រដ្ឋមន្ត្រី​សុខាភិបាល​ឲ្យ​អង្គភាព​ក្រោម​ឱវាទ​ផ្តល់​របប​សន្តិសុខ​សង្គម​ផ្នែក​ថែទាំ​សុខភាព​ដោយ​ឥត​បង់ថ្លៃ​ចាប់ពី​ថ្ងៃទី​១ មករា​

89

(​ភ្នំពេញ​)៖ លោក ម៉ម ប៊ុនហេង រដ្ឋមន្ត្រី​ក្រសួងសុខាភិបាល​បាន​បញ្ជា​ឲ្យ​ប្រធាន​អង្គភាព​ក្រោម​ឱវាទ​ក្រសួងសុខាភិបាល​ផ្តល់​របប​សន្តិសុខ​​សង្គម​ផ្នែក​ថែទាំ​សុខភាព​ដោយ​ឥត​បង់ថ្លៃ​នៅ​មូលដ្ឋាន​សុខាភិបាល​សាធារណៈ​ជូន​ដល់​មន្ត្រី​សាធារណៈ អតីតមន្ត្រី​រាជការ និង​អតីត​យុទ្ធ​​ជន ចាប់ពី​ថ្ងៃទី​០១ ខែមករា ឆ្នាំ​២០១៨​។

​យោងតាម​លិខិត​របស់​រដ្ឋមន្ត្រីក្រសួង​សុខាភិបាល ចុះ​ថ្ងៃទី​៣០ ខែធ្នូ បាន​ឲ្យ​ដឹងថា ការផ្តល់សេវា​ថែទាំ​សុខភាព​មូលដ្ឋាន​សុខាភិបាល​សា​ធារ​ណៈ ត្រូវអនុវត្ត​ខ្លឹមសារ​ណែនាំ ដូចតទៅ​៖ នៅ​រាល់ពេល​មកប្រើប្រាស់​សេវា​មន្ត្រី​សាធារណៈ អតីតមន្ត្រី​រាជការ និង​អតីតយុទ្ធជន​ត្រូវ​​បង្ហាញ​ប័ណ្ណសំគាល់ខ្លួន ដែល​ចេញ​ដោយ​អង្គភាព​សា​ម៉ី ឬ​អាជ្ញា​ធរមាន​សមត្ថកិច្ច និង​អត្តសញ្ញាណប័ណ្ណ​សញ្ជាតិ​ខ្មែរ ។

​កញ្ចប់​សេវា​ថែទាំ​សុខភាព​សម្រាប់​មន្ត្រី​សាធារណៈ អតីតមន្ត្រី​រាជការ​និង​អតីតយុទ្ធជន ត្រូវអនុវត្ត​ដូចគ្នា​នឹង​កញ្ចប់​សេវា​ថែ​ទាំង​សុខភាព​​ដែល​កំពុង​អនុវត្ត​បច្ចុប្បន្ន សម្រាប់​កម្មករ និយោជិត​។ មូលដ្ឋាន​សុខាភិបាល​សាធារណៈ​ត្រូវ​កត់ត្រា ន​និង​រក្សាទុក​ឯកសារ​ឬ​បញ្ជីស្នាម​​ចាំបាច់​នានា ដែល​ទាក់ទង​និង​ការប្រើប្រាស់​សេវា​ថែទាំ​សុខភាព​របស់​មន្ត្រី​សាធារណៈ អតីតមន្ត្រី​រាជការ និង​អតីតយុទ្ធជន​សម្រាប់​ការ​​ស្នើសុំ​ទូទាត់​ថ្លៃ​សេវា ពី​ប​បេឡា​របប​សន្តិសុខ​សង្គម​៕​ដោយៈ មុនី​រ័ត្ន​/sn

​លោក​ម៉ម ប៊ុនហេង រដ្ឋមន្ត្រី​ក្រសួងសុខាភិបាល​