វេទិកា​ថ្នាក់រៀន​ស្តីពី «​សារសំខាន់​នៃ​ការសិក្សា​ប្រវត្តិសាស្ត្រ​កម្ពុជា​ប្រជាធិបតេយ្យ (១៩៧៥-៧៩) លើក​ទី​៣២ នៅ​វិទ្យាល័យ ហ៊ុន សែន បូរី ១០០​ខ្នង​

729

ដោយៈ​មជ្ឈមណ្ឌល​ឯកសារ​កម្ពុជា
​ថ្ងៃទី​៨ ខែឧសភា ឆ្នាំ​២០១៨ ក្រុមការងារ​កម្មវិធី​សិក្សាអប់រំ​អំពី​អំពើ​ប្រល័យពូជសាសន៍​នៅ​កម្ពុជា បាន​ប្រារព្ធ​ធ្វើ​វេទិកា​ថ្នាក់រៀន ស្តីពី «​សារសំខាន់​នៃ​ការសិក្សា​ប្រវត្តិសាស្ត្រ​កម្ពុជា​ប្រជាធិបតេយ្យ (១៩៧៥-១៩៧៩) លើក​ទី​៣២ នៅ​វិទ្យាល័យ ហ៊ុន សែន បូរី​១០០ ខ្នង ដោយមាន​ការសហការ​ពី​ក្រសួង​អប់រំ យុវជន និង កីឡា និង​ការអនុញ្ញាត​ពី​នាយក​វិទ្យាល័យ​ផ្ទាល់​។ កម្មវិធី​ប្រព្រឹត្តទៅ​នៅ​ម៉ោង ៨ និង​៣០​នាទី​ព្រឹក ដោយមាន​ការចូលរួម​ពី​សិស្ស​ផ្នែក​សង្គមវិទ្យា​ចំនួន ៦០​នាក់​។

​ជា​កិច្ច​ចាប់ផ្តើម​កម្មវិធី និង​ជា​កិច្ច​ស្វាគមន៍​លោកនាយ​ករង ម៉ី សុមា​នី បាន​មានប្រសាសន៍ថា វិទ្យាល័យ ហ៊ុន សែន បូរី​១០០​ខ្នង កាលពី​របប​ខ្មែរក្រហម ជា​កន្លែង​ចិញ្ចឹម​ជ្រូក​របស់​សហករណ៍ ហើយ​ក្រោយមក​ដោយមាន​ការ​ផ្ដួ​ម​ផ្តើម​ពី​ឃុំ​សង្កាត់ នៅ​ឆ្នាំ​១៩៨២ ក៏បាន​បង្កើត​ទៅជា​អនុវិទ្យាល័យ បូរី​១០០ ខ្នង ដែលមាន​អាគារ​តែមួយ​ប៉ុណ្ណោះ​។ ឆ្នាំ​១៩៩៨ ដោយមាន​ការឧបត្ថម្ភ​ពី​សម្បុរ​សជន និង​រដ្ឋ យើង​បាន​កសាង​អាគារ​បន្ថែមទៀត​។ នៅ​ឆ្នាំ​២០១០ ដោយមាន​កំណើន​កូនសិស្ស​ខ្ពស់ និង​ដើម្បី​ជាការ​ងាយស្រួល​ដល់​សិស្សានុសិស្ស សាលា​នៅ​ត្រូវបាន​ប្រែ​ពី​អនុវិទ្យាល័យ​ទៅជា​វិទ្យាល័យ ហ៊ុន សែន បូរី​១០០ ខ្នង រហូតដល់​សព្វថ្ងៃ​។

​បច្ចុប្បន្ន​សាលា​មានកូន​សិស្ស​សរុប​ទាំងអស់​ចំនួន ៤២៧​នាក់ ដោយមាន​បែង ចែកជា​ពីរ​ផ្នែក «​ផ្នែក​សង្គមវិទ្យា និង វិទ្យាសាស្ត្រ​» សង្គមវិទ្យា​មាន​ចំនួន​២០៥ នាក់​។ ក្នុងចំណោម​២០៥ នាក់ ក្នុងនោះ មាន​៦០​នាក់ បានមក​ចូលរួម​វេទិការ​ថ្នាក់រៀន​។​

