ហ្គា​រ៉េត សាវ​ហ្គេ​ត នឹង​និយាយ​ជាមួយ ដេ​ឡេ អា​លី ជុំវិញ​ល្បិច​ធ្វើ​ដួល​

275

​លោក ហ្គា​រ៉េត សាវ​ហ្គេ​ត (Garetth Southgate) នឹង​ជជែក​ជាមួយ​កីឡាករ ដេ​ឡេ អា​លី (Dele Alli) នៅ​សប្តាហ៍​នេះ អំពី​ភាពអាម៉ាស់​ជុំវិញ​ការធ្វើ​ពុត​ដួល​មុខ​ទី​របស់​កីឡាករ​រូបនេះ​និង​បញ្ហា​វិន័យ​។​
​ ​
FIFA បាន​ហាមឃាត់ អា​លី មិន​ឲ្យ​លេង​១​ប្រកួត បន្ទាប់ពី​កីឡាករ​រូបនេះ​លើក​ម្រាមដៃ​កណ្តាល ធ្វើជា​សញ្ញា​ដាក់​ក្រុម​ស្លូ​វ៉ា​គី កាលពី​ខែ​មុន ដែល​ធ្វើ ឲ្យ​អា​លី មិនអាច​បង្ហាញមុខ​នៅក្នុង​ការប្រកួត ជម្រុះ​វើ​ល​ខាប់​នៅ​ពហុកីឡាដ្ឋាន Wembley កាលពី​ថ្ងៃ​ព្រហស្បតិ៍​។​
​ ​
​អា​លី ជា​ខ្សែបម្រើ​របស់ Tottenham ត្រូវបាន​គេ​ចោទប្រកាន់​ផងដែរ​ថា ជាម​នុស្ស “​បោកប្រាស់​” បន្ទាប់ពី​ត្រូវ​អាជ្ញាកណ្តាល​ពិន័យ​កាត​លឿង​ដោយសារ​ធ្វើ​ពុត​ដួល​ពេល​ប្រកួត​ជាមួយ​ក្រុម Huddersfield កាលពី​ថ្ងៃ​សៅរ៍​។
​ ​
​លោក ហ្គ្រា​ហាំ ផូ​ល (Graham Poll) ជា​អតីត​អាជ្ញាកណ្តាល​នៅ​ក្របខណ្ឌ​ព្រី​មី​ញ៉េ​លី​កបាន​អះអាងថា អា​លី មិនអាច​បោះបង់​ល្បិច​ខូច​នេះ​បានទេ ហើយ ថា រឿងនេះ​បាន​បន្ថែម​បន្ទុក​លើ​កីឡាករ​រូបនេះ ដែល​ជាប់​បម្រាម មិន​ឲ្យ​លេង​១ ប្រកួត​នៅ​ក្របខណ្ឌ​ឆេ​ម​ពាន​លី​ករួច​ទៅហើយនោះ​។​
​ ​
​គ្រូបង្វឹក​អង់គ្លេស​រូបនេះ​បាន​កោះហៅ អា​លី សម្រាប់​ការប្រកួត​ជាមួយ​ក្រុម​ស្លូ​វេ​នី និង​លី​ទុយ​អា​នី មុនពេល FIFA ចេញ​បម្រាម​។​
​ ​
​ប៉ុន្តែ​បើទោះបីជា អា​លី ខកខាន​ការប្រកួត​ជាមួយ​ក្រុម​ស្លូ​វេ​នី ការជួបជុំ​នេះ​អាច​នឹង​ផ្តល់ឱកាស​ឲ្យ​លោក សាវ​ហ្គេ​ត និយាយ​ដោយផ្ទាល់​ជាមួយ អា​លី អំពី​ឥរិយាបថ​នៅលើ​ទីលាន​ប្រកួត​៕ ប្រែ​សម្រួល​: ពិសិដ្ឋ​

​កីឡាករ ដេ​ឡេ អា​លី (Dele Alli)