រដ្ឋ​ម​ន្ត្រីៈ​រោងចក្រ​ដែល​បិទទ្វារ​រត់ចោល​កម្មករ​មិនឱ្យ​រួចខ្លួន​ទេ​ត្រូវ​តាម​ដល់​ប្រទេស​

1002
ចែករម្លែក

ភ្នំពេញ/​ដោយៈ ដេប៉ូ​
​ ​បន្ទាប់ពី​រោងចក្រ​មួយចំនួន​បាន​បិទទ្វារ​រត់ចោល​កម្មករ​ហើយ​ទុកឱ្យ​រាជរដ្ឋាភិបាល​កម្ពុជា​ដោះស្រាយ​បញ្ហា​ជាមួយ​កម្មករ​រួចមក​នោះ​លោក អ៊ិត សំហេង រដ្ឋមន្ត្រីក្រសួង​ការងារ និង​បណ្តុះបណ្តាល​វិជ្ជាជីវៈ បាន​លើក ឡើង​ថា តទៅ​ក្រសួង​នឹង​មិនឱ្យ​រួចខ្លួន​ទេ ហើយនឹង​ចាត់វិធានការ​តាមផ្លូវ​ច្បាប់​បើទោះបី​ថៅកែ​រោងចក្រ​នោះ​រត់​ទៅដល់​ប្រទេស​ណា​ក៍ដោយ​ត្រូវតែ​តាម​មក​ទទួលខុសត្រូវ​វិញ​។​

លោកអ៊ិត សំហេង

​ ​លោក​រដ្ឋមន្ត្រី បានបញ្ជាក់​ក្រោយ​បញ្ចប់​ក្នុង​ពិធី បិទ​សន្និបាត​បូកសរុប​លទ្ធផល​ការងារ ឆ្នាំ​២០១៧ ទិសដៅ ការងារ ឆ្នាំ​២០១៨ កាល​ល្ងាច​ថ្ងៃទី​១៣ ខែមីនា ឆ្នាំ​២០១៨ កន្លងមក​ថា មាន​រោងចក្រ​ចំនួន​ប្រាំបួន ដែល​ថៅកែ​រត់ ចោល​ហើយ​ត្រូវបាន​ប្រមុខ​រាជរដ្ឋាភិបាល​កម្ពុជា​សម្តេច​តេ​ជោ ហ៊ុន សែន បាន​ដោះស្រាយ​ជូន​កម្មករ​។ ទោះបី​យ៉ា ង​ណា​ក្រសួង​ការងារ​នឹង​ចាត់វិធានការ​ជុំវិញ​បញ្ហា​នេះ​ដោយ​មិន​បណ្តោយឱ្យ​ថៅកែ​រោងចក្រ​រត់ចោល​កម្មករ​ហើយ​ទុកឱ្យ​រាជរដ្ឋាភិបាល​កម្ពុជា​ជា​អ្នកទទួល​រាប់​រង​នោះទេ​។​
​ ​លោក​បាន​បន្តទៀតថា​ដើម្បី​ដោះស្រាយ​បញ្ហា​នេះ​តទៅ​ក្រសួង​នឹង​ត្រៀម​ចេញ​សេចក្តីប្រកាស​កំណត់ឱ្យ​ក្រុម​រោងចក្រ​ធ្វើការ​ទូទាត់​ដល់​ប្រាក់​ទាំង​អតីតភាព​ការងារ​និង​ប្រាក់​ផលប្រយោជន៍​មួយចំនួន​ដល់ក​ម្មករ​ជា​បណ្តើរៗ​រៀងរាល់​មួយខែ​ឬ​បី​ខែម្តង​ដែល​នៅពេល​មាន​បញ្ហា​កើតឡើង រោងចក្រ​មិនចាំបាច់​ជំពាក់​កម្មករ​ច្រើន ដូច​មុន​ទៀត ទេ​។​ក្រៅពីនេះ​ក្រសួង​នឹង​បង្កើត​របប​សន្តិសុខ​សង្គម​ផ្នែក​និកម្មភាព​ដែល​តម្រូវឱ្យ​សហគ្រាស​ទាំងអស់​ត្រូវមាន​កាតព្វកិច្ច​បង់​ថវិកា​ចូលក្នុង​របប​សន្តិសុខ​សង្គម ដែលជា​ប្រាក់​វិភាគទាន​របស់ខ្លួន ដើម្បី​ការពារ​នៅពេល​កើត​បញ្ហា​រោង ចក្រ​បិទទ្វារ​គេ​អាច​ប្រើ​ថវិកា​នេះ​ទូទាត់​ដល់​កម្មករ​បាន​។​
​ ​ទាក់ទិន​ទៅនឹង​ការបិទទ្វារ​របស់​រោង​ចក្រ​នេះ​លោក​រដ្ឋមន្ត្រី​បាន​គូសបញ្ជាក់ថា​ចំពោះ​កម្មករ​ទាំងអស់​ដែល​ជួប​នូវ​បញ្ហា​នេះ​ពួកគេ​មិនបាន​បាត់បង់​នៅ​អតីតភាព​ការងារ​ឬ​បាត់បង់​នូវ​ប្រាក់​សោធន​និវត្តន៍​ណាមួយ​នោះឡើយ​៕MN

#