ស្ត្រី​ម្នាក់​ត្រូវបាន​បណ្តេញ​ចេញពី​ការងារ ព្រោះ​ថ្លើមធំ​ហ៊ាន​លើក​ម្រាមដៃ​កណ្តាល​ដាក់​ក្បួន​រថយន្ត​របស់លោក​ដូ​ណា​ល់ ត្រាំ​

1477

​ស្ត្រី​ក្នុង​រូបថត​ម្នាក់ ដែល​បង្ហាញ​ម្រាមដៃ​កណ្តាល​ដាក់​ក្បួន​រថយន្ត​របស់​ប្រធានាធិបតី​អាមេរិក​ដូ​ណា​ល់ ត្រាំ ត្រូវបាន​បណ្តេញ​ចេញពី​ការងារ ដោយសារតែ​រូប​មួយ​សន្លឹក​នេះ​។​

​រូបភាព​នេះ​បាន​ល្បី​ខ្ចរខ្ចាយ​បន្ទាប់ពី​វា​ត្រូវបាន​គេ​ថត​នៅ​ថ្ងៃទី ២៨ ខែតុលា​នៅ​រដ្ឋ​វើ​ជី​នៀ ក្បែរ​រមណីយដ្ឋាន​វាយ​កូន​ហ្គោល​របស់​ត្រាំ​។​

​លោកស្រី ជូ​លី ប្រ៊ី​ស​មែន (Juli Briskman) ដែល​គេ​ស្គាល់​ថា​ជា​អ្នកជិះ​កង់​ក្នុង​រូបនេះ បាន​អះអាងថា​រូប​ខ្លួន​ត្រូវបាន​បណ្តេញ​ចេញពី​ការងារ​ដោយ​និយោជក​ក្រុមហ៊ុន Akima LLC បន្ទាប់ពី​គាត់​បាន​បង្ហោះ​វា​ទៅក្នុង​បណ្តាញ​សង្គម​របស់គាត់​។​

​ក្រុមហ៊ុន​នេះ​មិនបាន​ឆ្លើយតប​ទៅនឹង​ការស្នើសុំ​បំភ្លឺ​របស់​ប៊ី​ប៊ី​ស៊ី​ទេ​។​

​លោកស្រី ប្រ៊ី​ស​មែន បាន​ប្រាប់​បណ្តាញសារព័ត៌មាន​អាមេរិក​ថា ក្រុមហ៊ុន​បាន​ហៅ​គាត់​ចូលក្នុង​ការប្រជុំ គឺ​តែមួយ​ថ្ងៃ​ប៉ុណ្ណោះ​បន្ទាប់ពី​គាត់​បាន​ប្រាប់​នាយកដ្ឋាន​ធនធានមនុស្ស​ថា គាត់​គឺជា​ប្រធានបទ​នៃ​រូបថត​ដែល​គេ​ចែកចាយ​យ៉ាង​ទូលំទូលាយ​មួយ​សន្លឹក​នោះ​។​

​លោកស្រី​បាន​ប្រាប់​វេ​ប​សាយ​ព័ត៌មាន Huffington Post ថា ពួក​នាយក​ប្រតិបត្តិ​បាន​ប្រាប់​លោកស្រី​ថា ពួកគេ​បាន​ចាត់ថ្នាក់​រូបភាព​នេះ​ថា​ជា “​អំពើហិង្សា​” ឬ “​អាសគ្រាម​” ហើយ​ដូច្នេះ​គេ​ចាត់ទុកថា​វា​រំលោភ​លើ​គោលការណ៍​បណ្តាញ​សង្គម​របស់​ពួកគេ បន្ទាប់ពី​លោកស្រី​បាន​បង្ហោះ​វា​ទៅក្នុង​គណនី​ធ្វី​ត​ធើ និង ហ្វេ​ស​ប៊ុ​ក របស់គាត់​។​

​ទោះយ៉ាងណា លោកស្រី​ប្រ៊ី​ស​មែន​និយាយថា លោកស្រី​បាន​ទទូចថា​គាត់​មិនបាន​ស្ថិតក្នុង​ម៉ោង​ធ្វើការ​ទេ នៅពេលដែល​រូបថត​នេះ​ត្រូវបាន​ថត ហើយ​មិនបាន​លើកឡើង​ពី​ឈ្មោះ​និយោជក​របស់គាត់​នៅលើ​ទំព័រ​បណ្តាញ​សង្គម​ទេ​។​

​លោកស្រី​ប្រ៊ី​ស​មែន​ក៏បាន​លើកឡើង​ដែរ​ថា មិត្ត​រួមការ​ងារ​ម្នាក់​ត្រូវបាន​អនុញ្ញាតិ​ឱ្យ​រក្សា​ការងារ​របស់គាត់ បន្ទាប់ពី​គាត់​បាន​លុបចោល​ផុស​មួយ​ដែល​តាម​ការចោទប្រកាន់​ថា​គឺជា​ការប្រមាថ​នៅក្នុង​ឧបទ្ទវហេតុ​ដាច់ដោយឡែក​មួយ​។​

​ហេតុដូច្នេះ​ហើយ​ទើប​លោកស្រី​បាន​ចោទសួរ​ពី​មូល​ហេតុដែល​គាត់​ត្រូវបាន​បណ្តេញ​ចេញពី​ការងារ​ភ្លាមៗ​លឿន​បែបនេះ​។​

​ម្តាយកូន​ពីរ​អាយុ ៥០ ឆ្នាំ​រូបនេះ​តាម​សេចក្តីរាយការណ៍​ថា​គឺ​បានធ្វើការ​នៅ​ក្រុមហ៊ុន​ម៉ៅការ​របស់​រដ្ឋាភិបាល​នេះ​រយៈពេល ៦ ខែ​ហើយ ក្នុង​ផ្នែក​ទំនាក់ទំនង​៕ ដោយ៖ កញ្ញាដាលីស

លោកស្រី ជូ​លី ប្រ៊ី​ស​មែន ត្រូវបាន​បណ្តេញ​ចេញពី​ការងារ​ដោយសារតែ​លើក​ម្រាមដៃ​កណ្តាល​ដាក់​ក្បួន​រថយន្ត​លោក​ត្រាំ