រាជរដ្ឋាភិបាល កែប្រែ​រយៈពេល​នៃ​ការផ្តល់សេវា​លិខិតឆ្លងដែន​ធម្មតា​គំរូ​ថ្មី ចាប់ពី​ថ្ងៃទី​៦ ខែមិថុនា​

3878
ចែករម្លែក

ដោយ​: ម៉េង​ឆៃ​/​ភ្នំពេញ​: ក្នុង​គោលដៅ​លើកកម្ពស់​ការផ្តល់សេវា​លិខិតឆ្លងដែន​ធម្មតា ជូន​ប្រជាពលរដ្ឋ​ខ្មែរ​ឲ្យ​បាន កាន់​តែមាន​ប្រសិទ្ធភាព​និង​ឆាប់រហ័ស​រាជរដ្ឋាភិបាល​បានសម្រេច​ដាក់​ឲ្យ​ដំណើរការ​សាខា​ផ្តល់​សេវា​លិខិតឆ្លងដែន​ធម្មតា​គំរូ​ថ្មី នៅតាម​ខេត្ត​ចំនួន​បី ទៀត គឺ​ខេត្តបាត់ដំបង ,​ខេត្តបន្ទាយមានជ័យ​និង​ខេត្តកោះកុង​។​ក្នុងនោះ​រាជរដ្ឋាភិបាល ក៏បាន​សម្រេច​កែប្រែ​រយៈ​ពេល​នៃ​ការផ្តល់សេវា​លិខិតឆ្លងដែន​ធម្មតា​គំរូ​ថ្មី​ដែល​នឹង​ចាប់ផ្តើម​ដាក់​ឲ្យ​អនុវត្ត​ចាប់ពី​ថ្ងៃទី​៦ ខែមិថុនា ឆ្នាំ​២០១៨ នេះ​។​

​ការកែប្រែ​រយៈពេល​អតិ​បរមា​នៃ​ការផ្តល់​លិខិតឆ្លងដែន​គំរូ​ថ្មី ត្រូវបាន​ធ្វើឡើង​តាមរយៈ​ប្រកាស​អន្តរ ក្រសួង​ដែល​ចុះ ហត្ថលេខា​ដោយ​រដ្ឋមន្ត្រី​ក្រសួងមហាផ្ទៃ និង​រដ្ឋមន្ត្រីក្រសួង​សេដ្ឋកិច្ច និង​ហិរញ្ញវត្ថុ ចុះ​ថ្ងៃទី​១០ ខែឧសភា​ឆ្នាំ​២០១៨​។​

​បន្ថែម​លើសពីនេះ អគ្គនាយកដ្ឋាន​អត្តសញ្ញាណ​កម្ម របស់​ក្រសួងមហាផ្ទៃ ក៏បាន​ចេញ​សេចក្តីជូនដំណឹង ចុះ​ថ្ងៃទី​១៧ ខែឧសភា ឆ្នាំ​២០១៨ ជម្រាប​ដល់​សាធារណជន អំពី​ការកែប្រែ​រយៈពេល​នៃ​ការផ្តល់សេវា​លិខិតឆ្លង​ដែន​ធម្មតា​គំរូ​ថ្មី ដែល​នឹង​ចាប់ផ្តើម​ដាក់​ឲ្យ​អនុវត្ត​ចាប់ពី​ថ្ងៃទី​៦​ខែមិថុនា​ឆ្នាំ​២០១៨​តទៅ​។​ក្នុងនោះ​រាជរដ្ឋាភិបាល​ក៏បាន​សម្រេច​ដាក់​ឲ្យ​ដំណើរការ​សាខា​ផ្តល់​លិខិតឆ្លងដែន​ធម្មតា​គំរូ​ថ្មី នៅតាម​ខេត្ត​ចំនួន បី ទៀត គឺ​នៅ​សាខា​លិខិតឆ្លងដែន ប្រចាំខេត្ត​បាត់ដំបង សាខា​លិខិតឆ្លងដែន ប្រចាំខេត្ត​បន្ទាយមានជ័យ និង​សាខា​លិខិតឆ្លងដែន ប្រចាំខេត្ត​កោះកុង​។​

​ប្រកាស​អន្តរក្រសួង​និង​សេចក្តីជូនដំណឹង​របស់​អគ្គនាយកដ្ឋាន​អត្តសញ្ញាណ​កម្មបាន​លើក​បង្ហាញ​ពី​ការកែប្រែ​រយៈពេល​នៃ​ការផ្តល់សេវា​លិខិតឆ្លងដែន​ធម្មតា​គំរូ​ថ្មី រួមមាន​៖ ទី​១-​សេវា​ឆាប់រហ័ស រយៈពេល​មួយថ្ងៃ​នៃ​ថ្ងៃ​ធ្វើ​ការងារ សម្រាប់​ការផ្តល់សេវា​នៅ​រាជធានី​ភ្នំពេញ លើកលែងតែ​នៅតាម​បណ្តា​សាខា​លិខិតឆ្លងដែន​ប្រចាំខេត្ត​គឺមាន​រយៈ ពេល បី ថ្ងៃ នៃ​ថ្ងៃ​ធ្វើ​ការងារ​។ ទី​-​សេវា​ឆាប់រហ័ស​កម្រិត​មធ្យម​ប្តូរ​ពី​រយៈពេល​១០​ថ្ងៃ​មក​ត្រឹម​ប្រាំពីរ​ថ្ងៃ​នៃ ថ្ងៃ​ធ្វើ​ការងារ និង​ទី​៣-​សេវា​ធម្មតា ប្តូរ​ពី​រយៈពេល ២០ ថ្ងៃ មក​ត្រឹម ១៥ ថ្ងៃ នៃ​ថ្ងៃ​ធ្វើ​ការងារ​។​

