យ៉ាងតិច​២០​នាក់ ត្រូវបាន​សម្លាប់​នៅក្នុង​ការបាញ់​គ្នា​នៅ​ម៉ិក​ស៊ិច​ខាងជើង​

151
ចែករម្លែក

​ខ្មាន់កាំភ្លើង​ដែល​គេ​សង្ស័យ​ជា​សមាជិ​ម៉ិក​ស៊ិក​ក្រុម​ថ្នាំញៀន​ចំនួន​១៧​នាក់​និង​ប៉ូលិស​៤​នាក់​ត្រូវបាន​សម្លាប់​នៅក្នុង​ការបាញ់​គ្នា​កាលពី​ថ្ងៃ​សៅរ៍​ទី​៣០​វិច្ឆិកា​និង​០១​ធ្នូ​នៅ​ទីប្រជុំជន​ម៉ិក​ស៊ិច​មួយ​ជិត​ព្រំដែន​អាម៉េរិក នៅ​ពេល​ប៉ុន្មាន​ថ្ងៃ​ក្រោយ​ពី​ប្រធានាធិបតី ដូ​ណា​ល់ ត្រាំ បាន​បង្ក​ភាព​តានតឹង​ទ្វេភាគី​ដោយសារតែ​លោក​បាន​និយាយថា​លោក​អាច​នឹង​​ដាក់​ក្រុម​ឧក្រិដ្ឋជន​ម៉ិក​ស៊ិច​ខ្លះ​ជា​ភេរ​វករ​។​

​រដ្ឋាភិបាល​រដ្ឋ​កូអា​ហ៊ីឡា​បាន​និយាយថា​ប៉ូលិស​បាន​ប៉ះទង្គិច​ជាមួយ​ក្រុម​ខ្មាន់កាំភ្លើង​ដែល​ជិះ​ក្នុង​រថយន្ត​ពិ​អាប់​ជាច្រើន​គ្រឿង​នៅក្នុង​ទីប្រជុំជន វីឡា យូ​នៀន ចម្ងាយ​ប្រមាណ​៦៥​គីឡូម៉ែត្រ​ពី​ទីក្រុង​ជាប់​ព្រំដែន ពី​អេ​ដ្រា​ស ណេ​ហ្ក្រា​ស​។​

​ឈរ​នៅ​ក្រៅ​ការិយាល័យ អភិបាលរដ្ឋ​កូអា​ហ៊ីឡា លោក​មី​ហ្គែល អ៊ែន​ជែល រី​កេល​មេ បាន​ប្រាប់​អ្នកយកព័ត៌មាន​ថា រដ្ឋ​បាន​ចាត់វិធានការ​ដាច់ខាត​លើ​ពួក​ក្រុម​ជូ​ញ​ដូរ​ថ្នាំញៀន​​ដែល​បណ្តាល​អោយ​ប៉ូលិស​៤​នាក់​ស្លាប់​និង​៦​នាក់​រងរបួស​។​

រថយន្ត​ពិ​ក​អាប់​​បិទអក្សរក្រុមថ្នាំញៀននិងផ្ទះខូចខាត​ដោយ​ការ​ត្រូវ​គ្រាប់កាំភ្លើង​ក្រោយ​ការបាញ់​គ្នា​រវាង​កងកម្លាំង​សន្តិសុខ​ម៉ិក​ស៊ិច និង​ខ្មាន់កាំភ្លើង​នៃ​ក្រុម​ជួញដូរ​ថ្នាំញៀន​នៅ​ទីប្រជុំជន​​វីឡា យូ​នៀន ប្រទេស​ម៉ិក​ស៊ិច​កាលពី​ថ្ងៃ​៣០​វិច្ឆិកា​

​ការប្រយុទ្ធ​គ្នា​បាន​ប្រព្រឹត្តទៅ​អស់​ជាង​៤​ម៉ោង ដោយ​បាន​សម្លាប់​ខ្មាន់កាំភ្លើង​នៃ​ក្រុម​ថ្នាំញៀន​ចំនួន​១០​នាក់ កាលពី​ថ្ងៃ​សៅរ៍​។​កងកម្លាំង​សន្តិសុខ​ក៏​បាន​សម្លាប់​ពួក​គេ​៧​នាក់​​ទៀត​កាលពី​ថ្ងៃអាទិត្យ​។​

​អភិបាលរដ្ឋ​កូអា​ហ៊ីឡា លោក​មី​ហ្គែល អ៊ែន​ជែល រី​កេល​មេ បាន​និយាយថា​មនុស្ស​មួយចំនួន​ក៏​កំពុង​បាត់​ខ្លួន រួម​មាន​ខ្លះ​ជា​បុគ្គលិក​ការិយាល័យ​របស់​លោក​និង​ថា​រថយន្ត​ពិ​ក​​អាប់​ចំនួន​១៤​គ្រឿង​បាន​ពាក់ព័ន្ធ​នឹង​ការវាយប្រហារ​នេះហើយ​កាំភ្លើង​ជាង​ដប់​ដើម​ត្រូវបាន​រឹបអូស​។​លោក​ជឿថា ពួក​ខ្មាន់កាំភ្លើង​ទាំងនេះ​ជា​សមាជិក​ក្រុម​ថ្នាំញៀន​Cartel of the Northeast​មក​ពី​រដ្ឋ​តា​ម៉ា​អ៊ូ​លី​ប៉ាស​។​

​ការ​ផ្ទុះ​ឡើង​អំពើហិង្សា​នេះ​បាន​កើតឡើង​បន្ទាប់​ពី​ប្រធានាធិបតីម៉ិក​ស៊ិច បាន​និយាយ​កាលពី​ថ្ងៃ​សុក្រ​ទី​២៩​វិច្ឆិកា​ថា​លោក​នឹង​មិន​ទទួលយក​អន្តរាគមន៍​បរទេស​ណា​មួយ​នៅ​ម៉ិក​​ស៊ិច​ដើម្បី​ដោះស្រាយ​ជាមួយនឹង​បណ្តា​ក្រុម​ឧក្រិដ្ឋជន​ហិង្សា ក្រោយ​ប្រធានាធិបតី​អាម៉េរិក​បាន​និយាយថា លោក​មាន​ផែនការ​ដាក់​ក្រុម​ថ្នាំញៀន​ម៉ិក​ស៊ិច​មួយចំនួន​ជា​ក្រុម​ភេរវ​​កម្ម​។​

​សម្តី​របស់​លោក​ដូណាល់ ត្រាំ បាន​បង្ក​ការព្រួយបារម្ភ​ភ្លាម ថា​ចំណាត់ការ​របស់​អាម៉េរិក​អាច​ប្រើ​ជា​លេស​ដើម្បី​អោយ​អាម៉េរិក​ចូល​អន្តរាគមន៍​ក្នុងប្រទេស​ម៉ិក​ស៊ិច​ដោយ​ឯតោ​ភាគី​៕​ដោយ​៖​វាសនា​