យន្តហោះ ដែល​ប្លន់​ដោយ “​បុគ្គលិក​ប៉ង​ធ្វើអត្តឃាត​” បាន​ធ្លាក់​នៅក្បែរ​ទីក្រុង​ស៊ី​អាថ​ល​

788
ចែករម្លែក
  • 98
    Shares

​ក្រុមមន្ត្រី​បាន​និយាយថា បុគ្គលិក​ក្រុមហ៊ុន​អាកាសចរណ៍ “​ប៉ង​ធ្វើអត្តឃាត​” ម្នាក់ បាន​លួច​យន្តហោះ Horizon Air ហោះ​ចេញពី​អាកាសយានដ្ឋាន​អន្តរជាតិ​ស៊ី​តាក់ (Sea-Tac) ហើយ​ត្រូវបាន​ដេញតាម​ដោយ​យន្តហោះ​យោធា មុនពេល​ធ្លា​ក់លើ​កោះ​តូច​មួយ​នៅ​កម្រង​កោះ​ភូ​ជែ​ត​សោ​ន (Puget Sound) ក្បែរ​ក្រុង​ស៊ី​អាថ​ល រដ្ឋ​វ៉ាស៊ីនតោន កាលពី​យប់​ថ្ងៃ​សុក្រ​ទី​១០​សីហា (​ព្រឹក​ថ្ងៃ​សៅរ៍​នៅ​កម្ពុជា​)​។​

​នាយកដ្ឋាន​តម្រួត​តំបន់​ភៀស​បាន​និយាយថា ព័ត៌មាន​បឋម​បាន​បង្ហាញថា ការធ្លាក់​យន្តហោះ​នេះ​បាន​កើតឡើង​ដោយសារតែ​បុរស​អាយុ ២៩ ឆ្នាំនេះ “​កំពុងបើក​យ៉ាង​គ្រោះថ្នាក់​នៅលើ​មេឃ ឬ ខ្វះ​ជំនាញ​ហោះហើរ​”​។​

​លោក អេ​ដ ដ្រ​យ​យើ អ្នកនាំពាក្យ​នាយកដ្ឋាន​តម្រួត​តំបន់​ភៀស បាន​និយាយ​នៅលើ​ធ្វី​ត​ធឺ​ថា បុរស​នោះបាន​ធ្វើអត្តឃាត ហើយ​មិន​ជាប់​ពាក់ព័ន្ធ​នឹង​អំពើ​ភេរវកម្ម​នោះទេ​។​

​វីដេអូ​បាន​បង្ហាញថា យន្តហោះ​ធុន Horizon Air Q400 កំពុង​ហោះ​វិល​ចុះឡើង​ដ៏​គ្រោះថ្នាក់ ខណៈដែល​ព្រះអាទិត្យ​រៀប​លិច​នៅ​កម្រង​កោះ​ភូ​ជែ​ត​សោ​ន​។ មិនមាន​អ្នកដំណើរ​នៅលើ​យន្តហោះ​នោះទេ​។ អាជ្ញាធរ​ដំបូង​ឡើយ​បាន​និយាយថា បុរស​នោះ​គឺជា​ជាង​មេកានិច ប៉ុន្តែ​ក្រោយមក​ក្រុមហ៊ុន Alaska Airlines បាន​និយាយថា គាត់​ជា​ភ្នាក់ងារ​សេវាកម្ម​ផ្ទាល់​ដី ដែល​ជួល​ដោយ​ក្រុមហ៊ុន Horizon តែប៉ុណ្ណោះ​។ បុគ្គលិក​ប្រភេទ​ដូច​បុរស​នេះ​គឺ នាំ​ផ្លូវ​យន្តហោះ​ឡើង​និង​ចុះ និង​សម្អាត​ព្រិល​ចេញពី​ផ្លូវ​យន្តហោះ​។​

​នាយកដ្ឋាន​ប៉ូលិស​ខាងលើ​បាន​និយាយថា ខ្លួន​កំពុង​ស៊ើបអង្កេត​ប្រវត្តិរូប​បុរស​បើកបរ​យន្តហោះ​នេះ ដែល​ឈ្មោះ​របស់គាត់​មិន​ត្រូវបាន​ក្រុមហ៊ុន​បញ្ចេញ​ឱ្យដឹង​នោះទេ​៕ ដោយ៖ កញ្ញាដាលីស

យន្តហោះ​ធុន Horizon Air Q400 បាន​ធ្លាក់​នៅក្បែរ​ទីក្រុង​ស៊ី​អាថ​ល បន្ទាប់ពី​បុគ្គលិក​ប៉ង​ធ្វើអត្តឃាត​ម្នាក់​បាន​លួច​យកទៅ​កាលពី​យប់​ថ្ងៃ​សុក្រ