​សម្រាប់​តម្លៃ​សេវា​ក្នុងការ​ធ្វើលិខិត​ឆ្លងដែន​មិន​ត្រូវបាន​កែប្រែ​ទេ​ពោលគឺ​មានតម្លៃ​ដដែល​ស្របតាម​ប្រកាស​អន្តរក្រសួង ចុះ​ថ្ងៃទី​៣០ ខែធ្នូ ឆ្នាំ​២០១៦ ដែលមាន ២ ប្រភេទ រួមមាន​៖ ការផ្តល់​លិខិតឆ្លងដែន​គំរូ​ថ្មី សម្រាប់​មនុស្ស​ចាស់ ៦៤ ទំព័រ រាប់​ចាប់ពី​អាយុ ៦​ឆ្នាំ​ឡើង គឺ​សេវា​ធម្មតា ថ្លៃ ១០០ ដុល្លារ រយៈពេល​អតិបរមា សម្រាប់​ផ្តល់​សេវា ចំនួន ១៥ ថ្ងៃ នៃ​ថ្ងៃ​ធ្វើ​ការងារ ដោយមាន​សុពលភាព ១០​ឆ្នាំ​។ សេវា​ឆាប់រហ័ស​កម្រិត​មធ្យម តម្លៃ ១៥០ ដុល្លារ រយៈពេល​អតិបរមា សម្រាប់​ផ្តល់​សេវា ចំនួន ៧ ថ្ងៃ នៃ​ថ្ងៃ​ធ្វើ​ការងារ ដោយមាន​សុពលភាព ១០​ឆ្នាំ និង​សេវា​ឆាប់រហ័ស តម្លៃ ២០០ ដុល្លារ រយៈពេល​អតិបរមា សម្រាប់​ផ្តល់​សេវា ចំនួន ១ ថ្ងៃ នៃ​ថ្ងៃ​ធ្វើ​ការងារ ដោយមាន​សុពលភាព ១០​ឆ្នាំ​។ ចំណែក​ការផ្តល់​លិខិតឆ្លងដែន​គំរូ​ថ្មី សម្រាប់​កូនក្មេង ៤៨ ទំព័រ រាប់​ចាប់ពី​អាយុ ០ ឆ្នាំ ដល់​អាយុ ៥​ឆ្នាំ គឺ​សេវា​ធម្មតា តម្លៃ ៨០ ដុល្លារ រយៈពេល​អតិបរមា សម្រាប់​ផ្តល់​សេវា ចំនួន ១៥ ថ្ងៃ នៃ​ថ្ងៃ​ធ្វើ​ការងារ ដោយមាន​សុពលភាព ៥​ឆ្នាំ​។ សេវា​ឆាប់រហ័ស​កម្រិត​មធ្យម តម្លៃ ១២០ ដុល្លារ រយៈពេល​អតិបរមា សម្រាប់​ផ្តល់​សេវា ចំនួន ៧ ថ្ងៃ នៃ​ថ្ងៃ​ធ្វើ​ការងារ ដោយមាន​សុពលភាព ១០​ឆ្នាំ និង​សេវា​ឆាប់រហ័ស តម្លៃ ១៦០ ដុល្លារ រយៈពេល​អតិបរមា សម្រាប់​ផ្តល់​សេវា ចំនួន ១ ថ្ងៃ នៃ​ថ្ងៃ​ធ្វើ​ការងារ ដោយមាន​សុពលភាព ៥​ឆ្នាំ​។​

​សូម​រម្លឹកថា សព្វថ្ងៃនេះ កន្លែង​ផ្តល់​សេវា ធ្វើលិខិត​ឆ្លងដែន មានតែ​មួយកន្លែង​ប៉ុណ្ណោះ គឺ​នៅ​នាយកដ្ឋាន​លិខិត​ឆ្លង ដែន ដែល​ស្តិ​ត​នៅ​ភូមិ​តា​ង៉ូ​វ សង្កាត់​និរោធ ខណ្ឌ​ច្បារអំពៅ រាជធានី​ភ្នំពេញ​។ ក៏ប៉ុន្តែ​ចាប់ពី​ថ្ងៃទី​៦ ខែ​ឧសភា​​​តទៅ រាជរដ្ឋាភិបាល បានសម្រេច​ដាក់​ឲ្យ​ដំណើរការ​សាខា​ផ្តល់​សេវា​លិខិតឆ្លងដែន​ធម្មតា​គំរូ​ថ្មី នៅតាម​ខេត្ត ៣ ទៀត គឺ​ខេត្តបាត់ដំបង បន្ទាយមានជ័យ និង​ខេត្តកោះកុង​៕​មន​