល ១២ ថ្ងៃត្រង់​ម៉ោង​ក្នុងស្រុក ហើយ​នាយកដ្ឋាន​ពន្លត់អគ្គីភ័យ​ក្រុង​ឡូ​ស​អ៊ែន​ជេ​ឡេស​បាន​រង់ចាំ​ជាស្រេច​ដើម្បី​ពន្លត់ភ្លើង​។​

​មិនមាន​ការប៉ះពាល់​ដ​ល់​ជើងហោះហើរ​ផ្សេង​នោះទេ​៕ ដោយ៖ កញ្ញាដាលីស

យន្តហោះ Boeing 777 របស់​ក្រុមហ៊ុន​អាកាសចរណ៍​ហ្វីលីពីន ចុះចត​បន្ទាន់​នៅ​ឡូ​ស​អ៊ែន​ជេ​ឡេស​កាល​ពីថ្ងៃ​ព្រហស្បតិ៍