សមាជិក​ក្រុមប្រឹក្សាឃុំ​ម្នាក់ សុំឱ្យ​អាជ្ញា​ធរមាន​សមត្ថកិច្ច ចាត់វិធានការ ក្រុម​ប្រដេញ​ជំរិត​ទារប្រាក់​

1331
ចែករម្លែក

​ដោយៈ​អង្គរតូច /
​សៀមរាបៈ សមាជិក​ម្នាក់ នៃ​ក្រុមប្រឹក្សាឃុំ​បឹងមាលា ស្រុក​ស្វាយ​លើ បាន​ទទូច​សុំឱ្យ​អាជ្ញា​ធរមាន​សមត្ថកិច្ច ជួយ​មាន​វិធានការ​ច្បាប់ ទៅលើ​ក្រុម​បើកបរ ប្រដេញ​ស្ទាក់​ជំរិត​ទារប្រាក់ នៅក្នុង​មូលដ្ឋាន​ស្រុក​ស្វាយ​លើ ។ ការស្នើសុំ​នេះ គឺ​បន្ទាប់ពី​ក្រុម​ប្រដេញ​ខាងលើ ៥ ទៅ ៦ នាក់ បាន​ស្ទាក់​គោយន្ត​ដឹកឈើ របស់គាត់ ទារប្រាក់ ទាំង​កណ្តាលអធ្រាត្រ​។​

​តាមរយៈ​ការឆ្លើយ​ឆ្លង​ទូរស័ព្ទ លោក ហ៊ាង គឹម​ហូ​ន សមាជិក​ក្រុមប្រឹក្សាឃុំ​បឹងមាលា នៃ​ស្រុក​ស្វាយ​លើ បាន​ប្រាប់ថា លោក​មានការ​ភិតភ័យ​ខ្លាំងណាស់ ដោយនៅ​កណ្តាលអធ្រាត្រ ងងឹតឈឹង មាន​ឡាន ៣ គ្រឿង មនុស្ស ៥ ទៅ ៦ នាក់ បើក​ប្រដេញ​ស្ទាក់​គោយន្ត​របស់គាត់ ទារប្រាក់​បែបនេះ​។ កាលពី​យប់ ថ្ងៃទី ៨ ខែមិថុនា កូន​របស់លោក បាន​ដឹកឈើ​ក្តារ ជាង ២ ម៉ែត្រគូប យកទៅ​បាំងជញ្ជាំង​ផ្ទះ ក៏ត្រូវ​មនុស្ស​មួយក្រុម មាន​គ្នា ៥ ទៅ ៦ នាក់ ឡាន ៣ គ្រឿង អះអាងថា ជា​អ្នកកាសែត បើក​មក​ស្ទាក់​គោយន្ត ហើយ​ទារប្រាក់ ក្នុង​ម្នាក់ៗ ៥ ម៉ឺន​រៀល បើ​មិន​អីចឹង​ទេ ចាប់ ។ លុះ​ពេល​គ្មាន​ប្រាក់​ឲ្យ ពួកគេ ក៏​ហៅ​ខាង​មេព្រៃ មក​ចាប់​គោយន្ត​របស់គាត់ បានសម្រេច​មែន​។

​លោក​បាន​បន្តថា ដោយសារតែ​ឃើញ​គ្រួសារ​របស់គាត់ ខ្វះខាត លោក ដួង វ៉ា​រី ប្រធាន​ក្រុមការងារ ចុះជួយ​ឃុំ​បឹងមាលា ជួយ​ផ្តល់ប្រាក់ ឱ្យ​ទិញ​ក្តារ យកមក​បាំងជញ្ជាំង​ផ្ទះ ហើយ​ក្តារ​ទាំងនោះ ក៏បាន​សុំ​ការអនុញ្ញាត ពី​សមត្ថកិច្ច ដើម្បី​ដឹកជញ្ជូន​ផងដែរ​។ មិនមែន​រូបគាត់ ជា​ឈ្មួញ​រកស៊ី​ដឹកជញ្ជូន​ឈើ នោះទេ​។ តែ​ពួកក្រុម​ប្រដេញ ខាងលើនេះ មិន​ថា​ឡាន គោយន្ត ឬ​រ៉ឺម៉ក​ម៉ូតូ​នោះទេ ដេញ​ស្ទាក់​ឆែកឆេរ មិន​ថា​យប់ ឬ​ថ្ងៃ ខ្លាំង​ជាង​សមត្ថកិច្ច ប្រតិបត្តិ​ការឆែកឆេរ​អាវុធ ទៅទៀត​។​

