សម្តេច​តេ​ជោ​ហ៊ុនសែន​,​សម្តេច​ភក្តី​សាយឈុំ​,​និង​សម្តេច​ចក្រី​ហេង​សំរិន​នឹង​អញ្ជើញ​ចូលរួម​វេទិកាសភា​អាស៊ី​-​ប៉ាស៊ីហ្វិក​

356
ចែករម្លែក

ដោយៈ​សុផល​/​ភ្នំពេញ​៖​ថ្នាក់ដឹកនាំ​ស្ថាប័ន​កំពូលៗ​នៃ​ព្រះរាជាណាចក្រ​កម្ពុ​ជាមាន​សម្តេច​អគ្គមហាសេនាបតី​តេ​ជោ​ហ៊ុនសែន​នាយករដ្ឋមន្ត្រី​,​សម្តេច​វិបុល​សេនា​ភក្តី​សាយឈុំ​ប្រធានព្រឹទ្ធសភា​,​និង​សម្តេច​អគ្គ​មហា​ពញា​ចក្រី​ហេង​សំរិន​ប្រធានរដ្ឋសភា​និង​ជា​ប្រធាន​វេទិកាសភា​អាស៊ី​-​ប៉ាស៊ីហ្វិក​។​

​សម្តេច​ទាំងបី​នឹង​អញ្ជើញ​ថ្លែង​សុន្ទរកថា​គន្លឹះ​ពេល​បើក​វេទិកាសភា​អាស៊ី​-​ប៉ាស៊ីហ្វិក​(APPF)​លើក​ទី​២៧​ដែល​ធ្វើជា​ម្ចាស់ផ្ទះ​ដោយ​រដ្ឋសភា​នៃ​ព្រះរាជាណាចក្រ​កម្ពុជា ពីថ្ងៃ​ទី​១៤​ដល់​ថ្ងៃទី​១៧​ខែមករា​ឆ្នាំ​២០១៩ នៅ​សណ្ឋាគារ​សុខា​សៀមរាប ខេត្តសៀមរាប ។​

​ពិធី​បើក​វេទិកាសភា​អាស៊ី​-​ប៉ាស៊ីហ្វិក​លើក​ទី​២៧​ជា​ផ្លូវការ នឹង​ប្រារព្ធ​ធ្វើឡើង​នៅ​ព្រឹក​ថ្ងៃទី​១៥ ខែមករា ឆ្នាំ​២០១៩ ដោយមាន​ព្រះរាជសារ​ស្វាគមន៍​របស់​ព្រះករុណា ព្រះបាទ​សម្តេច​ព្រះបរមនាថ នរោត្តម សីហមុនី ព្រះមហាក្សត្រ នៃ​ព្រះរាជាណាចក្រ​កម្ពុជា ជូន​ដល់​វេទិកាសភា​អាស៊ី​-​ប៉ាស៊ីហ្វិក​។​

​គួរ​ជម្រាប​ថា​កិច្ចប្រជុំ APPF ប្រារព្ធ​ធ្វើឡើង​ក្រោម​មូលបទ​“​ពង្រឹង​ភាពជា​ដៃគូ​សភា ដើម្បី​សន្តិភាព សន្តិសុខ និង​ការអភិវឌ្ឍ​ប្រកបដោយ​ចីរភាព​” (Strengthening Parliamentary Partnership for Peace, Security and Sustainable Development)​។​អញ្ជើញ​ចូលរួម​វេទិកា​នេះ​រួមមាន​ថ្នាក់ដឹកនាំ​រដ្ឋសភា ព្រឹទ្ធសភា​បណ្តា​ប្រទេស​សមាជិក​វេទិកាសភា​អាស៊ី​-​ប៉ាស៊ីហ្វិក​ចំនួន​២៧​ប្រទេស​ព្រមទាំង​វត្តមាន​នៃ​គណៈប្រតិភូ​ភ្ញៀវកិត្តិយស និង​ប្រទេស​ជា​អ្នកសង្កេតការណ៍​។​

​ថ្លែង​ក្នុង​កិច្ចប្រជុំ​ស្តីពី​ការរៀបចំ​ធ្វើជា​ម្ចាស់ផ្ទះ​វេទិកាសភា​អាស៊ី​-​ប៉ាស៊ីហ្វិក នៅ​វិមាន​រដ្ឋសភា ព្រឹក​ថ្ងៃទី​២ ខែមករា​នេះ លោក ឡេង ប៉េងឡុង អគ្គលេខាធិការ​នៃ​អគ្គលេខាធិការដ្ឋាន​រដ្ឋ​សភា បាន​ឲ្យ​ដឹងថា គណៈប្រតិភូ​ប្រទេស​ទាំង​២១ ដែល​នឹងត្រូវ​មក​ចូលរួម​ក្នុង​កិច្ចប្រជុំ​នេះ មានដូចជា​៖ អូស្ត្រាលី ឡាវ សហព័ន្ធរុស្ស៊ី ម៉ាឡេស៊ី ឥណ្ឌូនេស៊ី ចិន ហ្វី​ជី ម៉ុង​ហ្គោ​លី ណូ​វ៉ែល​ហ្សឺ​ឡង់ ម៉ិចស៊ីកូ ជប៉ុន ថៃ កូរ៉េខាងត្បូង ឈី​លី ប៉ា​ពួ​ញូ​ហ្គី​នៀ សិង្ហបូរី ជាដើម​។

