សង្ខេប​ព័ត៌មាន​សំខាន់ៗ​ប្រចាំ​ថ្ងៃទី​១០ ខែកញ្ញា ឆ្នាំ​២០១៨

591
ចែករម្លែក

​ដោយ : វិបុល​/ ព័ត៌មាន​សំខាន់ៗ​ប្រចាំ​ថ្ងៃទី​១០ ខែកញ្ញា រួមមាន​ដូចតទៅ ៖

*​ព្រះមហាក្សត្រ​និង​សម្តេចម៉ែ​យាង​ពិនិត្យ​ព្រះរាជសុខភាព​នៅ​ទីក្រុង​ប៉េកាំង​នៅ​ព្រឹក​នេះ​

​ព្រះករុណា​ព្រះបាទ​សម្តេច​ព្រះបរមនាថ នរោត្តម សីហមុនី ព្រះមហាក្សត្រ នៃ​ព្រះរាជាណាចក្រ​កម្ពុជា និង សម្តេច​ព្រះមហា ក្ស​ត្រី​ព្រះវររាជ​មាតា​ជាតិខ្មែរ នឹង​យាង​ចាក​ចេញពី​មាតុភូមិ​ឆ្ពោះទៅកាន់​ទីក្រុង​ប៉េកាំង​ប្រទេស ចិន​នៅ​ព្រឹក​ថ្ងៃទី ១០ ខែ កញ្ញា​ដើម្បី​ពិនិត្យ​ព្យាបាល​ព្រះរាជសុខភាព​របស់​ព្រះអង្គ​ទាំង​ទ្វេរ​តាប​តាម​វេជ្ជបញ្ជា​របស់​ក្រុមគ្រូពេទ្យ​ចិន ។

​ក្នុងពេល​អវត្តមានរ​បស់​ព្រះអង្គ​សម្តេច​វិបុល សេនា​ភក្តី សាយ ឈុំ ប្រធានព្រឹទ្ធសភា ទទួល​ធ្វើ​កិច្ច​ការជំនួស​ព្រះអង្គ​ក្នុងនាម​ជា​ប្រមុខរដ្ឋស្តីទី ៕

*​នាយករដ្ឋមន្ត្រី​កម្ពុជា​អញ្ជើញ​ចូលរួម​ពិព័រណ៍​ចិន​-​អាស៊ាន​លើក​ទី​១៥ នៅ​ទីក្រុង​ណាន​នី​ង​

​ដូច​អ្វីដែល​បានគ្រោង​ទុង​នៅ​ព្រឹក​ថ្ងៃ​ចន្ទ​ទី​១០ ខែកញ្ញា ឆ្នាំ​២០១៨ នេះ សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា បាន​អញ្ជើញ​ដឹកនាំ​គណៈប្រតិភូ​ជាន់ខ្ពស់​ទៅ​ចូលរួម​ពិព័រណ៍​ចិន​-​អាស៊ាន​លើក​ទី​១៥ ចាប់ពី​ថ្ងៃទី ១០ ដល់ ១២ ខែកញ្ញា​នៅ​ទីក្រុង​ណាន​នី​ង ខេត្ត​ក្វាង​ស៊ី នៃ​សាធារណរដ្ឋ​ប្រជាមានិត​ចិន​។​

​ពិព័រណ៍​ចិន​-​អាស៊ាន​លើក​ទី​១៥​នេះ​ប្រារព្ធ​ឡើង​ក្រោម​មូលបទ «​រួមគ្នា​កសាង​វិថី​សូត្រ សមុទ្រ​សតវត្ស​ទី​២១ និង​ន​វា​នុ​វត្ត​សហគមន៍​ចិន​-​អាស៊ាន​» ។​ទន្ទឹម​នឹងដាក់​បង្ហាញ​នូវ​ផលិតផល​ផ្សេងៗ​គ្នា​ជាច្រើន​ពី​អាស៊ាន និង​ចិន ដើម្បី​ជំរុញ​កិច្ចសហប្រតិបត្តិការ​រ​បស់​វិស័យ​ឯកជន​នៅក្នុង​ផ្នែក​ពាណិជ្ជកម្ម ធុរកិច្ច វិនិយោគ និង​ទេសចរណ៍​ឲ្យ​កាន់តែ​ប្រសើរឡើង ៕

*​ឧ​ត្ត​ម​សេនីយ៍​ឯក ស ថេត ឡើងជា​ស្នងការ​នគរបាល​រាជធានី​ភ្នំពេញ ជំនួស លោក​ជួន សុវណ្ណ​

