សមាជិកសភា​ឥណ្ឌា​រហូតដល់​ទៅ ៤៣ ភាគរយ​ប្រឈម​នឹង​បទចោទប្រកាន់​ព្រហ្មទណ្ឌ​

530
ចែករម្លែក

​ក្នុងចំណោម​សមាជិកសភា​ជាប់ឆ្នោត​ថ្មី​របស់​ឥណ្ឌា​ជិត​ពាក់កណ្តាល​ប្រឈម​នឹង​បទចោទប្រកាន់​ព្រហ្មទណ្ឌ ហើយ​ចំណែក​នៃ​សមាជិកសភា​ទាំងនេះ​បាន​កើន​ឡើងជា​លំដាប់​។​

​នៅ​ក្នុងការ​លាតត្រដាង​ដ៏​គួរឱ្យភ្ញាក់ផ្អើល ការវិភាគ​មួយ​បាន​បង្ហាញថា ឱកាស​នៃ​ការ​ឈ្នះ​អាសនៈ​នៅក្នុង​សភា​ជាន់​ទាប​របស់​សភា​នៅ​ឆ្នាំនេះ​សម្រាប់​បេក្ខជន​ដែលជា​ប់​ពាក់ព័ន្ធ​នៅក្នុង​ករណី​ព្រហ្មទណ្ឌ​ដែល​បានប្រកាស​គឺមាន ១៥,៥​ភាគរយ ខណៈ​មានតែ ៤,៧ ភាគរយ​ប៉ុណ្ណោះ​សម្រាប់​បេក្ខជន​ដែលមាន​ប្រវត្តិរូប​ស្អាតស្អំ​។​

​យោងតាម​របាយការណ៍​នៃ​សមាគម​កំណែទម្រង់​ប្រជាធិបតេយ្យ (ADR) បានឱ្យដឹងថា នៅក្នុង​ប្រទេស​ប្រជាធិបតេយ្យ​ដ៏​ធំ​បំផុត​របស់​ពិភពលោក​នេះ ៤៣​ភាគរយ ឬ ២៣៣ នាក់​ក្នុងចំណោម ៥៣៩ បេក្ខជន​ដែល​បានឈ្នះ​ក្នុងការ​បោះឆ្នោត​ទូទៅ ត្រូវបាន​ប្រកាសថា​កំពុង​ជាប់​ក្នុងការ​ប្រកាន់​ពីបទ​ល្មើស​ព្រហ្មទណ្ឌ​។​

​ការជាប់ឆ្នោត​របស់​បេក្ខជន​បែបនេះ​បាន​កើនឡើង​២៦​ភាគរយ ចាប់តាំងពី​ឆ្នាំ ២០១៤ និង ៤៤ ភាគរយ ចាប់តាំងពី​ឆ្នាំ ២០០៩​។​

​ច្បាប់​របស់​ឥណ្ឌា​រារាំង​បុគ្គល ដែល​ត្រូវបាន​ផ្តន្ទាទោស​ពីបទ​ល្មើស​ណាមួយ​និង​ត្រូវបាន​ផ្តន្ទាទោស​ជាប់ពន្ធនាគារ​ពីរ​ឆ្នាំ​ឬ​ច្រើនជាង​នេះ​ពី​ការប្រកួតប្រជែង​ការបោះឆ្នោត​។ ប៉ុន្តែ​បុគ្គល ដែល​ប្រឈមមុខ​នឹង​ការចោទប្រកាន់ គឺមាន​សេរីភាព​ក្នុងការ​បោះឆ្នោត​។ ទន្ទឹមនឹង​នេះដែរ ប្រព័ន្ធយុត្តិធម៌​ឥណ្ឌា​ធ្វើ​ចំណាត់ការ​យឺតយ៉ាវ​ណាស់​និង​អាច​ចំណាយពេល​ច្រើន​ទសវត្សរ៍​ដើម្បី​ដោះស្រាយ​ករណីនេះ​។​

​ក្នុងចំណោម​បេក្ខជន​ចំនួន ៧៩២៨ នាក់​ដែល​ត្រូវបាន​វិភាគ​ដោយ ADR នៅក្នុង​ការបោះឆ្នោត​នេះ ១៥០០​នាក់ (១៩%) បានប្រកាសថា​បាន​បើក​ករណី​ព្រហ្មទណ្ឌ​ប្រឆាំងនឹង​ខ្លួន​ពួកគេ​។ ក្នុង​ឆ្នាំ ២០១៤ គឺមាន ១៧ ភាគរយ​។​

​លើសពីនេះទៅទៀត អ្នកឈ្នះឆ្នោត ១៥៩ នាក់ (២៩%) ប្រឈម​នឹង​បទល្មើស​ព្រហ្មទណ្ឌ​ធ្ងន់ធ្ងរ​រួមទាំង​ករណី​ពាក់ព័ន្ធ​នឹង​ការចាប់រំលោភ ឃាតកម្ម ប៉ុនប៉ង​សម្លាប់​មនុស្ស ចាប់ជំរិត និង​បទល្មើស​ផ្សេងៗ​ប្រឆាំងនឹង​ស្ត្រី​។​

​គណបក្ស Bharatiya Janata ដែល​ឈ្នះ​ការបោះឆ្នោត​ជាមួយ​សំឡេង​ភាគច្រើន ក៏មាន​សមាជិកសភា​ក្នុង​ចំនួន​ដ៏​ខ្ពស់​ផងដែរ ដែល​ប្រឈម​នឹង​បទចោទប្រកាន់​ព្រហ្មទណ្ឌ​។ មាន​សមាជិក​ចំនួន ១១៦ នាក់​ក្នុងចំណោម​សមាជិកសភា​ជាប់ឆ្នោត ៣០៣ រូប (៣៩%) កំពុង​ប្រឈម​ករណី​ព្រហ្មទណ្ឌ​ជាច្រើន​ករណី​។​

​ទោះបីយ៉ាងណា គណបក្ស​ផ្សេងទៀត​មាន​សមាជិក​ជាប់​ការចោទប្រកាន់​ច្រើនជាង​គណបក្ស BJP គិត​លើ​ភាគរយ​។ សមាជិកសភា​ដែល​រង​ការចោទប្រកាន់​រួមមាន ២៩ នាក់ (៥៧%) មកពី​បក្ស​សមាជ ១៣​នាក់ (៨១%) មកពី​បក្ស Janata Dal-United ១០​នាក់ (៤៣%) មកពី​បក្ស Dravida Munnetra Kazhagam និង ៩​នាក់ (៤១%) មកពី​សភា Trinamool៕ ដោយ៖ កញ្ញាដាលីស

សមាជិកសភា ៤៣ ភាគរយ​រង​ការ​ចោត​ប្រកាន់​ព្រហ្មទណ្ឌ