លោក​រដ្ឋមន្ត្រី​ស្នើ​សមាជិក​អាស៊ាន​ខំប្រឹង​បង្កើត​ផលិតផល​ទេសចរណ៍​ថ្មីៗ និង​ពង្រីក​ការហោះហើរ​ត្រង់ ដើម្បី​ទាក់ទាញ​ទេសចរ​បន្ថែម​

396
ចែករម្លែក

ដោយ​: មូល​សម្បត្តិ​
​ភ្នំពេញ​:
លោក ថោង ខុន រដ្ឋមន្ត្រី​ក្រសួងទេសចរណ៍​កម្ពុជា បានស្នើ​ដល់​ប្រទេស​ជា​សមាជិក​អាស៊ាន​ទាំងអស់​ត្រូវខិតខំ​បង្កើត​ផលិតផល​ទេសចរណ៍​ថ្មីៗ និង​ពង្រីក​ការហោះហើរ​ត្រង់​បន្ថែម​ឱ្យបាន​ច្រើន​តាម​ដែល​អាចធ្វើ​ទៅបាន ដើម្បី​ទាក់ទាញ​ភ្ញៀវទេសចរ​ឱ្យបាន​កាន់តែច្រើន ព្រមទាំង​ត្រូវ​ដោះស្រាយ​បញ្ហា​ប្រឈម​នានា​មួយចំនួនទៀត​ផងដែរ​។​

​ការលើកឡើង​នេះ ត្រូវបាន​ធ្វើឡើង​ក្នុងឱកាស​ដែល លោក​រដ្ឋមន្ត្រី​អញ្ជើញ​ជា​អធិបតីភាព ក្នុង​ពិធី​បើក​កិច្ចប្រជុំ​កម្រិត​អគ្គនាយក​ទេសចរណ៍​អាស៊ាន​លើក​ទី​៥០ (ASEAN NTOs) ជា​ផ្លូវការ នៅ​សណ្ឋាគារ​បុរី​អង្គរ ខេត្តសៀមរាប ដោយមាន​ការចូលរួម​ពី​លោក ទៀ សីហា អភិបាលខេត្ត​សៀមរាប និង​លោក PG Kamalrudzaman Haji Mohd Ishak អគ្គលេខាធិការ​នៃ​ក្រសួង​ធនធាន​ឧស្សាហកម្ម និង​ទេសចរណ៍​នៃ​ប្រទេស​ព្រុយណេ ដែលជា​ប្រធាន​អង្គប្រជុំ ASEAN NTOs លើក​ទី​៥០ និង​កិច្ចប្រជុំ​ពាក់ព័ន្ធ​។​

​ការលើកឡើង​នេះ​ក៏​មិន​ខុសពី​អ្វីដែល​លោក​រដ្ឋមន្ត្រី​រូបនេះ តែងតែ​ជំរុញ​ដល់​ភាគី​ពាក់ព័ន្ធ​នៅ​កម្ពុជា​ឱ្យចូល​រួម​ជំរុញ​នូវ​កិច្ចសហប្រតិបត្តិការ ក្នុងការ​អភិវឌ្ឍន៍​វិស័យ​ទេសចរណ៍​ជាតិ​នោះឡើយ ដោយ​លោក​តែងតែ​លើកទឹកចិត្ត​ឱ្យមាន​ការបង្កើត​ផលិតផល​ទេសចរណ៍​ថ្មីៗ និង​ទាក់ទាញ​ការតភ្ជាប់​ការហោះហើរ​ត្រង់​ពី​បណ្ដា​ប្រទេស​គោលដៅ​នានា​ជារឿយៗ​។​

​ក្នុង​ពិធី​បើក​កិច្ចប្រជុំ ASEAN NTOs នេះ លោក បាន​ឆ្កឹះ​អំពី​បញ្ហា​ប្រឈម​មួយចំនួន​ដែល​ប្រទេស​ជា​សមាជិក​អាស៊ាន ត្រូវមាន​កិច្ចសហប្រតិបត្តិការ​ដោះស្រាយ​រួមគ្នា ក្នុងនោះ​ត្រូវ​ជំរុញ​ការធ្វើដំណើរ​ទស្សនា​កម្សាន្ត​ផ្ទៃក្នុង​អាស៊ាន​ឱ្យបាន​ផុសផុល​ឡើង សំដៅ​ធ្វើយ៉ាងណា​ឱ្យទទួល​បាន​កំណើន​ជា​មធ្យម ៤% ក្នុង​មួយឆ្នាំ និង​ជំរុញ​ឱ្យ​ទេសចរ​អាចធ្វើ​ដំណើរ​ទ​ស្សនា​កម្សាន្ត​បាន​ដោយ​ខ្លួនឯង ពិសេស​ដំណើរ​កម្សាន្ត​ឆ្លង​ប្រទេស​។​

លោក បាន​សម្លឹង​ឃើញ​ពី​សក្ដានុពល​នៃ «​ទេសចរណ៍​ម្ហូបអាហារ​» យូរ​មកហើយ ដោយ​ក្នុង​កិច្ចប្រជុំ​ខាងលើ​នេះដែរ ឱ្យ​អង្គប្រជុំ ASEAN NTOs រួមគ្នា​ពិភាក្សា​ពី​ចំណុច​ដ៏​សំខាន់​មួយ​នេះ សំដៅ​ធ្វើ​យ៉ាង​សម្រេច​ឱ្យបាន​នូវ «​ស្ដង់ដា​រទេសចរណ៍​ម្ហូបអាហារ​អាស៊ាន​» នេះ​ឱ្យបាន​។​

