លោក ស៊ិ​ក ប៊ុន​ហុក ថា គ​.​ជ​.​ប គ្មាន​សិទ្ធិ​ស្នើ​ធ្វើ​វិសោធនកម្ម​ច្បាប់បោះឆ្នោត ឲ្យ​ពលរដ្ឋ​រស់នៅ​ក្រៅប្រទេស​អាច​បោះឆ្នោត​បានទេ​

869
ចែករម្លែក

(​ភ្នំពេញ​) ៖ លោក ស៊ិ​ក ប៊ុន​ហុក ប្រធាន​គណៈកម្មាធិការ​ជាតិ​រៀបចំ​ការបោះឆ្នោត (​គ​.​ជ​.​ប​) បានប្រកាសថា​ពាក់ព័ន្ធ​រឿង​ធ្វើ​វិសោធន​​កម្ម​ច្បាប់ ស្ដីពី​ការបោះឆ្នោត​នោះ គ​.​ជ​.​ប គ្មាន​សមត្ថកិច្ច​ស្នើ​ទៅ​រដ្ឋសភា​បានទេ ព្រោះ​ផ្ទុយ​ពីបទ​បញ្ញត្តិ​ច្បាប់​ជា​ធរមាន ការងារ​ទាំងអស់ គឺ គ​.​ជ​.​ប អនុវត្ត​ទៅតាម​ច្បាប់​សុទ្ធសាធ ហើយ​លោក​បាន​ចង្អុល​ប្រាប់ថា អ្នក​ដែលមាន​សិទ្ធិ​តាមច្បាប់​នោះ គឺ​ក្រុម​អ្នកតំណាងរាស្ត្រ​។​


​ ​
​ប្រតិកម្ម​របស់​ប្រធាន​គ​.​ជ​.​ប បែបនេះ បន្ទាប់ពី​មានការ​ស្នើ​ពី​សំណាក់​អង្គការ​សង្គម​ស៊ីវិល និង​គណបក្សនយោបាយ​មួយចំនួន​ចេះតែ​ទទូច​ឲ្យ ស្ថាប័ន គ​.​ជ​.​ប ស្នើ​ទៅកាន់​រដ្ឋសភា សុំ​ធ្វើ​វិសោធនកម្ម​ច្បាប់បោះឆ្នោត ដើម្បី​ឲ្យ គ​.​ជ​.​ប​ចុះឈ្មោះ​បោះឆ្នោត​ឲ្យ​ពលករ​ខ្មែរ​ដែល​​កំពុងធ្វើការ និង​រស់នៅ​ក្រៅប្រទេស និង​តម្រូវ​ឲ្យ​ពួកគាត់ មាន​សិទ្ធិ​បោះឆ្នោត​នៅក្រៅ​ប្រទេស បាន​ដូច​ប្រជាពលរដ្ឋនៅក្នុង​ប្រទេស​ដែរ​។​
​ ​
​ក្នុង​កិច្ចប្រជុំ​ពិគ្រោះ​យោបល់​អំពី​សេចក្ដីព្រាង​បទបញ្ជា និង​នីតិវិធី​សម្រាប់​ការធ្វើ​បច្ចុប្បន្នភាព បញ្ជី​បោះឆ្នោត​និង​ការចុះឈ្មោះ​បោះ​​ឆ្នោត ឆ្នាំ​២០១៧ នៅ​ភោជនីយដ្ឋាន​ទន្លេបាសាក់​២ នា​ព្រឹក​ថ្ងៃទី​០៣ ខែសីហា ឆ្នាំ​២០១៧​នេះ លោក ស៊ិ​ក ប៊ុន​ហុក បាន​ថ្លែង​យ៉ាង​ដូច្នេះ​ថា “​ខ្ញុំ​សូម​បកស្រាយ​នូវ​ចម្ងល់​មួយចំនួន ដែល​បានលើកឡើង​កន្លងមក ពាក់ព័ន្ធ​នឹង​ការចុះឈ្មោះ​បោះឆ្នោត អ្នក​នៅក្រៅ​ប្រទេស​។​ខ្ញុំ​សូម​​ឆ្លើយ​ឲ្យ​ហើយ ដើម្បី​កុំ​ឲ្យ​មានការ​ស្រពិចស្រពិល ព្រោះ​ការដឹកនាំ គ​.​ជ​.​ប បច្ចុប្បន្ននេះ ជាការ​ដឹកនាំ​មួយ​ដែល​អនុវត្ត​ទៅតាម​រដ្ឋធម្មនុញ្ញ ទៅតាម​ច្បាប់បោះឆ្នោត ហើយ​និង​ទៅតាម​ច្បាប់​ជា​ធរមាន​នានា មិនអាច​ប្រាស​ចាស​បានទេ នេះហើយ​ជាការ​កម្រិត​សកម្មភាព​របស់ គ​.​ជ​.​ប ធ្វើតាម​បច្ចេកទេស​ស្របទៅតាម​ច្បាប់​”​។​
​ ​
​លោក​បាន​បន្ដថា គ​.​ជ​.​ប មិនបាន​បំបិទ​សិទ្ធិ​ប្រជាពលរដ្ឋ​ដែលមាន​សិទ្ធិ​បោះឆ្នោត ដូច​ការលើកឡើង​រប​ស់​មជ្ឈដ្ឋាន​មួយចំនួន​នោះទេ តែ​វា​ជាការ​អនុវត្ត​ទៅតាម​ច្បាប់​សុទ្ធសាធ ពិសេស​គឺ​អនុវត្តតាម​រដ្ឋធម្មនុញ្ញ ដែលជា​ច្បាប់កំពូល​របស់​កម្ពុជា​។​
​ ​
​លោក​ប្រធាន​បានលើកឡើង​ពី ទិដ្ឋភាព​ច្បាប់​ពាក់ព័ន្ធ​នានា ដែល​សុទ្ធតែ​កំណត់​នូវ​សិទ្ធិ និង​ករណី​កិច្ច​របស់​ប្រជាពលរដ្ឋ និង​ស្ថាប័ន គ​.​ជ​.​ប ផ្ទាល់ ហើយ​បាន​បញ្ជាក់ថា បើ​នៅតែ​ទទូច​ឲ្យ គ​.​ជ​.​ប ធ្វើ​សេចក្ដីស្នើ​ធ្វើ​វិសោធនកម្ម​ច្បាប់​ទៅ​រដ្ឋសភា​ទៀត​នោះ ដូច​ឲ្យ គ​.​ជ​.​ប ប្រព្រឹត្ត​ខុសច្បាប់​យ៉ាង​អីចឹង ព្រោះ​ការស្នើ​ធ្វើ​វិសោធនកម្ម​ច្បាប់​ណាមួយ មានតែ​ក្រុម​អ្នកតំណាងរាស្ត្រ​ទេ ដែលមាន​សិទ្ធិ និង​សមត្ថកិច្ច​ផ្លូវច្បាប់​ធ្វើ​កិច្ចការ​នេះ​៕​ដោយ​៖​វិបុល​/sn