រដ្ឋមន្ត្រី​ក្រសួងមហាផ្ទៃ​អំពាវនាវ​ដល់​ក្រុមហ៊ុន​អាជីវកម្ម​ទាំងឡាយ ចូលរួម​ទប់ស្កាត់​-​បង្ក្រាប​ផលិត​ក្លែងក្លាយ​

1691
ចែករម្លែក

​ដោយ​: មុនី​រ័ត្ន / ភ្នំពេញ​: សម្តេច​ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ បាន​អំពាវនាវ​ដល់​ក្រុមហ៊ុន​អាជីវកម្ម​ទាំងឡាយ ពិសេស​អាជីវកម្ម​ដែល​ពាក់ព័ន្ធ​នឹង​គ្រឿងឧបភោគ បរិភោគ គ្រឿងសំអាង សូមមេត្តា​ចូលរួម​ដើម្បី​បង្ការ​ទប់ស្កាត់ និង​បង្ក្រាប​នៅ​ផលិត​ក្លែងក្លាយ​។ ការអំពាវនាវ​នេះ បាន​ធ្វើឡើង​នៅក្នុង​ពិធី​កំទេចចោល​ផលិតផល​ក្លែងក្លាយ​ខុសច្បាប់​ប្រមាណ​ជាង​៦០​តោន នៅ​បរិវេណ​ជាប់​នៅ​សាលាសង្កាត់​បឹង​ជើងឯក ខណ្ឌដង្កោ នា​ព្រឹក​ថ្ងៃទី​៣ ខែមេសា​នេះ​។​

​រដ្ឋមន្ត្រី​ក្រសួងមហាផ្ទៃ ក៏បាន​ឲ្យ​គណៈកម្មការ​ប្រយុទ្ធប្រឆាំង​ផលិតផល​ក្លែងក្លាយ​ត្រូវ​បន្ត​កិច្ចខិតខំ​ប្រឹងប្រែង​រប​ស់​ខ្លួន​ឲ្យ​អស់ពី​កម្លាំងកាយ​ចិត្ត រួមចំណែក​ជាមួយ​ស្ថាប័ន​ពាក់ព័ន្ធ​ដើម្បី​ជួយ​ដល់​សង្គមជាតិ ឲ្យ​រួច​ចាក​ផុត​នៅ​ផលិតផល​ខូចគុណភាព និង​មិនត្រូវ​បណ្តោយ​ឲ្យ​ផលិតផល​ក្លែងក្លាយ​ចរាចរ ចែកចាយ​នៅក្នុង​ប្រទេស​កម្ពុជា​។​

​សម្តេច​ក្រឡាហោម ស ខេង បាន​បញ្ជាក់ថា “…​ផលិត​ក្លែងក្លាយ​នានា មិន​ត្រឹមតែ​ជា​គ្រឿងសំអាង​ក្លែងក្លាយ​ខុសច្បាប់​ប៉ុណ្ណោះ​ទេ ផលិតផល​ក្លែងក្លាយ​ដទៃទៀត ដូចជា ផលិតផល​ឱសថ វេជ្ជសាស្ត្រ អាហារ​បំប៉ន ផលិតផល​ប្រើប្រាស់ និង​គ្រឿងឧបភោគ បរិភោគ ដែល​ប្រជាពលរដ្ឋ​ត្រូវការ​ប្រើប្រាស់​ក្នុង​ជីវភាព​ប្រចាំថ្ងៃ ក៏មាន​ចរាចរ​នៅលើ​ទីផ្សារ​របស់​យើង​ផងដែរ​។ ហេតុនេះហើយ វត្តមាន​គណៈកម្មការ​ប្រយុទ្ធ​ប​ប្រឆាំង​ផលិតផល​ក្លែងក្លាយ​បាន​ដើរតួនាទី​ជាសំខាន់​ក្នុងការ​ត្រួតពិនិត្យ និង​លុបបំបាត់​រាល់​បទល្មើស​ផលិតផល​ក្លែងក្លាយ ដែល​កំពុង​កើតមាន​ក្នុង​ព្រះរាជាណាចក្រ​កម្ពុជា​ឲ្យ​ទទួលបាន​ប្រសិទ្ធភាព​ខ្ពស់​”​។​

​សម្តេច​ក្រឡាហោម​បាន​សង្កត់ធ្ងន់ថា គ្រឿងសំអាង​ក្លែងក្លាយ​ដែល​កិន​កំទេចចោល​នេះ គឺជា​ចំនួន​ដ៏​ច្រើន​សន្ធឹកសន្ធាប់ បើសិនជា​មិនបាន​ទប់ស្កាត់​ឲ្យ​បាន​ទាន់ពេលវេលា​ទេនោះ វា​នឹងត្រូវ​ចែកចាយ​នៅលើ​ទីផ្សារ​នៅក្នុង​ប្រទេស​កម្ពុជា​ទាំងមូល ហើយ​អ្នក​ដែល​ទទួលរង​គ្រោះ គឺ​ប្រជាពលរដ្ឋ​ដែលជា​អ្នកប្រើប្រាស់​។ ហើយ​ខាតបង់​នៅ​ថវិកា​ផង និង​ប៉ះពាល់​ដល់​សុខភាព​យ៉ាងធ្ងន់ធ្ងរ​ផងដែរ និង​ក៏​អាច​ឲ្យ​មាន​គ្រោះថ្នាក់​ដល់​អាយុជីវិត បើសិនណា​ជាការ​ប្រើប្រាស់​នៅ​ផលិតផល​ក្លែងក្លាយ ឬក៏​គ្រឿងសំអាង​ក្លែងក្លាយ វា​អាច​ក្លាយទៅជា​ជំងឺមហារីក ឬ​ជំងឺ​ផ្សេងៗ​ទៀត ក៏​វា​អាច​ប៉ះពាល់​ដល់​អាយុជីវិត​៕ ល​