វគ្គបណ្តុះបណ្តាលអ្នកបន្តវេនបច្ចេក​​ទេសជួសជុលអភិរក្សសំណង់ប្រា​​​សាទ​​ឥដ្ឋ

137
ចែករម្លែក

ដោយ:គូលែន/សៀមរាប ៖ ដើម្បីសង្គ្រោះមរតកវប្បធម៌បុរាណឱ្យរួចផុតពីហានិភ័យធ្ងន់ធ្ងរនិងបន្សល់ចំណេះដឹងថែរក្សាប្រាសាទឥដ្ឋដល់អ្នកជំនាន់ក្រោយផងនោះ អាជ្ញាធរជាតិអប្សរាបានរៀបចំបណ្តុះបណ្តាលនៅក្នុងខែវិច្ឆិកាអំពី «អ្នកបន្តវេនបច្ចេកទេសអភិរក្សប្រាសាទឥដ្ឋ» ដល់មន្ត្រី-បុគ្គលិក កម្មករដែលបម្រើការនៅក្នុងឧទ្យានអង្គរ។នេះគឺជាការបញ្ជាក់អោយដឹងពីមន្ត្រីអាជ្ញាធរជាតិអប្សរា នាថ្ងៃទី០៣ ខែធ្នូ ឆ្នាំ២០១៩នេះ។

មន្ត្រីអាជ្ញាធរជាតិអប្សរា បានបញ្ជាក់ថា សំណង់ប្រាសាទឥដ្ឋនៅក្នុងតំបន់អង្គរ បានរលុះបាក់បែកជាច្រើនដោយសារអាយុកាលនៃសំណង់ វត្ថុធាតុដើមអស់គុណភាព ការប្រែប្រួលអាកាសធាតុ រុក្ខជាតិដុះលើ កង្វះការថែទាំទាន់ពេលវេលា និងភាពខ្សត់ខ្សោយនៃអ្នកជំនាញអភិរក្សប្រាសាទឥដ្ឋ។

មន្ត្រីដដែល បានបន្តថា វគ្គបណ្តុះបណ្តាលនេះបង្រៀនដោយអ្នកជំនាញនិងកម្មករដែលមានបទពិសោធន៍ច្រើនឆ្នាំក្នុងការជួសជុលប្រាសាទឥដ្ឋកន្លងមក ក្នុងគោលបំណងបន្តចំណេះជំនាញទៅមន្ត្រី បុគ្គលិក កម្មករថ្មីៗដែលមានបទពិសោធន៍តិច ដើម្បីបង្កើនសមត្ថភាពរួមគ្នាក្នុងការជួសជុលអភិរក្សប្រាសាទឥដ្ឋ និងបង្កើតអ្នកបន្តវេនជួសជុលឱ្យមានកាន់តែច្រើន ព្រោះភាពខូចខាតនៃសំណង់ប្រាសាទបុរាណនៅតែមាននាថ្ងៃអនាគត។

ក្នុងការបង្រៀន គឺមានទាំងទ្រឹស្តីទូទៅក្នុងការជួសជុលប្រាសាទឥដ្ឋនិងការអនុវត្តជាក់ស្តែងនៅតាមការដ្ឋានជួសជុល (ប្រាសាទលលៃ) ដែលរួមមាន វិធីសាស្ត្រក្នុងការតឥដ្ឋ និងរូបមន្តផ្សំសារធាតុដើម្បីប្រើប្រាស់ជាស៊ីម៉ង់ត៍ក្នុងការតភ្ជាប់ឥដ្ឋដើម្បីជួសជុលប្រាសាទបុរាណ៕B/