សម្តេច​ក្រឡាហោម ​អញ្ជើញ​កម្ទេច​ផលិតផល​ក្លែងក្លាយ​៧០​តោន​

424
ចែករម្លែក
  • 448
    Shares
សម្តេច​ក្រឡាហោម​អញ្ជើញ​កម្ទេច​ផលិតផល​ក្លែងក្លាយ​៧០​តោន​

ដោយៈ មុនី​រ័ត្ន​/​ភ្នំពេញៈ​សម្តេច​ក្រឡាហោម​ស ខេង​ ឧបនាយករដ្ឋមន្ត្រី ​រដ្ឋ​មន្ត្រី​ក្រសួងមហាផ្ទៃ​ នៅ​ព្រឹក​នេះ​បាន​អញ្ជើញ​ជាអធិបតី​ក្នុង​ពិធី​កម្ទេច​ផលិតផល​ក្លែងក្លាយ ខុសច្បាប់​ចំនួន ៧០​តោន ដែល​សមត្ថកិច្ច​ចម្រុះនៃ​គណៈកម្មាធិការ​ប្រយុទ្ធប្រឆាំង​ផលិតផល​ក្លែងក្លាយ​ដែល​បង្ក​គ្រោះថ្នាក់​មាន​ហានិភ័យ​ខ្ពស់​ដល់​សុខភាព​និង​សុវត្ថិភាព​សង្គម (​គ​.​ប​.​ផ​.​ក​) បាន​បង្ក្រាប​រឹបអូស​ពី​ជនល្មើស ។​ពិធី​បាន​ប្រារព្ធ​នៅ​ទីលាន​តាម​បណ្ដោយ​មហាវិថី​សម្ដេច​តេ​ជោ ៦០​ម៉ែត្រ សង្កាត់​ចាក់អង្រែ​ក្រោម ខណ្ឌមានជ័យ រាជធានី​ភ្នំពេញ​។


​គណៈកម្មាធិការ​ប្រយុទ្ធ​ប្រឆាំង​ផលិតផល​ក្លែងក្លាយ​បាន​បញ្ជាក់ថា សម្ដេច​ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ នឹង​អញ្ជើញ​ជា​អធិបតីភាព​ក្នុង​ពិធី​កម្ទេចចោល​ផលិតផល​ក្លែងក្លាយ ខុសច្បាប់​ចំនួន ៧០​តោន​។​
​ ​

យោងតាម​របាយការណ៍​របស់​ក្រសួងមហាផ្ទៃ​បាន​ឲ្យ​ដឹងថា ការងារ​ប្រយុទ្ធប្រឆាំង​ផលិតផល​ក្លែងក្លាយ ត្រូវបាន​យកចិត្តទុកដាក់​ពង្រឹង និង​ជំរុញ​កាន់តែ​សកម្ម និង​មាន​លទ្ធផល​ល្អ​គួរកត់សម្គាល់ ជាពិសេស​កំពុង​ទទួល​បានការ​គាំទ្រ និង​ការចូលរួម​ពី​គ្រប់​អ្នកពាក់ព័ន្ធ​នានា ទាំង​ក្នុង​ក្របខ័ណ្ឌ​ផ្ទៃក្នុង​ជាតិ តំបន់ និង​អន្តរជាតិ​។ ជាក់ស្តែង​នៅក្នុង​ឆ្នាំ​២០១៨ តាមរយៈ​ការខិតខំ​លើកកម្ពស់​ការអនុវត្ត​យន្តការ​នានា​ដែលមាន​ស្រាប់ នឹង​ការប្រជុំ​ពិភាក្សា​ផ្លាស់ប្ដូរ​យោបល់​ជា​ញឹកញាប់​ជាមួយ​គ្រប់​តួអង្គ​ពាក់ព័ន្ធ​ដើម្បី​ដាក់ចេញ​វិធានការ​អនុវត្ត​ស្របតាម​ភាពបត់បែន នៃ​សភាពការណ៍​បទល្មើស ជាពិសេស​ក្រោម​ការយកចិត្តទុកដាក់​ខ្ពស់​របស់​ប្រមុខ​រាជរដ្ឋាភិបាល ​បាន​ជំរុញ​ឲ្យ​គណៈកម្មការ​ប្រយុទ្ធប្រឆាំង​ផលិតផល​ក្លែងក្លាយ សម្រេចបាន​លទ្ធផល​ផ្លែផ្កា​ជាច្រើន ក្នុងនោះ​លទ្ធផល​លេចធ្លោ​រួមមានៈ ការ​នាំចូល​ផលិតផល​ក្លែងក្លាយ ផលិតផល​ខូចគុណភាព ផលិតផល​ក្រោម​ស្តង់ដារ​គុណភាព ឬ​ហួស​កាលបរិច្ឆេទ​ប្រើប្រាស់ ក៏ដូចជា​ទីតាំង​ស្តុក​ទុក និង​ចែកចាយ​ផលិតផល​ក្លែងក្លាយ​សារ​ធាតុគីមី​ខុសច្បាប់ ទីតាំង​កែច្នៃ និង​ចែកចាយ​ផលិតផល​ពី​សាច់សត្វ​ដែល​ខុសច្បាប់ ទីតាំង​កែច្នៃ​គ្រឿងទេស​គ្មាន​ស្តង់ដារ ឬ​គ្មាន​អនាម័យ និង​ទីតាំង​ផ្ដល់​សេវា​សុខាភិបាល​ឯកជន​ខុសច្បាប់ ត្រូវបាន​ទប់ស្កាត់​និង​បង្ក្រាបបាន​ជាច្រើន​ករណី​។​


​ប្រភព​ដដែល​បន្តថា ប៉ុន្តែ​ទោះជា​យ៉ាងណា ​យើង​ត្រូវ​ទទួលស្គាល់ថា ការ​ចរាចរ​ផលិតផល​ក្លែងក្លាយ​ទាំងអស់​នៅក្នុង​តំបន់​និង​ពិភពលោក ​រួមទាំង​កម្ពុ​ជា​ផងដែរ​នៅតែ​ជា​ប្រធានបទ​ដ៏​ស្មុគស្មាញ​ ព្រមទាំង​កំពុង​វិវឌ្ឍន៍​ទៅក្នុង​ស្ថានភាព​ដ៏​គ្រោះថ្នាក់​ ដែល​ទាមទារ​ឲ្យ​គ្រប់​តួអង្គ​ពាក់ព័ន្ធ​ត្រូវ​បង្កើន​កិច្ចសហការ​និង​កិច្ចខិតខំ​ប្រឹងប្រែង​ព្យាយាម​បន្ថែមទៀត​ដើម្បី​ចូលរួម​ការពារ​ផលប្រយោជន៍​និង​សុខុមាលភាព​ប្រជាពលរដ្ឋ​៕​សរន​/Ha