ស្ថាន​បេសកកម្ម​អចិន្ត្រៃយ៍​កម្ពុជា​ប្រចាំ​នៅ អ​.​ស​.​ប ប្រតិកម្ម​ជាមួយ​អ្នករាយការណ៍​ពិសេស អ​.​ស​.​ប​

516
ចែករម្លែក

ដោយ​: មុនី​រ័ត្ន / ភ្នំពេញ​: ស្ថាន​បេសកកម្ម​អចិន្ត្រៃយ៍ នៃ​ព្រះរាជាណាចក្រ​កម្ពុជា ប្រចាំ​ការិយាល័យ​អង្គការសហប្រជាជាតិ នៅ​ទីក្រុង​ហ្សឺ​ណែវ ត្រូវបាន​បន្ត​រំខាន​ដោយ​សេចក្តីថ្លែងការណ៍​ព័ត៌មាន​មួយ​ផ្សេងទៀត​ចុះ​ថ្ងៃទី ១១ ខែវិច្ឆិកា ឆ្នាំ ២០១៩ របស់​លោកស្រី​សាស្ត្រាចារ្យ Rhona Smith អ្នករាយការណ៍​ពិសេស​ទទួលបន្ទុក​ស្ថានភាព​សិទ្ធិមនុស្ស​នៅ​កម្ពុជា ដែល​នៅតែ​បន្ត​ទាមទារ​ដោយ​គ្មាន​មូលដ្ឋាន សម្រាប់​បុគ្គល​ដែល​កំពុងមាន​ជម្លោះ​ផ្លូវច្បាប់ បើទោះជា​មាន​ការវិវឌ្ឍ​ជា​វិជ្ជមាន​ក្តី​។ នេះ​បើ​យោងតាម​សេចក្តីប្រកាស​ព័​ត៍​មាន​របស់​ស្ថាន​បេសកកម្ម​អចិន្ត្រៃយ៍ នៃ​ព្រះរាជាណាចក្រ​កម្ពុជា ប្រចាំ​ការិយាល័យ​អង្គការសហប្រជាជាតិ កាលពី​ថ្ងៃទី​១១ ខែវិច្ឆិកា ឆ្នាំ​២០១៩​។​

លោកស្រី​សាស្ត្រាចារ្យ Rhona Smith អ្នករាយការណ៍​ពិសេស អ.ស.ប ​ទទួលបន្ទុក​ស្ថានភាព​សិទ្ធិមនុស្ស​នៅ​កម្ពុជា

​ស្ថាន​បេសកកម្ម​អចិន្ត្រៃយ៍ នៃ​ព្រះរាជាណាចក្រ​កម្ពុជា បាន​បន្តថា ការទាមទារ​របស់​អ្នករាយការណ៍​ពិសេស​ឱ្យ​តុលាការ​បញ្ចប់​ការស៊ើបអង្កេត​អោយបាន​ឆាប់​ឬ​ទម្លាក់​បទ​ចោទ មានន័យ​ស្មើនឹង​ការជ្រៀតជ្រែក​ចូលក្នុង​ប្រព័ន្ធយុត្តិធម៌​របស់​កម្ពុជា​។ ការបែងចែក​អំណាច​ដាច់ពីគ្នា​រវាង​អំណាចនីតិប្រតិបត្តិ​និង​អំណាចតុលាការ ដែលជា​ស្ថាប័ន​ឯករាជ្យ មានចែង​ក្នុង​មាត្រា​៥១ មាត្រា​១២៨ និង​មាត្រា​១៣០ នៃ​រដ្ឋធម្មនុញ្ញ​នៃ​ព្រះរាជាណាចក្រ​កម្ពុជា​។

​សកម្មភាព​បែបនេះ ពុំមាន​អំណោយផល​រួមចំណែក​ដល់​ការពង្រឹង​នីតិរដ្ឋ និង​ការអនុវត្ត​ច្បាប់​នៅ​កម្ពុជា​ឡើយ​។ ការកែសម្រួល​លើ​លក្ខខណ្ឌ​មួយចំនួន​នៃ​ការត្រួតពិនិត្យ​របស់​តុលាការ​ចំពោះ​លោក កឹម សុខា គឺជា​លទ្ធផល​ដែល​កើតចេញពី​ការគោរព​កាតព្វកិច្ច​តុលាការ​នាពេល​កន្លងមក និង​ឈរលើ​មូលដ្ឋាន​មនុស្សធម៌​ពាក់ព័ន្ធ​នឹង​ស្ថានភាព​សុខភាព​របស់គាត់​។ ទោះជា​យ៉ាងណា លោក កឹម សុខា នឹងត្រូវ​ទទួលបាន​កា​រ​ជំនុំជម្រះ​ប្រកបដោយ​ភាពយុត្តិធម៌ បន្ទាប់ពី​ការស៊ើបអង្កេត​ត្រូវបាន​បញ្ចប់​តាម​នីតិវិធី​។​

