សភាពាណិជ្ជកម្ម​អឺរ៉ុប​ប្រចាំ​កម្ពុជា​ជួយ​វិស័យ​ធុរកិច្ច​កសិកម្ម​ដើម្បី​ប្រកួតប្រជែង​ទីផ្សារ​ឱ្យមាន​តម្លាភាព​

101
ចែករម្លែក

ដោយ​មូល​សម្បត្តិ​/​ភ្នំពេញ​៖​កាលពី​ថ្ងៃទី​៨​ខែតុលា​ឆ្នាំ​២០១៩​រដ្ឋមន្ត្រី​ក្រសួងកសិកម្ម​រុក្ខា​ប្រ​ម៉ាញ់​និង​នេសាទ​លោក​វេ​ង​សាខុន​បានទទួល​ជួបពិភាក្សា​ការងារ​ជាមួយ​Mr.ArnaudDarc​ប្រធានសភា​ពាណិជ្ជកម្ម​អឺរ៉ុប​ប្រចាំ​កម្ពុជា​(EuropeanChamberofCommerceinCambodia)​និង​សហការី​។​ជំនួប​នាពេលនេះ​មាន​គោលបំណង​សំខាន់​គឺ​ធ្វើការ​ពិនិត្យ​និង​ពិភាក្សា​លើ​ជំពូក​ថ្មី​ស្តីពី​”​វិស័យ​ធុរកិច្ច​កសិកម្ម​”​ដែលមាន​នៅក្នុង The EuroCham White Book​។

​លោក​ArnaudDarc​បាន​ថ្លែងអំណរគុណ​ជូន​ចំពោះ​រដ្ឋមន្ត្រី​ដែល​បានផ្តល់​កិច្ចសហការ​យ៉ាង​ល្អជា​មួយ​EuroCham​នា​ប៉ុន្មាន​ឆ្នាំកន្លងមក​និង​ជាពិសេស​លោក​បាន​ចែករំលែក​នូវ​ទស្សនវិស័យ​និង​គោលនយោបាយ​សំខាន់ៗ​សម្រាប់ធ្វើ​ការអភិវឌ្ឍ​ន៍​វិស័យ​ធុរកិច្ច​កសិកម្ម​កម្ពុជា​។

​ថ្មីៗ​នេះ EuroCham បាន​បោះ​ពុ​ម្ភ​សៀវភៅ​ជា​លើក​ទី​៣​ដែល​លើក​នេះ​បាន​បញ្ចូល​ជំពូក​ថ្មី​មួយ​និយាយ​អំពី​”​វិស័យ​ធុរកិច្ច​កសិកម្ម​”​។​ថ្ងៃនេះ​មានឱកាស​បានមក​ជួប​លោក​រដ្ឋមន្ត្រី​ដើម្បី​ពិភាក្សា​ឲ្យ​បាន​លម្អិត​និង​ស្នើសុំ​ជួយ​វាយតម្លៃ​បន្ថែម​លើ​ជំពូក​នេះ​ធ្វើយ៉ាងណា​បង្កើត​បរិយាកាស​មួយ​ល្អ​ក្នុង​វិស័យនេះ​ដោះស្រាយ​បញ្ហា​ជូន​ធុរកិច្ច​ជន​ឱ្យបាន​សមស្រប ល្អប្រសើរ ដើម្បី​លើកកម្ពស់​ការប្រកួតប្រជែង​។

​លោក​បាន​បន្តថា គណ​:​ក​ម្មា​ធិ​ការ​ធុរកិច្ច​កសិកម្ម​របស់​EuroCham​ត្រូវបាន​បង្កើតឡើង​នៅ​ឆ្នាំ​២០១៨ ក្រោយ​មកពី​សមាជិកសភា​ពាណិជ្ជកម្ម​បានបង្ហាញ​ចំណាប់អារម្មណ៍​យ៉ាងខ្លាំង​ពាក់ព័ន្ធ​វិស័យ​កែច្នៃ​ចំណីអាហារ និង​កសិកម្ម​។ នៅក្នុង​ជំពូក​ថ្មី​នេះ មាន​ប្រ​ធាប​បទ​សំខាន់ៗ​ចំនួន​០៥ រួមមាន​៖ ១. សារធាតុ​ហាមឃាត់​។ ២. ការប្រយុទ្ធ​ប្រឆាំងនឹង​សម្ភារៈ​កសិកម្ម​ខុសច្បាប់​។ ៣. បទ​ប្បញ្ញត្តិ​ការងារ ។​៤. ពិពិធ​កម្ម​កសិកម្ម និង​ទី​៥. ការធ្វើ​តេស្ត​ទឹក​ក្នុង​វិស័យ​កសិកម្ម តាម​លក្ខខណ្ឌ​តម្រូវ​ច្បាប់​។

​នៅក្នុង​ប្រធានបទ​នីមួយៗ​គណ​:​ក​ម្មា​ធិ​ការ​ធុរកិច្ច​កសិកម្ម​បាន​ជូន​អនុសាសន៍​សំខាន់ៗ​ដល់​អគ្គនាយកដ្ឋាន​ដែល​ស្ថិតនៅក្រោម​ដំបូល​របស់​ក្រសួង ដើម្បី​យកទៅ​ពិនិត្យ ពិចារណា​ឲ្យ​បាន​ស៊ីជម្រៅ និង​កែលម្អ​រាល់​ចំណុច​ខ្វះខាត​ឬ​បញ្ហា​ផ្សេងៗ​ធ្វើយ៉ាងណា​លើកកម្ពស់​បរិយាកាស​កា​រ​ធ្វើ​ធុរកិច្ច​កសិកម្ម​ឲ្យ​បានល្អ​ប្រសើរ​ដោយ​ឈរលើ​គោលការណ៍​ច្បាប់ បច្ចេកទេស តម្លាភាព គុណភាព សុវត្ថិភាព និង​ការប្រកួតប្រជែង​។​ល​។

