សម្តេច​ពិជ័យ​សេនា ទៀ បាញ់​៖ មានតែ​សន្តិភាព​ទេ​ដែល​ជួយ​ទប់ស្កាត់​ពិការភាព​

580

(​ភ្នំពេញ​)៖សម្តេច​ពិជ័យ​សេនា ទៀ បាញ់ ឧបនាយករដ្ឋមន្ត្រី និង ជា​រដ្ឋមន្ត្រី​ក្រសួងការពារជាតិ​បាន​អំពាវនាវ​ឲ្យ​ទាំងអស់​ចូលរួម​ថែរក្សា​នៅ​សុខសន្តិភាព​ដែល​កំពុង​កើតមាន​នៅក្នុង​ព្រះរាជណាចក្រ​កម្ពុជា ។ សម្តេច​បាន​ចាត់ទុកថា​មានតែ​សន្តិភាព​មួយគត់​ដែល​អាច​ទប់ស្កាត់ និង កាត់បន្ថយ​បាន​នូវ​ពិការភាព ។​

​សម្តេច​ពិជ័យ​សេនា​បាន​ថ្លែង​អំពាវនាវ​បែបនេះ​នៅក្នុង​ទិវា​ជនពិការ​កម្ពុជា លើក​ទី ១៩ និង ទិវា​ជនពិការ​អន្តរជាតិ​លើក​ទី ៣៥​ក្រោម​ប្រធានបទ​« ធ្វើ​ឲ្យ​មាន​ភាពរឹងមាំ​ស្រប នឹង​សង្គម​មួយ​មាន​សន្តិភាព​សម្រាប់​ទាំងអស់គ្នា​» ដែល​បាន​ប្រារព្ធ​ធ​កាលពី​ព្រឹក​ថ្ងៃទី ៧ ខែ ធ្នូ​នៅ សាល​មហោស្រព​កោះ​ពេជ្រ ។​

​សម្តេច​ពិជ័យ​សេនា​មានប្រសាសន៍ថា​សង្គ្រាម​បាន​បន្សល់ទុក​នូវ​ជន ពិការ​ដ៏​ច្រើន ដែល​គិត​មកដល់​បច្ចុប្បន្ន​កម្ពុ​ជាមាន​ជនពិការ​រហូត​ជិត​កន្លះ​លាន​នាក់ ។​ក្នុងនោះ​រាប់បញ្ចូល​ទាំង​ជនពិការ​ដែល​បង្កឡើង​ដោយ​គ្រោះថ្នាក់​ចរាចរណ៍ និងដាច់សរសៃរ​ឈាមខួរក្បាល​ផងដែរ ។

សម្តេច​បន្តថា​តែ​បញ្ហាសំខាន់​របស់​យើង​គឺ​ការរក្សា​ឲ្យ​បាន​នូវ​សុខសន្តិភាព មាន​សន្តិភាព ទើប​យើង​មានលទ្ធភាព​ស្ថា​រ​នូវ​និតិ​សម្បទា​ជនពិការ មាន​សន្តិភាព​ទើប​អាច​កាត់បន្ថយ​បាន​នូវ ពិការភាព ។ ហេតុ​ដូចនេះហើយ​ទើប​រាជរដ្ឋាភិបាល​ខិតខំ​ធ្វើ​គ្រប់បែបយ៉ាង ដើម្បី​រក្សាបាន​នូវ​សុខសន្តិភាព រាប់ទាំង​ការបង្ក្រាប​ចលនា​បដិវត្ត​ន៍ព​ណ៌នាពេល​ថ្មីៗ​នេះ​ផងដែរ ។ សម្តេច​ពិជ័យ​សេនា ក៏បាន​ធ្វើការ​រិះគន់​ចំពោះ​អ្នកនយោបាយ​ប្រឆាំង​ដែរ​បាន​កំពុងធ្វើការ​អំពាវនាវ ឲ្យ​បរទេស​ដាក់ទណ្ឌកម្ម​ចំពោះ​កម្ពុជា ដែលជា​ទង្វើ​​មួយ​សម្លាប់​ជាតិ​ឯង ។​