​សេចក្តីថ្លែងការណ៍​រប​ស់​អ្នករាយការណ៍​ពិសេស នៅតែ​បន្តធ្វើ​អោយមាន​ការភ័ន្តច្រឡំ​ពី​ត្រូវ​មក​ខុស​។ ការ​ថ្លែង​សារ​នយោបាយ និង​ការបញ្ចេញមតិ​ទៅលើ​កិច្ចការងារ​សាធារណៈ​ជាមួយ​ពាក្យ​ជេរប្រមាថ ការ​ញុះញង់​ឱ្យ​ប្រព្រឹត្ត​អំពើហិង្សា ការប្រកាន់​ជាតិ​សាសន៍ និង​អំពាវនាវ​ឱ្យមាន​ការបះបោរ​ប្រឆាំង​រដ្ឋាភិបាល​ដែល​កើតចេញពី​ការបោះឆ្នោត​តាមបែប​ប្រជាធិបតេយ្យ ពុំមាន​តម្លៃ​ស្មើនឹង​សេរីភាព​បញ្ចេញមតិ និង​យោបល់​ឡើយ​។ គ្រប់​វិធានការ​ច្បាប់​ដែល​អាជ្ញាធរ​កម្ពុជា បាន​អនុវត្ត​កន្លងមក គឺ​ពុំមាន​ពាក់ព័ន្ធ​នឹង​ហេតុផល​នយោបាយ​ទេ ។ វិធានការ​ទាំងនោះ​ស្របទៅតាម​កតិកាសញ្ញា​អន្តរជាតិ​ស្តីពី សិទ្ធិ​ពលរដ្ឋ​និង​នយោបាយ (​មាត្រា​១៩) និង​ក្រមព្រហ្មទណ្ឌ​កម្ពុជា (​មាត្រា​៤៥១ និង​មាត្រា​៤៥៣)​។​

​នៅ​កម្ពុជា អ្នក​បំពាន​ច្បាប់​នឹង​ត្រូវបាន​ចោទប្រកាន់​និង​កាត់ទោស​តាម​នីតិវិធី ដោយ​ឈរលើ​មូលដ្ឋាន​នៃ​បទល្មើស​ប្រកបដោយ​ភស្តុតាង​រឹងមាំ ពុំមែន​ដោយសារតែ​ជនល្មើស​ស្ថិតក្នុង​ក្រុម​ណាមួយ​នោះឡើយ ។ បទល្មើស គឺជា​បទល្មើស ហើយ​មិនអាច​ប្រើ​ជាទ​ឡឺ​ករ​ណ៍ សម្រាប់​គោលបំណង​ផ្សេង​ណាមួយ​ទៀតឡើយ​។ ការអនុវត្ត​បែបនេះ​គឺ​ដូចគ្នា​នៅក្នុង​សង្គម​ប្រជាធិបតេយ្យ​ដទៃទៀត ។​

​ស្ថាន​បេសកកម្ម​កម្ពុជា​សូម​ក្រើនរំឭក​អ្នករាយការណ៍​ពិសេស​ថា អាណត្តិ​របស់​អ្នករាយការណ៍​គឺ​ជួយ​កម្ពុជា​នៅក្នុង​ការលើកស្ទួយ​និង​ការការពារ​សិទ្ធិមនុស្ស តាមរយៈ​កិច្ចសន្ទនា និង​កិ​ច្ចស​ប្រតិបត្តិការ ដោយ​ឈរលើ​មូលដ្ឋាន​នៃ​គោលការណ៍​អ​ព្យា​ក្រិ​ត្យ មិន​លម្អៀង សត្យានុម័ត មិន​ជ្រើសរើស​តែមួយ​ជ្រុង និង​មិន​បំ​ផ្លែង​ទៅជា​រឿង​នយោបាយ​។ អ្នករាយការណ៍​ពិសេស​ពុំមែន​ជា​ចៅក្រម ដែលមាន​អំណាច​កាត់សេចក្ដី​ឱ្យ​ដោះលែង​ជនណាម្នាក់​ឡើយ​៕