​នាឱកាស​នេះ​សមាជិក​ក្រុមការងារ​ក៏បាន​លើកយក​ប្រធានបទ​មួយចំនួន​ទាក់ទង​នឹង​ការអនុវត្ត​ច្បាប់​ស្តីពី​សុខភាព​សត្វ និង​ផលិតកម្ម​សត្វ ការនាំ​ចូល និង​ការធ្វើ​អាជីវកម្ម​សម្ភារៈ​កសិក​ម្ម​ខុសច្បាប់ ការអនុម័ត​ប្រាក់​ឈ្នួល​អប្បបរមា​ស្តង់ដា​ការដាំដុះ​ពូជស្រូវ​ហាយ​ប្រី​ត​និង​លក្ខខណ្ឌ​តម្រូវ​របស់​ក្រសួងបរិស្ថាន​ដែល​កំណត់ឱ្យ​ក្រុមហ៊ុន​ធុរកិច្ច​កសិកម្ម​ត្រូវតែ​ធ្វើតេស្ត​គុណភាព​ទឹក​នៅ​ក្រសួងបរិស្ថាន​ផ្ទាល់​។

នាឱកាស​នេះ​លោក​រដ្ឋមន្ត្រី​បាន​កោតសរសើរ​និង​វាយតម្លៃ​ខ្ពស់​ចំពោះ​កិច្ចខិតខំ​ប្រឹងប្រែង​រប​ស់​ក្រុមការងារ EuroCham ជាពិសេស Mr. Arnaud Darc ផ្ទាល់ ដែល​បានរៀបចំ​ចងក្រង បោះ​ពុ​ម្ភ The EuroCham White Book ជា​លើក​ទី​៣ ។​ដោយ​រួមបញ្ចូល​ជំពូក​ថ្មី​មួយទៀត​ស្តីពី ” ធុរកិច្ច​កសិកម្ម ” ស្រប​ពេលដែល​ក្រសួង​កំពុង​លើកទឹកចិត្ត​ជំរុញ​និង​គាំទ្រ​ឱ្យដៃ​គូ​អភិវឌ្ឍ​វិស័យ​ឯកជន​និង​សហគមន៍​កសិកម្ម​ចូលរួម​អភិវឌ្ឍន៍​វិស័យ​ធុរកិច្ច​កសិកម្ម​នេះ​។​

​តាមរយ​:​ការវិនិយោគ​លើ​វិស័យ​ផលិតកម្ម​កសិកម្ម​ការ​កែច្នៃ​និង​ទីផ្សារ​ដើម្បី​លើកកម្ពស់​សមត្ថភាព​ប្រកួតប្រជែង​ដោយ​ឈរលើ​គោលការណ៍​ច្បាប់​និង​បច្ចេកទេស​ធានា​តម្លាភាព​និង​យុត្តិធម៌​ជូន​អ្នក​ផលិត​និង​អ្នក​បរិភោគ​។​ចំពោះ​ប្រធានបទ​ទាំង​៥​នេះ​លោក​រដ្ឋមន្ត្រី​បាន​ជម្រាបជូន​ក្រុម​ប្រតិភូ​ដោយ​សង្ខេប​មួយ​ជំហានៗ​និង​បន្ទាប់​លោក​បានអនុញ្ញាត​ឱ្យអស់​លោក​ដែល​ទទួលបន្ទុក​ការងារ​បច្ចេកទេស​ទាក់​ទង​នឹង​ប្រធានបទ​នេះ​បន្ត​បកស្រាយ​យ៉ាង​ពិស្តារ​ជូន​ក្រុម​ប្រតិភូ​បន្ថែមទៀត​។​

​ទោះជា​យ៉ាងណា​លោក​រដ្ឋមន្ត្រី​បាន​ទទួលស្គាល់ថា​ការធ្វើ​ធុរកិច្ច​កសិកម្ម​នៅមាន​បញ្ហា​ប្រឈម​មួយចំនួន​ដែល​ក្រសួង​ក៏ដូចជា​ស្ថាប័ន​ពាក់ព័ន្ធ​កំពុងតែ​ត្រិះរិះ​ពិចារណា​ស្វែងរក​យន្តការ​ដោះស្រាយ​ឲ្យ​បាន​សមស្រប​ទាន់ពេលវេលា​និង​មាន​ប្រសិទ្ធភាព​ធ្វើយ៉ាងណា​រក្សា​បរិយាកាស​វិនិយោគ​លើ​វិស័យ​ធុរកិច្ច​កសិកម្ម​ឲ្យ​បានល្អ​ប្រសើរ​ទាំង​ក្នុងពេល​បច្ចុប្បន្ន និង​អនាគត​។

​លោក​រដ្ឋមន្ត្រី​នឹង​ប្រគល់​ឲ្យ​អង្គភាព​ជំនាញ​ពាក់ព័ន្ធ​សហការ​ជាមួយ​ក្រុម​ជំនាញ​នៃ EuroCham យកទៅ​ពិនិត្យ​ពិចារណា​ធ្វើការ​កែលម្អ​និង​ដោះស្រាយ​ជា​បណ្តើរៗ​ដោយ​ឈរលើ​គោលការណ៍​ច្បាប់ និង​បច្ចេកទេស​៕S/​