​ដោយសារតែ​នៅ​តំបន់​អាស៊ាន​សម្បូរ​ទៅដោយ​ធនធានធម្មជាតិ វប្បធម៌​រូបិយ​-​អ​រូបិយ ដែល​អំណោយផល​ដល់​ការអភិវឌ្ឍន៍​វិស័យ​ទេសចរណ៍​ក្នុង​តំបន់ ឱ្យក្លាយ​ទៅជា​ផលិតផល​ដ៏​ល្អ​ឯក និង​ផ្ដល់នូវ​ការចងចាំ​ដ៏​ជក់ចិត្ត​ដល់​ទេសចរ ដូច្នេះហើយ​បានជា​លោក ថោង ខុន ជំរុញ​លើក​ទឹក​ដល់​ប្រទេស​សមាជិក​អាស៊ាន ត្រូវធ្វើ​យ៉ាងណា​បង្កើត​ផលិតផល​ទេសចរណ៍​ថ្មីៗ​ឱ្យបាន​ច្រើន ដើម្បី​ទាក់ទាញ​ទេសចរ​ឱ្យមក​ទស្សនា​កើនឡើង​កាន់តែច្រើន​ថែមទៀត​។​

​លោក បាន​ថ្លែងអំណរគុណ​ដល់​ប្រទេស​ហ្វីលីពីន និង​ឥណ្ឌូនេស៊ី​ផងដែរ ដែល​បាន​ត​ភ្ជាប់​ជើងហោះហើរ​ត្រង់​មក​កម្ពុជា ដែល​នេះ​ជាការ​រួមចំណែក​ដល់​ការជំរុញ​ចរន្ត​ភ្ញៀវទេសចរ​ពីគ្នា​ទៅវិញទៅមក​។​

​តាម​របាយការណ៍​បាន​បង្ហាញថា ពេញ​មួយឆ្នាំ​២០១៨ តំបន់​អាស៊ាន​ទាំងមូល​ទទួលបាន​ភ្ញៀវទេសចរ​ប្រមាណ ១៣៥​លាន​នាក់ កើនឡើង ៧,៦%​។​

​បើតាម លោក ទ្រី ឈី​វ ប្រធាន​នាយកដ្ឋាន​សហប្រតិបត្តិ​ការ​អន្តរជាតិ និង​អាស៊ាន នៃ​ក្រសួងទេសចរណ៍ កិច្ចប្រជុំ ASEAN NTOs នេះ​ផ្ដោត​សំខាន់​លើ​ការអភិវឌ្ឍ​ទេសចរណ៍​ក្នុង​តំបន់​អាស៊ាន ក្នុងនោះ​មានការ​ត្រួតពិនិត្យ​លទ្ធផល​ការងារ ដែល​បាន​អនុវត្ត​តាំងពី​ឆ្នាំ​២០១៦ និង​ដាក់ចេញ​ទិសដៅ​ការងារ​បន្ត​រហូត​ទៅដល់​ឆ្នាំ​២០២៥​។​

​ក្រៅពីនោះ មានការ​ជំរុញ​កិច្ចសហប្រតិបត្តិការ​ក្នុង​ក្របខណ្ឌ​អាស៊ាន និង​គម្រោង​អភិវឌ្ឍន៍​នានា ដែល​ចូលរួម​ដល់​ការអភិវឌ្ឍន៍​ក្នុង​តំបន់​អាស៊ាន​ទាំងមូល ក៏ដូចជា​វិស័យ​ទេសចរណ៍​កម្ពុជា តាមរយៈ​ការផ្លាស់ប្ដូរ​បទពិសោធ​ន៍ និង​ការអនុវត្ត​ស្តង់ដា​គុណភាព​អាស៊ាន​រួម និង​ការបណ្ដុះបណ្ដាល​ធនធាន​មនុស្ស ស្របតាម​កម្មវិធី​បណ្ដុះ​បណ្ដាល​ស្ដង់ដា​អាស៊ាន​។​

​សូមជម្រាបថា កិច្ចប្រជុំ ASEAN NTOs ខាងលើ មាន​រយៈពេល​៣​ថ្ងៃ ចាប់ពី​ថ្ងៃទី​១០-១២ ខែកក្កដា ឆ្នាំ​២០១៩​។ ក្រៅពី​កិច្ចប្រជុំ ASEAN NTOs អាស៊ាន​នេះ ក៏មាន​កិច្ចប្រជុំ ASEAN NTOs បូក​៣ ដែលមាន​ប្រទេស​ចិន ជប៉ុន និង​កូរ៉េខាងត្បូង ហើយ​នឹងមាន​កិច្ចប្រជុំ​ក្នុង​ក្របខ័ណ្ឌ​មជ្ឈមណ្ឌល​អាស៊ាន​-​ចិន មជ្ឈមណ្ឌល​អាស៊ាន​-​ជប៉ុន និង​មជ្ឈមណ្ឌល​អាស៊ាន​-​កូរ៉េខាងត្បូង ព្រមទាំង​មាន​កិច្ចប្រជុំ​ជាមួយ​ដៃគូ​សន្ទនា​ផ្សេងទៀត​ផងដែរ​៕ ល​/សរន

#