​លោក​បាន​បន្តថា​គណៈប្រតិភូ​ប្រទេស​ទាំងនេះ​មាន​សរុប​២៣៩​នាក់​ក្នុងនោះ​ស្ត្រី​៨៩​នាក់​ដោយ​មិនទាន់​គិតពី​ការចូលរួម​ពី​គណៈប្រតិភូ​សភា​កម្ពុជា​។​សភា​កម្ពុជា​បានទទួល​ធ្វើជា​ម្ចាស់ផ្ទះ​រៀបចំ​កិច្ចប្រជុំ​ប្រចាំឆ្នាំ​នៃ​វេទិកាសភា អាស៊ី​-​ប៉ាស៊ីហ្វិក លើក​ទី​២៧ ខេត្តសៀមរាប ចាប់ពី​ថ្ងៃទី​១៤ ដល់​ថ្ងៃទី​១៧​ខែមករា ក្រោម​មូលបទ​ស្តីពី​«​ពង្រឹង​ភាពជា​ដៃគូ​សភា​ដើម្បី​សន្តិភាព​សន្តិសុខ​និង​ការអភិវឌ្ឍ​ប្រកបដោយ​ចីរភាព​»​។​

វេទិកា​ថ្នាក់​តំបន់​នេះ​នឹងត្រូវ​ស្វាគមន៍​ដោយ​ព្រះរាជសារ​របស់​ព្រះករុណា​ព្រះបាទ​សម្ដេច​ព្រះបរមនាថ​ន​រោ​ត្ដម​សីហមុនី​ព្រះមហាក្សត្រ​នៃ​ព្រះរាជាណាចក្រ​កម្ពុ​ជាមុន​ពិធី​បើក​ជា​ផ្លូវការ​នៃ​មហាសន្និបាត​របស់​ថ្នាក់ដឹកនាំ​ស្ថាប័ន​កំពូល​កំពូលៗ​របស់​កម្ពុជា​មានដូចជា​៖ សម្ដេច​អគ្គមហាសេនាបតី​តេ​ជោ ហ៊ុនសែន នាយករដ្ឋមន្ត្រី សម្តេច​វិបុល​សេនា​ភក្តី សាយ ឈុំ ប្រធានព្រឹទ្ធសភា និង​សម្ដេច​អគ្គ​មហា​ពញា​ចក្រី ហេង សំរិន ប្រធានរដ្ឋសភា និង​ជា​ប្រធាន​វេទិកាសភា​អាស៊ី​-​ប៉ាស៊ីហ្វិក លើក​ទី​២៧​។​

​លោក ងួន ញ៉ិល អនុប្រធាន​ទី​១​រដ្ឋសភា និង​ជា​ប្រធាន​គណៈកម្មការ​រៀបចំ​វេទិកាសភា​អាស៊ី​-​ប៉ាស៊ីហ្វិក លើក​ទី​២៧​បានឱ្យដឹងថា​ក្នុងនាម​សភា​កម្ពុជា​ជា​ប្រធាន​ដឹកនាំ​នៃ​កិច្ចប្រជុំ​នេះ​គឺ​បាន​ត្រៀម​ប្រធានបទ​សំខាន់​ទាក់ទង​នឹង​វិស័យ​នយោបាយ​សេដ្ឋកិច្ច​សង្គមកិច្ច​សម្រាប់​ដាក់ជូន​អង្គប្រជុំ​ពិភាក្សា​និង​សម្រេច​ក្នុង​ការកសាង​ទំនុកចិត្ត​។​

ដើម្បី​សន្តិភាព​សន្តិសុខ​និង​ការអភិវឌ្ឍ​ប្រកបដោយ​ចីរភាព​នៅក្នុង​តំបន់​ការប្រយុទ្ធប្រឆាំង​ភេរវកម្ម​និង​ឧក្រិដ្ឋកម្ម​ឆ្លងដែន​នៅក្នុង​តំបន់​និង​ការពង្រឹង​កិច្ចសហប្រតិបត្តិការ​រ​បស់​សភា​ក្នុងការ​ប្រើប្រាស់​ប្រព័ន្ធ​ព័ត៌មានវិទ្យា​ប្រកបដោយ​ការទទួលខុសត្រូវ​ដើម្បី​វឌ្ឍនភាព​សង្គម​។​

​វេទិកាសភា​អាស៊ី​-​ប៉ាស៊ីហ្វិក ដែលមាន​ឈ្មោះ​ជា​ភាសា​អង់គ្លេស “The Asia Pacific Parliamentary Forum”​បាន​បង្កើតឡើង​នៅ​ទីក្រុង​តូ​ក្យូ​ប្រទេស​ជប៉ុន​ក្នុង​ឆ្នាំ​១៩៩៣​ដើម្បី​ជំរុញ​យន្តការ​សភា​ក្នុង​ការកសាង​សុខសន្តិភាព ការអភិវឌ្ឍ​សង្គម សេដ្ឋកិច្ច ពាណិជ្ជកម្ម និង​កិច្ចសហប្រតិបត្តិការ​នៅក្នុង​តំបន់ និង​ពិភពលោក​ដោយ​ចីរភាព​។​

សភា​នៃ​ព្រះរាជាណាចក្រ​កម្ពុជា​បាន​ចូល​ជា​សមាជិក​ពេញសិទ្ធិ​នៃ​វេទិកាសភា​នេះ​កាលពី​ឆ្នាំ​១៩៩៥​។​បច្ចុប្បន្ន​APPF​មាន​សមាជិក​ពេញសិទ្ធិ​ចំនួន​២៧​ប្រទេស​៕S/

សម្តេច​តេ​ជោ​ហ៊ុនសែន​,​សម្តេច​ភក្តី​សាយឈុំ​,​និង​សម្តេច​ចក្រី​ហេង​សំរិន​នឹង​អញ្ជើញ​ចូលរួម​វេទិកាសភា​អាស៊ី​-​ប៉ាស៊ីហ្វិក​