​មន្ត្រីជាន់ខ្ពស់​ក្រសួងមហាផ្ទៃ​បាន​ឲ្យ​ដឹងថា លោក​ឧ​ត្ត​ម​សេនីយ៍​ឯក ស ថេត អគ្គ​ស្នងការរង​នគរបាលជាតិ ជំនួយការ​ដឹកនាំ​នាយកដ្ឋាន​នគរបាល​ការពារ និង​អង្គភាព​តម្រួត​បទបញ្ជា ប្អូនប្រុស​សម្តេច​ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ ឡើងកាន់តំណែង​ស្នងការ​នគរបាល​រាជធានី​ភ្នំពេញ ជំនួស​នាយ​ឧ​ត្ត​ម​សេនីយ៍ ជួន សុវណ្ណ ដែល​ទៅកាន់​ភារកិច្ច​ថ្មី គឺ​អនុប្រធាន​អាជ្ញាធរ​ជាតិ​ប្រយុទ្ធប្រឆាំង​គ្រឿងញៀន ៕

*​សមាគម​អ្នកលក់​ឱសថ​កម្ពុជា​ថា​នឹងមាន​វិធានការ​ចំពោះ​ផលិតផល​បោកប្រាស់​អតិថិជន​

​ជាថ្មី​ម្តងទៀត​ប្រធាន​សមាគម​ឱសថ​កម្ពុជា បានធ្វើការ​ព្រមាន​ដល់​ក្រុមហ៊ុន​អ្នកលក់​ឱសថ​ក៏ដូចជា​ផលិតផល​គ្រប់​ប្រភេទ ដែល​កំពុងដំណើរការ​សព្វថ្ងៃ​បើ​មានការ​បោកប្រាស់​ឬ​លក់​ផលិតផល​ប្រើ​មិនមាន​ប្រសិទ្ធភាព ដល់​អតិថិជន​នោះ​នឹង​ចាត់វិធានការ​ផ្លូវច្បាប់ ៕

* ទេសចរ​អន្តរជាតិ​មក​កម្ពុជា​បាន​៣,៥​លាន​នាក់​រយៈពេល​៧​ខែ​ឆ្នាំ​២០១៨

​មន្ត្រី​ទេសចរ​ប្រាប់ឲ្យដឹង​កាលពី​ថ្ងៃ​ថា​៧ ខែកញ្ញា ឆ្នាំ​២០១៨​ថា កម្ពុជា​ទទួលបាន​ទេស​ចរ​អន្តរជាតិ​ចំនួន​៣​លាន​កន្លះ​កើន​បាន​១១​ភាគរយ បើ​ធៀប​ទៅនឹង​ឆ្នាំ​២០១៧​រយៈពេល​ដូចគ្នា​។​

​លោក គង់ សុភា​រក្ស ប្រធាន​នាយកដ្ឋាន​ផែនការ​ស្ថិតិ​បាន​ឲ្យ​ដឹងថា បើ​និយាយ​ពី​ទីផ្សារ​ទេសចរណ៍​ធំៗ​ទាំង​១០ ដែល​មក​កម្សាន្ត​នៅ​កម្ពុជា​មានការ​កើនឡើង គឺមាន​តែ​ចិន​បាន​ជាង​១​លាន​នាក់​កើន​៧០​ភាគរយ បើ​ធៀប​ទៅ​នឹង​​​រយៈពេល​ដូចគ្នា​។ បារាំង​កើន​បាន​១​ភាគរយ និង​ម៉ាឡេស៊ី​ក៏​កើនឡើង​ដែរ​។ ក្រៅពីនេះ​គឺ​សុទ្ធតែ​មានការ​ថយចុះ​ខុសប្លែក​ពី​បណ្តា​ឆ្នាំមុនៗ ៕

* លោក​កឹម​សុខា​ត្រូវបាន​ដោះលែង​ឱ្យនៅ​ក្រៅ​ឃុំ​

លោក​កឹម​សុខា​អតីត​អនុប្រធាន​គណបក្ស​សង្គ្រោះ​ជាតិ ត្រូវ​ដោះលែង​ឲ្យ​មាន​សេរីភាព​ឡើងវិញ ហើយ​បាន​ចេញពី​ពន្ធនាគារ​ដល់ផ្ទះ​កាលពី​ទាបភ្លឺ​ថ្ងៃទី​១០ ខែកញ្ញា ឆ្នាំ​២០១៨​។​លោក​គី ឫទ្ធី ចៅក្រម​ស៊ើបសួរ​សាលា​ដំបូង​រាជធានី​ភ្នំពេញ កាលពី​ថ្ងៃទី​៩ ខែកញ្ញា បានចេញ​ដីកា​បង្គាប់​ទៅ​ប្រធាន​មណ្ឌល​អប់រំ​កែប្រែ​ទី​៣ ​ឲ្យ​ដោះលែង​លោក​កឹម សុខា អាយុ​៦៤​ឆ្នាំ ៕