សង្ខេប​ព័ត៌មាន​ក្នុងប្រទេស​សំខាន់ៗ​ប្រចាំ​ថ្ងៃទី​០៩ ខែមេសា ឆ្នាំ​២០១៨

955
ចែករម្លែក

​ដោយ : វិបុល / ភ្នំពេញ ៖ ព័ត៌មាន​ក្នុងប្រទេស​សំខាន់ៗ ប្រចាំ​ថ្ងៃទី​០៩ ខែមេសា ឆ្នាំ​២០១៨ រួមមាន​ដូចតទៅ ៖

*​ព្រះមហាក្សត្រ​កោតសរសើរ​សម្តេច​តេ​ជោ​ហ៊ុនសែន​ខិតខំ​ដោះស្រាយ​បញ្ហា​ប្រឈម​ទាំងពួង​របស់​ប្រទេស​

​នៅ​ថ្ងៃទី​០៩ ខែមេសា ឆ្នាំ​២០១៨ នេះ ព្រះករុណា ព្រះបាទ សម្ដេចព្រះ​បរមនាថ ន​រោ​ត្ដម សីហមុនី ព្រះមហាក្សត្រ នៃ​ព្រះរាជាណាចក្រ​កម្ពុជា បានចេញ​រាជសារ​មួយ ក្នុងឱកាស​នៃ​ការបើក សម័យប្រជុំ​រដ្ឋសភា​លើក​ទី​១០​នីតិកាល​ទី​៥ ។​
​នៅក្នុង​ព្រះរាជសារ​នេះ ព្រះមហាក្សត្រ ទ្រង់​បាន​លើកសរសើរ រដ្ឋសភា​ថា បាន​បំពេញ​តួនាទី​របស់ខ្លួន​យ៉ាង​ខ្ជាប់ខ្ជួន​ប្រកបដោយ​ប្រសិទ្ធិភាព ជាពិសេស​បាន​អនុវត្ត​តួនាទី​របស់ខ្លួន​ក្នុង​មុខងារ​នីតិកម្ម​ធ្វើជា​អ្នកតំណាង​នុង​ការតាមដាន​អនុវត្ត​ច្បាប់​សម្រេច​ការងារ​បាន​យ៉ាង​ល្អប្រសើរ​។ ព្រះអង្គ ក៏បាន​បង្ហាញ​ព្រះរាជ​សង្ឃឹមថា រដ្ឋសភា​ដែលជា​តំណាង​ប្រជាពលរដ្ឋ​នឹង​បន្ត​ខិតខំ​ប្រឹងប្រែង​សហការ​ជាមួយ​ស្ថាប័ន​កំពូល​នានា​ថែមទៀត ដើម្បី​សម្រេច​អោយបាន​នៅ​ទិសដៅ​រួម​របស់​របស់​រាជរដ្ឋាភិបាល​កម្ពុជា​ជា​ជំហានៗ ធានាបាន​នូវ​សង្គម​កម្ពុ​ជាមួយ​ដែល​ល​រឹងមាំ មាន​សន្តិភាព ស្ថេរភាព​នយោបាយ សន្តិសុខ និង​សណ្តាប់ធ្នាប់​សង្គម មានការ​អភិវឌ្ឍ​ប្រកបដោយ​ចីរភាព និង​សមធម៌​។​

​ជាមួយគ្នានេះ ព្រះមហាក្សត្រ បាន​កោតសរសើរ​ចំពោះ​សម្តេច​តេ​ជោ ហ៊ុន សែន នាយករដ្ឋមន្ត្រី ដែល​បាន​ដឹកនាំ​រាជរដ្ឋាភិបាល​កម្ពុជា ប្រកបដោយ​ជោគជ័យ នឹង​បាន​ខិតខំ​ប្រឹងប្រែង​ដោះស្រាយ​បញ្ហា​ប្រឈម​ទាំងពួង​របស់​ប្រទេស​ប្រកបដោយ​បញ្ញាញាណ​៕

