អង្ករ​វៀតណាម​ឡើងថ្លៃ​ដោយសារ​ខ្វះ​ទឹក ឈ្មួញ​សំរុក​ទិញ​ដើម្បី​បង្គ្រប់​ការបញ្ជាទិញ​តែ​នៅ​ប្រទេស​ផ្សេង​ធ្លាក់​ថ្លៃ​

157
ចែករម្លែក

​បន្ទាប់​ពី​ធ្លាក់​ថ្លៃ ឥឡូវ​អង្ករ​វៀតណាម​បាន​ឡើងថ្លៃ​ជា​លើកដំបូង​ក្នុង​រយៈពេល​៦​សប្តាហ៍​មក​នេះ ខណៈ​ការទិញ​ក្នុងស្រុក​កើនឡើង​និង​ការបារម្ភ​អំពី​ការខ្វះខាត​ទឹក​ផលិត​ស្រូវ​។​

​ថ្លៃ​ក៏បាន​កើនឡើង​ចំពេល​រូបបិយប័ណ្ណ​ដុង​របស់​វៀតណាម​ធ្លាក់​ថ្លៃ​។​

​នៅ​វៀតណាម អង្ករ​បាក់​៥​ភាគរយ បាន​កើន​ពី​៣៦០​ទៅ​៣៧០​ដុល្លារ​ក្នុង​មួយ​តោន​កាលពី​ថ្ងៃ​ព្រ​សហ្ប​តិ៍ទី​២៥​មេសា ដោយ​កើន​ពី​ថ្លៃ​៣៦០​ដុល្លារ​កាលពី​សប្តាហ៍​មុន​។​

​ឈ្មួញ​ម្នាក់​នៅ​ក្រុង​ហូជីមិញ បាន​និយាយថា «​មាន​សេចក្តី​ត្រូវការ​ខ្លាំង​ឡើង​និង​ក្រុមហ៊ុននាំចេញ​នាំគ្នា​ទិញ​ស្រូវ​ពី​កសិករ​ទុក​ដើម្បី​បំពេញ​ចំនួន​តាម​ការបញ្ជា​ទិញ​កាលពី​ពេលមុនៗ​​នៅ​ឆ្នាំ​នេះ​»​។​

​ថ្លៃ​ស្រូវ​អង្ករ​ក៏​កើន​ដោយសារតែ​បណ្តា​ខេត្ត​តាម​តំបន់​ដីសណ្តរ​ទន្លេមេគង្គ​កំពុង​ប្រឈម​ការខ្វះ​ទឹក ខណៈ​កសិករ​ចាប់ផ្តើម​សាប​ព្រួស​ស្រូវប្រាំង​។​

​នៅ​ឥណ្ឌា ដែល​ជា​ប្រទេស​នាំ​អង្ករ​នាំមុខគេ អង្ករ​បាក់​៥​ភាគរយ​បាន​ចុះ​មក​នៅ​ប្រមាណ​៣៧៥-៣៧៨​ដុល្លារ​ក្នុង​មួយ​តោន​នៅ​សប្តាហ៍​នេះ ដោយ​ចុះ​ពី​៣៧៧-៣៨០​ដុល្លារ​ក្នុង​មួយ​​តោន​កាលពី​សប្តាហ៍​មុន​។​

​ពួក​អ្នកជំនាញការ​ខាង​អង្ករ​បាន​និយាយថា តំរូវការ​នៅ​អាហ្វ្រិក​ធ្លាក់ចុះ​ដោយ​ការលក់​ចេញ​អង្ករ​ចាស់​ពី​ឃ្លាំង​ចិន​ទៅកាន់​អាហ្វ្រិក​ហាក់​គំហុក​ជាហេតុ​នាំ​អោយ​ធ្លាក់​ថ្លៃ​។​ការធ្លាក់​​ចុះ​តំលៃ​ប្រាក់​រូពី​ឥណ្ឌា​ក៏​ចូលរួម​មួយផ្នែក​ដែរ​។​

​នៅ​បង់​ក្លា​ដែស​ឯណោះ​វិញ ដោយសារ​ប្រឈម​ការធ្លាក់​ថ្លៃ​អង្ករ​និង​ការប្រមូល​ផល​ស្រូវ​បាន​ច្រើន​ ​ពួក​មន្ត្រី​បាន​និយាយថា​ពួក​ខ្លួន​នឹង​ពិនិត្យមើល​ឡើងវិញ​បំរាម​លើ​ការនាំចេញ​​អង្ករ​របស់​ប្រទេស​។​សូមបញ្ជាក់​ថា​បង់​ក្លា​ដែល​ដែល​ជា​ប្រទេស​ផលិត​ស្រូវ​លំដាប់​ទី​៤​ក្នុង​លោក បាន​ហាម​ការនាំចេញ​អង្ករ​ប្រភេទ​ខ្លះ​ទៅ​ក្រៅ​កាលពី​ឆ្នាំ​២០០៨​ក្រោយ​ការឡើង​​ថ្លៃ​អង្ករ​នៅក្នុង​ស្រុក​។​ការហាម​នាំចេញ​អង្ករ​គ្រប់​ប្រភេទ​ត្រូវបាន​ធ្វើឡើង​នៅ​មួយ​ឆ្នាំ​ក្រោយមក​។​

​អង្ករ​បាក់​៥​ភាគរយ​ថៃ មាន​តំលៃ​៣៨៥-៣៨៨​ដុល្លារ​ក្នុង​មួយ​តោន ដោយ​ចុះ​ពី​៣៩៣-៤១១​ដុល្លារ​ក្នុង​មួយ​តោន​កាល​ពី​មួយ​សប្តាហ៍​មុន ដោយសារ​តែ​ប្រាក់​បាត​ធ្លាក់​ថ្លៃ​ទល់នឹង​​ដុល្លារ​៕​ដោយ​៖​វាសនា​

ដោយ​អាច​មាន​ភាពរាំងស្ងួត​នៅ​ឆ្នាំនេះ ការផ្គត់ផ្គង់​អង្ករ ជា​ការព្រួយបារម្ភ​សំរាប់​ឈ្មួញ​ថៃ​និង​វៀតណាម​