សេត​វិមាន​បើក​សមរភូមិ​ថ្មី​ក្នុង​សង្គ្រាម​ពាណិជ្ជកម្ម ផ្តោត​គោលដៅ​លើ​ប្រេ​ស៊ី​ល​អា​ហ្ស​ង់​ទីន​និង​បារាំង​

191
ចែករម្លែក

​ប្រធានាធិបតី​អាម៉េរិក​លោក​ដូ​ណា​ល់ ត្រាំ​បាន​បង្កើន​សង្គ្រាម​ពាណិជ្ជកម្ម​សកល​លើ​សមរភូមិ​ពីរ​កាលពី​ថ្ងៃ​ចន្ទ (២ ធ្នូ​) ដោយ​ប្រកាស​ពន្ធ​លើ​ដែក​ឧស្សាហកម្ម​ពី​ប្រទេស​ប្រេ​ស៊ី​ល​និង​អា​ហ្ស​ង់​ទីន ខណៈ​សម្លឹង​ដំឡើង​ពន្ធ ១០០ ភាគរយ​លើ​ផលិតផល​បារាំង​ពេញនិយម​រាប់សិប​មុខ​។​

​រដ្ឋបាល​ត្រាំ​និយាយថា ចំណាត់ការ​នេះ​គឺ​ចាំបាច់​ពីព្រោះ​ដៃគូ​ពាណិជ្ជកម្ម​អាម៉េរិក​កំពុង​ប្រព្រឹត្តិ​មិន​យុត្តិធម៌​ដើម្បី​ធ្វើឱ្យ​ខូចខាត​ដល់​សសរទ្រូង​សេដ្ឋកិច្ច​ប្រពៃណី​របស់​អាម៉េរិក​ក៏ដូចជា​ក្តីសង្ឃឹម​សម្រាប់​វិបុលភាព​នាពេល​អនាគត​។​

​នៅក្នុង​សារ Twitter នា​ព្រឹក​ព្រលឹម លោក​ត្រាំ​បាន​និយាយថា​លោក​កំពុង​បញ្ជា​ឱ្យ​ដំឡើង​ពន្ធ​ថ្មី​លើ​ដែកថែប​និង​អាលុយមីញ៉ូម​ពី​ប្រទេស​ប្រេ​ស៊ី​ល​និង​អា​ហ្ស​ង់​ទីន​ដើម្បី​ប្រឆាំងនឹង​អ្វីដែល​លោក​ហៅថា “​ការទម្លាក់​ថ្លៃ​រូបិយវត្ថុ​របស់​ពួកគេ​យ៉ាង​សម្បើម​” ដែល​ធ្វើឱ្យ​ខាតបង់​ដល់​កសិករ​អាម៉េរិក​។ ការប្រកាស​មិន​នឹកស្មាន​ដល់​នេះ​គឺ​ធ្វើឱ្យ​ប្រែ​ក្រឡាស់​កិច្ចព្រមព្រៀង​ឆ្នាំ ២០១៨ របស់​បណ្តា​ប្រទេស​អាម៉េរិក​ឡាទីន​ជាមួយ​លោក​ត្រាំ​ដើម្បី​ទទួលយក​កូតា​លើ​ការនាំចេញ​របស់​ពួកគេ​ទៅកាន់​សហរដ្ឋ​អាម៉េរិក​ជំនួស​ឱ្យ​ការដំឡើង​ពន្ធ​នាំចូល​។​

​ប៉ុន្មាន​ម៉ោង​ក្រោយមក​លោក រ៉ូបឺត ឡៃ​ធី​ស​ហ្ស័​រ ប្រធាន​អ្នកចរចា​ពាណិជ្ជកម្ម​របស់លោក​ប្រធានាធិបតី​ត្រាំ បានចេញ​ផ្សាយ​លទ្ធផល​នៃ​ការស៊ើបអង្កេត​រយៈពេល ៥ ខែ​ដែល​បាន​សន្និដ្ឋានថា ពន្ធ​លើ​សេវាកម្ម​ឌីជីថល​នៅ​បារាំង​គឺ​រើសអើង​ចំពោះ​ក្រុមហ៊ុន​អ៊ី​ន​ធឺ​ណេ​ត​អាម៉េរិក ដូច្នេះ​គួរតែ​រង​ការដំឡើង​ពន្ធគយ​រហូតដល់ ១០០ ភាគរយ​លើ​ទំនិញ​តម្លៃ ២,៤ ពាន់​ដុល្លារ​អាម៉េរិក ដូចជា ឈី​ស ទឹកដោះគោ​ជូរ ស្រា និង គ្រឿង​តុបតែង​ផ្សេងៗ​។​

​សំណើ ដែល​កំពុង​រង់ចាំ​ការសម្រេច​របស់​ប្រធានាធិបតី​ត្រាំ​នេះ កំពុង​គំរាម​បង្កើន​ការបែកបាក់​ខាង​ពាណិជ្ជកម្ម​ឆ្លង​សមុទ្រ​អា​ត្ល​ង់​ទិ​ក ស្របពេល​លោក​ត្រាំ​ចោទប្រកាន់​ក្រុមហ៊ុន​ផលិត​រថយន្ត​អឺរ៉ុប​រួចហើយ​ថា​ទទួលបាន​ការការពារ​ពី​រដ្ឋាភិបាល​ពី​ការប្រកួតប្រជែង​របស់​អាម៉េរិក​៕ ដោយ៖កញ្ញាដាលីស

ត្រាំ​បញ្ជា​ឱ្យ​ដំឡើង​ពន្ធ​ដែក​ពី​ប្រេ​ស៊ី​ល​និង​អា​ហ្ស​ង់​ទីន