*​លោកស្រី ជា ច័ន្ទ​ទេវី និង​លោក សួន មាន ទទួល​ការគាំទ្រ​ពី​រដ្ឋសភា​ដើម្បី​ក្លាយជា​សមាជិក​ព្រឹទ្ធសភា​

​ព្រឹក​ថ្ងៃទី​៩​ខែមេសា​នេះ​រដ្ឋសភា​បាន​បោះឆ្នោត​ជ្រើសតាំង​លោកស្រី ជា ច័ន្ទ​ទេវី និង​លោក​សួន មាន ជា​សមាជិក​ព្រឹទ្ធសភា ។​បេក្ខជន​ទាំងពី​រូបនេះ គឺ​មកពី​គណបក្ស​ហ្វ៊ុនស៊ិនប៉ិច​។​
​បេក្ខជន​ទាំងពី​រូបនេះ គឺ​ត្រូវបាន​រដ្ឋសភា​ជ្រើស​ចេញពី​បេក្ខជន​ចំនួន​១២​រូប​ដែល​បានដាក់​ពាក្យ​ជា​បេក្ខជន​សមាជ​ន​ព្រឹទ្ធសភា​។ រដ្ឋសភា​បានទទួល​ពាក្យ​បេក្ខជន​ជា​សមាជិក​ព្រឹទ្ធសភា ចាប់ពី​ថ្ងៃទី​១៦ ខែមីនា រហូតដល់​ថ្ងៃទី​៣០ ខែមីនា ឆ្នាំ​២០១៨ ៕

*​គ​.​ជ​.​បៈ​ការរៀបចំ​ការបោះឆ្នោត​កំពុងដំណើរការ​យ៉ាងរ​លូន​

​គណៈកម្មាធិការ​ជាតិ​រៀបចំ​ការបោះឆ្នោត​(​គ​.​ជ​.​ប​) កំពុងដំណើរការ​យ៉ាង​រលូន​រៀបចំ​ការបោះឆ្នោត​ជ្រើសតាំង​តំណាងរាស្ត្រ នីតិកាល​ទី​៦ ស្របទៅតាម​ច្បាប់ និង​ធម្មនុញ្ញភាព​របស់ខ្លួន​ដូច​មានចែង​ក្នុង​មាត្រា ១៥០​ថ្មី​(​ពីរ​) នៃ​រដ្ឋធម្មនុញ្ញ នៃ​ព្រះរាជាណាចក្រ​កម្ពុជា ។​
​ក្នុង​សេចក្តីប្រកាស​ព័ត៌មាន​របស់​គ​.​ជ​.​ប​.​ចេញ​នៅ​ថ្ងៃទី​៩ ខែមេសា​នេះ បាន​បញ្ជាក់ថា​ប៉ុន្មាន​ថ្ងៃ​ចុង​ក្រោយនេះ ក្រុម​ប្រតិកម្ម​ព័ត៌មាន​គ​.​ជ​.​ប​បានកត់សម្គាល់​ឃើញថា​មាន​បុគ្គល​មួយចំនួន​បាន​“​អំពាវនាវ​ដល់​ប្រជាពលរដ្ឋ​មិនឱ្យ​ចូលរួម​បោះឆ្នោត និង​ឲ្យ​អ្នកសង្កេតការណ៍​ជាតិ​អន្តរជាតិ​ធ្វើការ​ពិចារណា​ឲ្យ​បាន​ហ្មត់ចត់​មុននឹង​ចូលរួម​សង្កេតការណ៍​បោះឆ្នោត​ជ្រើសតាំង​តំណាង រាស្ត្រ នីតិកាល​ទី​៦ នា​ថ្ងៃទី​២៩​ខែកក្កដា​ឆ្នាំ​២០១៨​ខាងមុខ នេះ ” ។​ក្នុង​សេចក្ដីអំពាវនាវ​នោះ គេ​បានលើកឡើង​ផងដែរ​ថា ការបោះឆ្នោត​ដែល​គ្មាន​អតីត​គណបក្សប្រឆាំង​ដ៏​ធំ​មួយ ចូលរួម គឺ “​ជាការ​បោះឆ្នោត​មួយ​ដែល​ខុសច្បាប់ ” ៕

