អង្គការសហប្រជាជាតិ​បញ្ឈប់​ការ​ផ្តល់ជំនួយ​ម្ហូបអាហារ​ដល់​កុមារ​កូរ៉េខាងជើង​

346

​កម្មវិធី​ស្បៀងអាហារ​ពិភពលោក​របស់​អង្គការសហប្រជាជាតិ​បាន​បញ្ឈប់​ការដឹកជញ្ជូន​ស្បៀងអាហារ​ទៅឱ្យ​កូរ៉េខាងជើង ដែល​ជំនួយ​ភាគច្រើន​ទាំងនោះ គឺ សម្រាប់​កុមារ​ដែល​អត់ឃ្លាន​។ ការសម្រេចចិត្ត​នេះ​កើតឡើង​ចំពេល​មាន​ភាព​តានតឹង​កាន់តែ​កើនឡើង​ដែល​ពាក់ព័ន្ធ​នឹង​កម្មវិធី​នុយក្លេអ៊ែរ​របស់​កូរ៉េខាងជើង ប៉ុន្តែ បើ​ទោះ​យ៉ាងនេះ​ក្តី ខ្លួន​(​កម្មវិធី​ស្បៀងអាហារ​ពិភពលោក​) បាន​និយាយថា​ការសម្រេចចិត្ត​នេះ គឺ​សុទ្ធតែ​ទាក់ទង​នឹង​ការខ្វះ​លុយ​ជំនួយ​។​

​ខណៈពេលដែល​មានការ​ដាក់​សម្ពាធ​កាន់តែខ្លាំង​ឡើងលើ​កូរ៉េខាងជើង បន្ទាប់ពី​ការធ្វើ​តេស្ត​សាកល្បង​មី​ស៊ី​ល​ឆ្លង​ទ្វីប​ចុងក្រោយបង្អស់​របស់ខ្លួន​នោះ កម្មវិធី​ស្បៀងអាហារ​ពិភពលោក​របស់​អង្គការសហប្រជាជាតិ​នេះ បានប្រកាសថា ខ្លួន​បាន​បញ្ឈប់​ការផ្គត់ផ្គង់​ស្បៀងអាហារ​ទៅឱ្យ​រដ្ឋ​មួយ​នេះ​។​

​នៅក្រោម​កាលៈទេសៈ​ធម្មតា​នោះ អ្នកទទួល​ជំនួយ​ឧបត្ថម្ភ​របស់​កម្មវិធី​ស្បៀងអាហារ​របស់​អង្គការសហប្រជាជាតិ​នេះ គឺជា​កុមារ និង ស្ត្រី​មាន​ផ្ទៃពោះ​និង ស្ដ្រី​ដែល​កំពុង​បំបៅកូន ។

​កាសែត​កូរ៉េ Korea Times បានឱ្យដឹងថា កុមារ​ចំនួន​១៩០.០០០​នាក់ នៅ​ប្រទេស​កូរ៉េខាងជើង​បាន​ពឹង​ផ្អែកលើ​ជំនួយ​នេះ ដែល​ទើបតែ​ត្រូវបាន​ផ្អាក​នេះ​។​

​កម្មវិធី​ស្បៀងអាហារ​ពិភពលោក​នេះ បាន​អះអាងថា​ការខ្វះ​លុយ​បាន ធ្វើឱ្យ​ការផ្គត់ផ្គង់​ជំនួយ​នេះ​មិនអាច​ធ្វើទៅ​រួច​។

​លោក លីម យ៉ុង​ជុន ប្រធាន​កម្មវិធី​ស្បៀងអាហារ​កូរ៉េ បាន​និយាយថា កម្មវិធី​ស្បៀងអាហារ​នេះ​ត្រូវការ​ប្រមូលប្រាក់​ឱ្យបាន​ចំនួន​២៥,៥​លាន​ដុល្លារ​ដើម្បី​អាច​ផ្តល់​អាហារ​ដល់​កុមារ​និង​ក្រុម​ងាយ​រងគ្រោះ​ដទៃទៀត​
​នៅ​ប្រទេស​កូរ៉េខាងជើង​សម្រាប់​រយៈពេល​៦​ខែ​បន្ទាប់ ។ ឥឡូវនេះ កម្មវិធី​ស្បៀងអាហារ​នេះ មាន​លុយ​តែ​ពាក់កណ្តាល​ប៉ុណ្ណោះ​នៃ​ចំនួន​លុយ​សរុប​នេះ​៕ ដោយ៖ សុខា

កម្មវិធី​ស្បៀងអាហារ​ពិភពលោក​របស់​អង្គការសហប្រជាជាតិ​បញ្ឈប់​ការ​ផ្តល់ជំនួយ​ម្ហូបអាហារ​ដល់​កុមារ​កូរ៉េខាងជើង​ដោយសារ​ខ្វះ​លុយ