សិស្សានុសិស្ស​នៃ​វិទ្យាល័យ ហ៊ុន សែន បូរី​១០០​ខ្នង កំពុង​បំពេញ​តារាង​វាស់​ស្ទង់​ចំណេះដឹង​ក្រោយ​វេទិកា​ថ្នាក់រៀន​។ (​រូប​៖ មជ្ឈមណ្ឌល​ឯកសារ​កម្ពុជា​)

​បន្ទាប់មក លោក ផេង ពង្ស​រ៉ាស៊ី បាន​ឡើង​ណែនាំ​ខ្លួន និង​ក្រុមការងារ​ជូន​លោកគ្រូ​អ្នកគ្រូ ព្រមទាំង​សិស្សានុសិស្ស ពី​គោលបំណង និង​សារសំខាន់​ក្នុងការ​បង្រៀន​ពី​ប្រវត្តិសាស្ត្រ​កម្ពុជា​ប្រជាធិបតេយ្យ ដើម្បី​ជាការ​ចង់ចាំ ផ្សះផ្សា រក​យុត្តិធម៌ ជូន​ដល់​ជនរងគ្រោះ ព្រមទាំង​បន្ថែម​នូវ​ចំណេះដឹង​ផ្នែក​សិទ្ធិមនុស្ស​។ ដោយ​លោក​បាន​បែងចែក​កម្មវិធី​ទៅជា​ប្រាំមួយ ដំណាក់កាល​។ មានដូចជា​៖
​ ​១) ការ​ឲ្យ​កូនសិស្ស​ឆ្លើយ​នឹង​តារាង​វាស់​ស្ទង់​ចំណេះដឹង​មុនពេល​ចាប់ផ្តើម​បង្រៀន​
​ ​២) ការ​ឲ្យ​កូនសិស្ស​មាន​សកម្មភាព ដោយ​ឡើង​សរសេរ​ពីអ្វី​ដែល​ខ្លួន​បានដឹង និង​អ្វីដែល​ខ្លួន​ចង់ដឹង​?
​ ​៣) ការ​បញ្ចាំង​ខ្សែ​វីដេអូ «​កុមារ​កម្ពុជា​» ដែល​បង្ហាញ​ពី​ស្ថានភាព​រស់នៅ​កុមារ​ក្រោយ​ការ​ដួល រលំ​របប​ខ្មែរក្រហម​
​ ​៤) បទ​បង្ហាញ​ពី​ប្រវត្តិសាស្ត្រ​កម្ពុជា​ប្រជាធិបតេយ្យ​ដោយ​សង្ខេប​
​ ​៥) ការបើក​ឲ្យ​សិស្ស សួរ​សំណួរ និង​ឆ្លើយ​
​ ​៦) ការកូន​សិស្ស​ឆ្លើយ​នឹង​តារាង​វាស់​ស្ទង់​ចំណេះដឹង​ក្រោយ​ចប់​កម្មវិធី​។​
​ ​
​តាម​ការសង្កេត​ក្នុង​សាលប្រជុំ​សិស្សានុសិស្ស​មាន​ភាព​យក​ចិត្ត​ទុកដាក់​ស្ដាប់​ការធ្វើ​បទ​បង្ហាញ យ៉ាងខ្លាំង ព្រមទាំង​កក់​ត្រា​យ៉ាង​ស្ងៀមស្ងាត់​។ ខ្ញុំ​បានធ្វើ​ការសាកសួរ​ទៅកាន់​ប្អូន គឹម សម្បត្តិ អាយុ​១៧​ឆ្នាំ ដែល​អង្គុយ​ទល់មុខ​ខ្ញុំ​ជាមួយ​សំណួរ​ថា តើ​យល់​យ៉ាងម៉េច​ដែរ​ពេល​មក​រៀន​ពី​ប្រវត្តិសាស្ត្រ​កម្ពុជា​ប្រជាធិបតេយ្យ​? គាត់​បាន​ឆ្លើយ​មកវិញ​ថា «​ពីមុន ខ្ញុំ​មិនសូវ​ចាប់អារម្មណ៍ មិន​ចង់ដឹង​ពី​របប​ខ្មែរក្រហម ព្រោះ​គិតថា​វា​គ្រាន់តែ​ជា​រឿង​នយោបាយ ហើយ​ខ្ញុំ​ជា​ក្មេង​កើត​ក្នុងសម័យ​ទំនើប​គួរតែ​សប្បាយរីករាយ​នឹង​អ្វី​ដែលមាន​ក្នុងពេល​បច្ចុប្បន្ន​»​។ តែ​ពេលនេះ​ខ្ញុំ​គិតថា ខ្ញុំ​ត្រូវតែ​រៀន យល់ដឹង​ពីរ​បប​ខ្មែរក្រហម​អោយបាន​ដឹង​កាន់តែច្រើន ព្រោះ​វា​មិនមែន​តែ​ជា​រឿងរ៉ាវ​របស់​ឪពុកម្តាយ ជីដូន​ជីតា របស់ខ្ញុំ​ផ្ទាល់​នោះទេ ថែមទាំង​ជា​រឿង​ប្រទេសជាតិ​ទាំងមូល​។ ម្តាយ​របស់ខ្ញុំ​ធ្លាប់​និយាយ​ពី​ជីវភាព​រស់នៅក្នុង​រប​ប​ខ្មែរក្រហម​ឲ្យ​បងប្អូន​ខ្ញុំ​ស្ដាប់​លាយឡំ​នឹង​ទឹកភ្នែក ហេតុនេះហើយ​បានជា​ខ្ញុំ​មិន​ចង់​ស្ដាប់ ថែមទាំង មិន​ចង់​ឲ្យ​គាត់​និយាយ​បន្តទៀត​។