*​ដាក់​ផែនការ​ការពារ​សន្តិសុខ សណ្តាប់ធ្នាប់​ពង្រឹង​ការរំដោះ​ចរាចរ​លើផ្លូវ​ជាតិ​សំខាន់ៗ ៥​ខ្សែ​ចេញ ចូល​ក្រុង


​នៅ​ព្រឹក​ថ្ងៃទី​០៩ ខែមេសា ឆ្នាំ​២០១៨​នេះ លោក ឃួ​ង ស្រេង អភិបាល​រាជធានី​ភ្នំពេញ បានដាក់​ចេញ​ជា​ផែនការ ដើម្បី​ការពារ​សន្តិសុខ សណ្តាប់ធ្នាប់ គ្រោះ​អគ្គីភ័យ និង​ការពង្រឹង​ការរៀបចំ​រំដោះ​ចរាចរ​លើផ្លូវ​ជាតិ​សំខាន់ៗ ៥​ខ្សែ​ចេញ ចូល​ក្រុង​ក្នុងឱកាស​ចូលឆ្នាំ​ខ្មែរ​ដែល​នឹង​ប្រព្រឹត្តិ​ទៅ​នាពេល​ប៉ុន្មាន​ថ្ងៃ​ខាងមុខនេះ​។ គោលដៅ​និង​ច្រកចេញចូល​រាជធានី​ភ្នំពេញ ទាំង​៥​ច្រក ដូចជា ផ្លូវជាតិ​លេខ​១ លេខ​២ លេខ​៣ លេខ​៤ និង​ផ្លូវជាតិ​លេខ​៥ ៕

*​រកឃើញ​ហើយ ជើង​ខ្លាំង​អុកចត្រង្គ ចំនួន​៨​រូប ដែល​ត្រូវ​ឡើង ទៅ​ប្រកួត​ផ្ដាច់ព្រ័ត្រ នៅ​អង្គរ​សង្ក្រាន្ដ​

​ជើង​ខ្លាំង​ខាង​អុកចត្រង្គ ចំនួន​៨​រូប ដែល​ចម្រាញ់​ចេញ ពី​ជើង​ខ្លាំង​ចំនួន​២៤​រូប មកពី​មណ្ឌល ចំនួន ៧ ផ្សេងគ្នា​នោះ រកឃើញ​ហើយ​។ មណ្ឌល​ទាំង​៧​នោះ មាន​រាជធានី​ភ្នំពេញ ជ្រើស​រើសយក​៦​រូប មណ្ឌល​ខេត្ត​ព្រះសីហនុ​៣​រូប កំពង់ស្ពឺ​៣​រូប កំពង់ចាម​៣​រូប សៀមរាប​៣​រូប ក្រចេះ​៣​រូប និង​មណ្ឌល​ខេត្តបាត់ដំបង​៣​រូប ។
​ជើង​ខ្លាំង​ទាំង​៨​រូប ដែល​ត្រូវ​ឡើងទៅ​ប្រកួត ក្នុង​ព្រឹត្តិការណ៍​អង្គរ​សង្ក្រាន្ដ មាន ឈាវ បូរ៉ា អតីត​ស្ដេច​អុក ២​ជំនាន់ មកពី​ខេត្តកំពង់ចាម​។ ឌី​ម ឌី​ណា មកពី​ខេត្តកំពង់ចាម កែវ វ​ឌ្ឍ​នា រាជធានី​ភ្នំពេញ ប៊ុន គា​សេង ខេត្តក្រចេះ ដែលជា​ជើងឯក​រង​ឆ្នាំ​ចាស់ ប៊ូ ប៉ុណ្ណ​ម៉ាលី​កា រាជធានី​ភ្នំពេញ អេង សេង​ហៀក ខេត្តសៀមរាប ស៊ីវ ស៊ីន​ខេត្តកំពង់ស្ពឺ និង សុខ លឹម​ហេង រាជធានី​ភ្នំពេញ ៕