រដ្ឋាភិបាល​ជប៉ុន ផ្តល់ជំនួយ​ជិត​១៨​ម៉ឺន​ដុល្លារ សម្រាប់​ស្តារ​ប្រព័ន្ធធារាសាស្ត្រ និង​សហគម​កសិកម្ម​

117
ចែករម្លែក

ដោយ​: សុផល / ភ្នំពេញៈ​រដ្ឋាភិបាល​ជប៉ុន​បាន ផ្តល់ជំនួយ​ជិត​១៨​ម៉ឺន​ដុល្លារ សម្រាប់​គម្រោង​ស្តារ​ប្រព័ន្ធធារាសាស្ត្រ នៅ​ខេត្តកំពង់ចាម​និង​គម្រោង​ពង្រឹង​សហគម​កសិកម្ម នៅ​ខេត្ត​ត្បូងឃ្មុំ​។​

​កិច្ចសន្យា​ផ្តល់ជំនួយ​សម្រាប់​គម្រោង​ទាំងពីរ​ត្រូវបាន​ចុះហត្ថលេខា នា​រសៀល​ថ្ងៃទី​២២ ខែមករា ឆ្នាំ​២០១៩​នេះ នៅ​ស្ថានទូត​ជប៉ុន​ប្រចាំ​កម្ពុជា រវាង​លោក មិ​កា​មិ ម៉ាសា​ហ៊ី​រ៉ូ ឯកអគ្គរាជទូត​វិសាមញ្ញ និង​ពេញ​សមត្ថភាព​របស់​ប្រទេស​ជប៉ុន​ប្រចាំ​កម្ពុជា និង​តំណាង​ស្ថាប័ន​ទទួល​ជំនួយ​ចំនួន​ពីរ គឺ​លោក អ៊ុម វិបុល​ប្រធាន​មន្ទីរ​ធនធានទឹក និង​ឧតុនិយម​ខេត្តកំពង់ចាម និង​លោក ហេង ពិសិដ្ឋ ប្រធាន​មន្ទីរ​កសិកម្ម រុក្ខាប្រមាញ់​និង​នេសាទ​ខេត្ត​ត្បូងឃ្មុំ​។​

​ថ្លែង​ក្នុង​ពិធី​ចុះហត្ថលេខា ឯកអគ្គរាជទូត​ជប៉ុន លោក មិ​កា​មិ ម៉ាសា​ហ៊ី​រ៉ូ បាន​មានប្រសាសន៍ថា​៖ គម្រោង​សម្រាប់​មន្ទីរ​ធនធានទឹក​និង​ឧតុនិយម​ខេត្តកំពង់ចាម រដ្ឋាភិបាល​ជប៉ុន​ផ្តល់​ថវិកា​៨៩,៥០៨ ដុល្លារ​អាម៉េរិក​សម្រាប់​ការស្តារ​ប្រព័ន្ធធារាសាស្ត្រ​នៅ​ឃុំ​ត្រពាំង​ព្រះ ស្រុក​ព្រៃឈរ ខេត្តកំពង់ចាម​។ គម្រោង​នេះ​នឹង​ធានាបាន​នូវ​ការផ្គត់ផ្គង់​ទឹក​ប្រកបដោយ​ប្រសិទ្ធភាព សម្រាប់​វាលស្រែ​និង​ពង្រីក​ដី​កសិកម្ម​ស្រោចស្រព​។ យើង​រំពឹងថា នឹង​ផ្តល់​ផលប្រយោជន៍​ដល់​ប្រជាជន​ក្នុង​តំបន់​ជាង ៥,០០០ នាក់ ដោយ​បង្កើន​ផលិតកម្ម​ដំណាំ​ស្រូវ តាមរយៈ​ស្តារឡើងវិញ​នូវ​ទំនប់ទឹក​ដោយ​ប្រើប្រាស់​ជា​ផ្លូវ​ដើម្បី​ដឹកជញ្ជូន ដំណាំ​កសិកម្ម​ឲ្យ​មាន​ភាពងាយស្រួល​។ លោក​សង្ឃឹម​យ៉ាង​មុតមាំ​ថា គម្រោង​នេះ ធ្វើ​ឲ្យ​ជីវភាព​រស់នៅ​របស់​ពួកគាត់​មាន​ភាពប្រសើរឡើង​។​

​ចំពោះ​គម្រោង​សម្រាប់​មន្ទីរ​កសិកម្ម​រុក្ខាប្រមាញ់​និង​នេសាទ​ខេត្ត​ត្បូងឃ្មុំ រដ្ឋាភិបាល​ជប៉ុន​ផ្តល់​ថវិកា​ប្រមាណ ៨៩,៨០០ ដុល្លារ​អាម៉េរិក សម្រាប់​ពង្រឹង​សហគមន៍​កសិកម្ម​តាមរយៈ​ការសាងសង់​ឃ្លាំង​ស្តុក ដំឡើង​ម៉ាស៊ីន​ស​ម្ងួ​ត​ម្រេច និង​ឧបករណ៍​កែច្នៃ​គ្រាប់ស្វាយចន្ទី ក្នុង​សហគមន៍​កសិកម្ម​ចំនួន​២ នៅ​ស្រុក​មេមត់ និង​មួយទៀត​នៅ​ស្រុក​តំបែរ​ខេត្ត​ត្បូងឃ្មុំ​។ យើង​រំពឹងថា ប្រជាកសិករ​ប្រមាណ ៤៥០​នាក់ ដែលជា​សមាជិក​របស់​សហគមន៍​កសិកម្ម​នឹង​ទទួលបាន​អត្ថប្រយោជន៍​ពី​ការកែលម្អ​គុណភាព​ផលិតផល​កសិកម្ម​រប​ស់​ពួកគេ និង​បន្ថែម​ខ្សែសង្វាក់​តម្លៃ​ឲ្យ​កាន់តែ​ស៊ីជម្រៅ​ក្នុង​អាជីវកម្ម​របស់​សហគម​ន៍​កសិកម្ម​។​

​សូមជម្រាបថា​៖​រដ្ឋាភិបាល​ជប៉ុន​បាន​អនុវត្ត​កម្មវិធី​KUSANONE​នៅ​កម្ពុជា​ចាប់តាំងពី​ឆ្នាំ​១៩៩១​មក ។ រហូតមកដល់​ពេលនេះ​ស្ថានទូត​ជប៉ុន​ប្រចាំ​ប្រទេស​កម្ពុជា​បានផ្តល់​ជំនួយ​ច្រើន ជាង ៦០០​គម្រោង តាមរយៈ​ជំនួយ KUSANONE​។ ទាំងនេះ​បាន​ចូលរួមចំណែក​ដោយផ្ទាល់​ក្នុងការ​លើកកម្ពស់​គុណ​ភាព​នៃ​ជីវភាព​នៅ​កម្រិត​មូលដ្ឋាន​ក្នុងប្រទេស​កម្ពុជា​៕ ល​