ពេលនេះ​ខ្ញុំ​មាន​ឯកសារ មាន​រូបថត​ក្នុង​សៀវភៅ បាន​មើល​វីដេអូ និង​ការ​ស្ដាប់​ពី​លោកគ្រូ ខ្ញុំ​ត្រូវ​ទៅ​ពិភាក្សា​ជាមួយ​ម្តាយ​ខ្ញុំ​បន្ថែមទៀត ដើម្បី​ធ្វើការ​ប្រៀបធៀប​នឹង​អ្វីដែល​បាន​រៀន​។ ជា​បន្ថែម​ខ្ញុំ​សូម​សំណូមពរ​ឲ្យ​មាន​កម្មវិធី​នេះ​ម្ដងទៀត ហើយ​ខ្ញុំ​នឹង​ខំ​សិក្សា​ដោយ​ខ្លួនឯង​ទៀត​។​

គឹម សម្បត្តិ កូនសិស្ស​ថ្នាក់​ទី​១២ នៃ​វិទ្យាល័យ ហ៊ុន សែន បូរី​១០០​ខ្នង កំពុង​អង្គុយ​ស្ដាប់​យ៉ាង​យកចិត្តទុកដាក់ លើ​ប្រធានបទ​ខ្មែរក្រហម​។ (​រូប​៖ មជ្ឈមណ្ឌល​ឯកសារ​កម្ពុជា​)