​លោក​បាន​បញ្ជាក់ថា ដោយសារតែ​ពេល​កើតហេតុ យប់​ងងឹត ហើយ​កូន​របស់គាត់ នៅ​ក្មេង ភ័យខ្លាច មិន​ស្គាល់​ម៉ាក​ឡាន ថែមទាំង​មើលមុខ​មនុស្ស​មិន​ច្បាស់ ទើប​លោក​មិនអាច​ដាក់ពាក្យ​ប្តឹង​កើត​។ បើ​មិន​ដូច្នោះ​ទេ លោក​នឹងដាក់​ពាក្យ​ប្តឹង ដើម្បី​ឲ្យ​ច្បាប់​ចាត់ការ ។ តែ​លោក​ក៏​សុំ​ឲ្យ​អាជ្ញា​ធរមាន​សមត្ថកិច្ច ជួយ​ទប់ស្កាត់ រាល់​អំពើ​ខាងលើនេះ ព្រោះថា មិនដឹង​ជា​អ្នកកាសែត​មែន ឬ​ក្រុមចោរ​នោះឡើយ ។ នេះ​ត្រឹម​គោយន្ត ទារ​ម្នាក់ ៥ ម៉ឺន​រៀល ចុះបើ​ឡាន​ដឹក​ភ្ញៀវ​ខ្មែរ ឬ​បរទេស ទារ​ម្នាក់ៗ ពាន់​ដុល្លារ ឬក៏​អាច​បាញ់​ប្លន់ ទៅវិញ​នោះ តើ​អ្នកណា​ទទួលខុសត្រូវ​? ។​

​ក្នុងករណី​នេះដែរ អធិការនគរបាល​ស្រុក​ស្វាយ​លើ លោក​វរសេនីយ៍ឯក ស៊ុន អេង បាន​ថ្លែង​តាម​ទូរស័ព្ទ​ថា ករណី​ប្រដេញ​ស្ទាក់​នេះ កើតមាន​យូរ​មកហើយ តែ​យើង​ពិបាក​ដាក់បន្ទុក ក្នុងការ​បង្ក្រាប ព្រោះ​ពេលខ្លះ ពួកគេ​មិនបាន​ចត​ឡាន នៅ​ទី​នោះទេ គេ​បើ​កលើ​ដងផ្លូវ​រហូត តែ​ត្រូវ​ស្ទាក់ គេ​ស្ទាក់​ភ្លាមៗ រួច​គេចខ្លួន​អស់​។ ពេលខ្លះ ពួកគេ​ចូល​ចត​តាម​ផ្ទះ ដែល​យើង​មិនអាច​ទៅ​ដេញ​គេ​បាន​។ ចំណុច​ទាំងនេះ ដែល​ក្រុម​សមត្ថកិច្ច ពិបាក​ធ្វើការ​។ លោក​បញ្ជាក់ថា រឿង​ខាងលើនេះ មានតែ​លោក​អភិបាលស្រុក​ទេ ដែល​អាចដាក់​បទបញ្ជា អំពី​វិធានការ​។​

​លោក សិ ប៊ុន​ស៊ិន អភិបាលស្រុក​ស្វាយ​លើ មិនអាច​សុំ​ការបកស្រាយ ពន្យល់ អំពី​វិធានការ ចំពោះ​ករណី​ប្រដេញ ទារប្រាក់​នេះ​ទេ បើទោះបី ទូរស័ព្ទ​ហៅចូល​ច្រើនដង ក៏ដោយ ក៏​ព្រោះតែ​មិនមាន​អ្នក​លើក​ទទួល​។​

​លោក ម៉ែន វុទ្ធី ប្រធាន​សង្កាត់​មេព្រៃ ស្រុក​ស្វាយ​លើ បានឱ្យដឹងថា ករណី​ចាប់​គោយន្ត ដឹក​ក្តារ​របស់​ពលរ​ដ្ឋ ដែល​សុំ​យកទៅ​ធ្វើ​ផ្ទះ លោក​កំពុង​រង់ចាំ​បញ្ជា ពី​ថ្នាក់លើ ដើម្បី​ប្រគល់ឱ្យ​គាត់​វិញ​។ លោក​បាន​បន្តថា ក្រោយពេល​ចាប់ ទើប​ដឹងថា ឈើ​ជា​អំណោយ របស់​ប្រធាន​ក្រុមការងារ​ចុះជួយ​មូលដ្ឋាន​។​

​សូមបញ្ជាក់ថា ដោយសារ​មូលដ្ឋាន​ស្រុក​ស្វាយ​លើ ពោរពេញ​ដោយ​បទល្មើស​ព្រៃឈើ ហើយក៏​ជា​ចំណុច​ឆ្លងកាត់​បទល្មើស ទើប​អ្នកខ្លះ ដើរតួ​ជា​អ្នកកាសែត ហើយ​អ្នកកាសែត​ខ្លះ បង្ខំចិត្ត​បើកឡាន​ប្រដេញ​ស្ទាក់ ទារប្រាក់​ពី​ការដឹកជញ្ជូន​ឈើ បែបនេះ​។ ក្រៅពីនោះ ក៏មាន​ការបង្ក​ឱ្យមាន គ្រោះថ្នាក់​ចរាចរ តាមរយៈ​បើកឡាន ប្រដេញ​នេះ​ផងដែរ​៕​v