រដ្ឋមន្ត្រីការបរទេស​អាល្លឺម៉ង់​ទៅដល់​អ៊ីរ៉ង់​ដើម្បី​ពិភាក្សា​អំពី​កិច្ចព្រមព្រៀង​នុយក្លេអ៊ែរ​

466
ចែករម្លែក

​រដ្ឋមន្ត្រីការបរទេស​អាល្លឺម៉ង់​លោក​ហី​កូ ម៉ា​អាស បានធ្វើ​កិច្ចចរចា​កាលពី​ថ្ងៃ​ចន្ទ​ជាមួយ​សម​ភាគី​អ៊ីរ៉ង់​លោក​ចា​វ៉ាដ ហ្សា​រី​ហ្វ ស្តីពី​អនាគត​នៃ​កិច្ចព្រមព្រៀង​នុយក្លេអ៊ែរ​ឆ្នាំ ២០១៥ ដែល​លោក​ពណ៌នា​ថា​មាន “​សារៈសំខាន់​វិសាមញ្ញ​” សម្រាប់​អឺរ៉ុប​។​

​អ្នកយកព័ត៌មាន​រប​ស់​ទីភ្នាក់ងារសារព័ត៌មាន AFP និយាយថា អ្នក​ទាំងពីរ​នាក់​បាន​ចាប់ដៃគ្នា​នៅ​ចំពោះមុខ​កាមេរ៉ា​មុនពេល​ចាប់ផ្តើម​កិច្ចប្រជុំ​បិទទ្វារ​នៅឯ​ក្រសួងការបរទេស​ក្នុង​ទីក្រុង​តេ​ហេ​រ៉ង់​។​

​លោក​ម៉ា​អាស​បាន​ប្រាប់​ក្រុម​អ្នកយកព័ត៌មាន​កាលពី​យប់​ថ្ងៃអាទិត្យ​ទី​៩​មិថុនា​បន្ទាប់ពី​បាន​មកដល់​ក្រុង​តេ​ហេ​រ៉ង់​នៅ​ជើង​ចុងក្រោយ​នៃ​ដំណើរ​ទស្សនកិច្ច​ក្នុង​តំបន់​ដែល​បាន​នាំ​គាត់​ទៅកាន់​អ៊ីរ៉ាក់ ហ្ស៊​កដា​នី និង​អារ៉ាប់​រួម​អេ​មី​រ៉ា​ត យ៉ាង​ដូច្នេះ​ថា កិច្ចព្រមព្រៀង​នុយក្លេអ៊ែរ “​មាន​សារៈសំខាន់​វិសាមញ្ញ​” ចំពោះ​សន្តិសុខ​អឺរ៉ុប​។ ប៉ុន្តែ​លោក​បាន​បន្ថែមថា “​យើង​មិន​ចង់ឱ្យ​អ៊ីរ៉ង់​មាន​អាវុធ​នុយក្លេអ៊ែរ​ទេ​”​។​

​កិច្ចព្រមព្រៀង​នុយក្លេអ៊ែរ ដែល​គេ​ស្គាល់​ថា ផែនការ​សកម្មភាព​រួម​គ្នា​គ្រប់​ជ្រុងជ្រោយ (JCPOA) ត្រូវបាន​ធ្វើឡើង​រវាង​អ៊ីរ៉ង់​និង​មហាអំណាច​ធំៗ ចំនួន​៦​គឺ​អង់គ្លេស ចិន បារាំង អាល្លឺម៉ង់ រុស្ស៊ី និង​សហរដ្ឋ​អាម៉េរិក​នៅ​ឆ្នាំ​២០១៥​។​

​កិច្ចព្រមព្រៀង​នេះ​បានធ្វើឱ្យ​អ៊ីរ៉ង់​កាត់បន្ថយ​នូវ​កម្មវិធី​នុយក្លេអ៊ែរ​របស់ខ្លួន​ដើម្បី​ជា​ថ្នូរ​នឹង​ការ​សម្រាល​ទណ្ឌកម្ម​។ ប៉ុន្តែ​កាលពី​ឆ្នាំមុន​សហរដ្ឋ​អាម៉េរិក​បាន​ដកខ្លួន​ចេញពី​កិច្ចព្រមព្រៀង​នេះហើយ​បានដាក់​ទណ្ឌកម្ម​លើ​អ៊ីរ៉ង់​សាជាថ្មី​។​

​រដ្ឋាភិបាល​ក្រុង​តេ​ហេ​រ៉ង់​បាន​ទទូច​ដល់​អឺរ៉ុប​ឱ្យ​ប្រកាន់ខ្ជាប់​ការសន្យា​ដែល​បានធ្វើ​ឡើង​ក្រោម​កិច្ចព្រមព្រៀង​នេះ​និង​ជួយ​អ៊ីរ៉ង់​ដើម្បី​បញ្ចៀស​ទណ្ឌកម្ម​របស់​អា​ម៉េ​រិ​ក​។ អ៊ីរ៉ង់​ក៏បាន​គំរាម​កាត់បន្ថយ​ការសន្យា​របស់ខ្លួន​អំពី​នុយក្លេអ៊ែរ​ផងដែរ ប្រសិនបើ​ផលប្រយោជន៍​របស់ខ្លួន​មិនត្រូវ​បាន​បំពេញ​។​

​យោងតាម​លោក​ម៉ា​អាស ប្រទេស​អាល្លឺម៉ង់​និង​ដៃគូ​អឺរ៉ុប​របស់ខ្លួន​បាន​ខិតខំ​ប្រឹងប្រែង​ដើម្បី​បំពេញ​តាម​ការសន្យា​របស់ខ្លួន​។​

​លោក​បាន​ទទួលស្គាល់ថា ផលប្រយោជន៍​សេដ្ឋកិច្ច​របស់​តេ​ហេ​រ៉ង់ ដែល​សង្ឃឹម​ទទួលបាន​ពី​កិច្ចព្រមព្រៀង​នេះ ឥឡូវ​គឺ​ពិបាក​ទទួលបាន​ខ្លាំងណាស់ ប៉ុន្តែ​បាន​ជំ​រុញឱ្យ​ប្រទេស​អ៊ីរ៉ង់​គោរព​តាម​កិច្ចព្រមព្រៀង​ឱ្យបាន​ពេញលេញ​។​

​លោក​បាន​និយាយថា វា​គឺ​ស្ថិតនៅក្នុង “​ផលប្រយោជន៍​នយោបាយ​និង​យុទ្ធសាស្ត្រ​របស់​អ៊ីរ៉ង់​ដើម្បី​រក្សា​កិច្ចព្រមព្រៀង​នេះ​និង​កិច្ចពិភាក្សា​ជាមួយ​អឺរ៉ុប​”៕ ដោយ៖ កញ្ញាដាលីស

រដ្ឋមន្ត្រីការបរទេស​អ៊ីរ៉ង់​លោក​ចា​វ៉ាដ ហ្សា​រី​ហ្វ (​ឆ្វេង​) ទទួល​រដ្ឋមន្ត្រីការបរទេស​អាល្លឺម៉ង់​លោក​ហី​កូ ម៉ា​អាស​នៅ​ទីក្រុង​តេ​ហេ​រ៉ង់​កាលពី​ថ្ងៃទី​១០​មិថុនា​ឆ្នាំ​២០១៩
#