​តែ​ផ្ទុយ​ពី​ប្អូនប្រុស សម្បត្តិ ប្អូនស្រី រឿន ម៉ា​រែ​ន អាយុ​២០​ឆ្នាំ រៀន​នៅ​វិទ្យាល័យ​ជាមួយគ្នា បាន​និយាយ ថា «​ខ្ញុំ​ចង់ដឹង ចង់​យល់​ពី​របប​កម្ពុជា​ប្រជាធិបតេយ្យ ដែល​អ្នក​រាល់គ្នា​ហៅថា​របប​ខ្មែរក្រហម​។ ចង់ដឹងថា​ហេតុអ្វី​បានជា​របប​នោះ​កើតឡើង​? ហេតុអ្វី​បានជា​មានការ​ជម្លៀស​ប្រជាជន​ចេញពី​ទីក្រុង​ភ្នំពេញ​? ហេតុអ្វី​បានជា​គ្មាន​សាលារៀន​ឲ្យ​ក្មេងៗ​រៀន ដូចជា​ខ្ញុំ​ឥឡូវ​? ។ តែ​បែរជា​គ្មាន​អ្នកណា​អាច​ពិគ្រោះ ពិភាក្សា​យោបល់​ជា​ខ្ញុំ​ទេ លោកគ្រូ​គាត់​បង្រៀន​បានតែ​បន្តិចបន្តួច​តាមតែ​កាលវិភាគ​របស់​សាលា​ប៉ុណ្ណោះ​»​។ ឪពុកម្តាយ​របស់ខ្ញុំ​នៅ​តូច​នៅពេលនោះ ហេតុនេះ​គាត់​មិនអាច​ចង់ចាំ​ពី​សកម្មភាព និង​ជីវភាព​ក្នុងពេល​នោះបានទេ​។ ខ្ញុំ​តែងតែ​ស្វែងរក​ឯកសារ​ខ្មែរក្រហម​តាម​ប្រព័ន្ធ​អេ​ឡិច​ត្រូ​និ​ច ប៉ុន្តែ ហាក់ដូចជា​មិន​គ្រប់​គ្រាប់​ចំពោះ​ខ្ញុំ​សោះ ព្រោះ​កាន់តែ​មើល​កាន់តែ​ឆ្ងល់​។ ថ្ងៃនេះ​ខ្ញុំ ពិតជា​សប្បាយរីករាយ នៅពេល​គ្រូ​ប្រាប់ថា មាន​គ្រូ​មក​បង្រៀន​ពី​របប​កម្ពុជា​ប្រជាធិបតេយ្យ ហៅថា​ខ្មែរក្រហម​។ ខ្ញុំ​ត្រៀម​សំណួរ​ជាស្រេច​ក្នុង​ការឡើង​សួរ​។ ប៉ុន្តែ​ខ្ញុំ​ក៏មាន​ខកបំណង​ចំពោះ​ពេលវេលា​ខ្លី​ពេក ក្នុងការ​ធ្វើ​បទ​បង្ហាញ​ពី​លោកគ្រូ​មកពី​មជ្ឈមណ្ឌល​ឯកសារ​កម្ពុជា​។ ចុងក្រោយ​ខ្ញុំ​សូម​សំនូមពរ ឲ្យ​មាន​កម្មវិធី​នេះ​បន្ថែមទៀត​នៅ​វិទ្យាល័យ​របស់ខ្ញុំ​។ មិនមែន​តែ​ខ្ញុំ​ទេ​ដែល​ចង់ដឹង មាន​សិស្ស​ជាច្រើន​ទៀត​ក៏​ចង់ដឹង​ដែរ​។​

រឿន ម៉ា​រែ​ន សិស្ស​ថ្នាក់​ទី​១២ នៃ​វិទ្យាល័យ ហ៊ុន សែន ១០០ ខ្នង កំពុង​បំពេញ តារាង​វាស់​ស្ទង់​ចំណេះដឹង​ពី «​ប្រវត្តិសាស្ត្រ​ខ្មែរក្រហម និង សិទ្ធិមនុស្ស​» ក្រោម​របប​ខ្មែរក្រហម មុនពេល​ចាប់ផ្តើម​កម្មវិធី​។ (​រូប​៖ មជ្ឈមណ្ឌល​ឯកសារ​កម្ពុជា​)​

​វេទិកា​ថ្នាក់រៀន បានបញ្ចប់​នៅ​ម៉ោង​១១ កន្លះ ជាមួយ​ការចែក​សៀវ​ប្រវត្តិសាស្ត្រ​កម្ពុជា​ប្រជាធិបតេយ្យ (១៩៧៥-១៩៧៩) ដល់​សិស្សានុសិស្ស​ដែល​មក​ចូលរួម​ទាំងអស់​ដើម្បី​អាន​៕