​ពាក់ព័ន្ធ​នឹង​ម​ន្ទិ​ញ​រំលឹក​ខួប​ទិវា​ជនពិការ​កម្ពុជា​លើក​ទី​១៩ សម្តេច​បាន​មានប្រសាសន៍ ថា​ទិវា​ជនពិការ​អន្តរជាតិ​ត្រូវបាន​ប្រារព្ធ​ឡើង​ដើម្បី​រំលឹក​អំពី​ការតស៊ូ​ទាមទារ​សិទ្ធិ​ចូលរួម​ក្នុងសង្គម​របស់​ជនពិកា​រ​ដែលជា​ជន​បាត់បង់​កាយសម្បទា​កាយវិញ្ញាណ​និង​សតិបញ្ញា ប្រមាណ​ជាង មួយ​ប៊ី លាន​នាក់​(​ស្មើ​មួយ​ពាន់​លាន​)​នៅក្នុង​ពិភពលោក ដែល​តែងតែ​ជួបប្រទះ​នូវ​ឧបសគ្គ​រារាំង​នៅក្នុង​ជីវិត​ចាប់តាំងពី ទសវត្សរ៍ ឆ្នាំ​១៩៥០​នៅ​សហរដ្ឋអាមេរិក​និង​អឺ​រុ​ប​ដើម្បី​ធ្វើការ​ផ្លាស់ប្តូរ​នូវ​ស្ថានភាព​រស់នៅ របស់ ពួកគេ​ក្នុង​គោលបំណង​បង្កើន​ការយល់ដឹង​អំពី​បញ្ហា​ពិការភាព ដោយ​ផ្តោត​សំខាន់​លើ​សិទ្ធិ​ជន ពិការ​និង​ការធ្វើសមាហរណកម្ម​ជនពិការ​ទៅ លើ​គ្រប់​សកម្មភាព នយោបាយ សេដ្ឋកិច្ច សង្គម និង​វប្បធម៌​។ ​ ​ ​ ​ ​ ​

​ដោយឡែក​ព្រះរាជាណាចក្រ​កម្ពុជា​ប្រារព្ធ​ទិវា​ជនពិការ​នេះ​ឡើង​ដើម្បី​រំលឹក​អំពី​មហា វិ​នាសកម្ម​នៃ​របប​ប្រល័យពូជសាសន៍ ប៉ុល ពត ដែល​បាន​បន្សល់ទុក​នូវ​ផលវិបាក​ជាច្រើន ក្នុងនោះ រួមមាន ស្ត្រី​មេម៉ាយ កុមារកំព្រា ជនពិការ ព្រមទាំង​គ្រាប់មីន និង​កាកសំណល់​ជាតិផ្ទុះ​សល់ពី​សង្គ្រាម​។

​សម្តេច​ពិជ័យ​សេនា​បន្តថា​ឆ្នាំ​២០១៧​នេះ​ទិវា​ជនពិការ​កម្ពុជា​និង​ទិវា​ជនពិការ​អន្តរជាតិ​បាន​ប្រារព្ធ​ឡើង​ក្រោម​ប្រធានបទ​«​ធ្វើ​ឲ្យ​មាន​ភាពរឹងមាំ​ស្រប​នឹង​សង្គម​មួយ​មាន​សន្តិភាព​សម្រាប់​ទាំងអស់គ្នា​»​ក្នុង​គោលបំណង​ដើម្បី​អបអរសាទរ​ភាពជោគជ័យ​នៃ​វិស័យ​ពិការភាព​នៅ​កម្ពុជា​ហើយ បន្ត​បង្ហាញ​ឆន្ទៈ​របស់​រាជរដ្ឋាភិបាល​ក្នុងការ​លើកកម្ពស់​សិទ្ធិ និងការចូលរួម​របស់​ជ​ន​ពិការ ធានា​ដល់​ការធ្វើបរិ​យា​ប័ន្ន​និង​ចលនា​ការ​នៃ​វិស័យ​ពិការភាព​ដើម្បី​ទទួលបាន​ប្រសិទ្ធភាព នៃ​ការអនុវត្តច្បាប់​ស្ដីពីកិច្ចការពារ​និង​លើកកម្ពស់​សិទ្ធិ​ជនពិការ​អនុសញ្ញា​ស្ដីពី​សិទ្ធិ​ជនពិការ​ទសវត្សរ៍ ជនពិការ ប្រចាំ តំបន់​អាស៊ី​ប៉ាស៊ីហ្វិក​ឆ្នាំ ២០១៣-២០២២ , យុទ្ធសាស្ត្រ​អ៊ី​ន​ឈាន់​ធ្វើឲ្យ​សិទ្ធិក្លាយ​ជាការពិត ក៏ដូចជា​ផែនការ​យុទ្ធសាស្ត្រ​ជាតិ ស្ដីពី​ពិការភាព ២០១៤-២០១៨​៕​ដោយ​:​តារា​រិ​ទ្ធ​/sn