អតីតរដ្ឋមន្ត្រី​ការពារជាតិ​ស្រីលង្កា​ឈ្នះ​ការបោះឆ្នោត​ប្រធានាធិបតី​

541
ចែករម្លែក

​អតីតរដ្ឋមន្ត្រី​ក្រសួង​ការពារជាតិ​ស្រីលង្កា​លោក ហ្គោ​តា​បា​យ៉ា រ៉ា​ចា​ប៉ាក់​សា (Gotabaya Rajapaksa) បានទទួល​ជ័យជម្នះ​យ៉ាង​ងាយស្រួល​នៅក្នុង​ការបោះឆ្នោត​ជ្រើសរើស​ប្រធានាធិបតី​របស់​ប្រទេស​នេះ​។​

​ប្រធាន​គណៈកម្មការ​បោះ​ឆ្នោត​លោក ម៉ា​ហ៊ី​ន​ដា ដេ​សា​ព្រី​យ៉ា បានប្រកាស​លទ្ធផល​ជា​ផ្លូវការ​ថា លោក​រ៉ា​ចា​ប៉ាក់​សា​ឈ្នះ​ជាង ៦,៩ លាន​សំឡេង​នៅក្នុង​ការបោះឆ្នោត​កាលពី​ថ្ងៃ​សៅរ៍​ទី​១៦​វិច្ឆិកា គឺ​លើស ១,៣ លាន​សំឡេង​លើ​គូប្រជែង​ជិត​បំផុត​របស់គាត់ គឺ​រដ្ឋមន្ត្រីក្រសួង​លំនៅដ្ឋាន លោក សាជី​ត ប្រេ​ម៉ា​ដា​សា (Sajith Premadasa)​។​

​ភាគរយ​នៃ​សន្លឹកឆ្នោត​របស់លោក​រ៉ា​ចា​ប៉ាក់​សា​គឺ ៥២,២៥ ភាគរយ គឺ​លើស ៥០ ភាគរយ​បូក​ឆ្នោត​មួយ​សន្លឹក ដែល​ត្រូវការ​ដើម្បី​ទទួលបាន​ជ័យជម្នះ​។​

​បេក្ខជន​ប្រធានាធិបតី​នៃ​គណបក្សកាន់អំណាច​រប​ស់​ប្រទេស​ស្រីលង្កា​លោក​ប្រេ​ម៉ា​ដា​សាបាន​ទទួលស្គាល់​បរាជ័យ​ក្រោម​ថ្វីដៃ​លោក​រ៉ា​ចា​ប៉ាក់​សា ដោយនិយាយ​ថា​លោក​នឹង​គោរព​ការសម្រេចចិត្ត​របស់​ប្រជាជន​។​

​លោក​រ៉ា​ចា​ប៉ាក់​សា ដែលជា​អ្នក​នាំមុខគេ​នៃ​យុទ្ធនាការ​បោះឆ្នោត​និង​ដែល​ធ្លាប់​បម្រើការ​ជា​រដ្ឋមន្ត្រី​ការពារជាតិ​នៅក្រោម​ការដឹកនាំ​របស់​បងប្រុស​គាត់​គឺ​អតីត​ប្រធានាធិបតី ម៉ា​ហ៊ី​ន​ដា រ៉ា​ចា​ប៉ាក់​សា បាន​សន្យា​ស្តារ​សន្តិសុខ​ឡើងវិញ​ចំពោះ​ប្រទេស​កោះ​មហាសមុទ្រ​ឥណ្ឌា​មួយ​នេះ ដែល​កំពុង​ងើបឡើង​វិញ​ពី​ការវាយប្រហារ​ភេរវកម្ម​កាលពី​បុណ្យ​អ៊ី​ស្ទើរ​ឆ្នាំមុន​។​

​លទ្ធផល​នេះ​បានបង្ហាញ​ពី​ការបែកបាក់​គ្នា​យ៉ាង​ជ្រាលជ្រៅ​រវាង​ក្រុម​ជនជាតិភាគតិច​និង​ក្រុម​សាសនា​នៅក្នុង​ប្រទេសមួយ​ដែលមាន​ជម្លោះ​និង​ការ​បង្ហូរឈាម​ជាច្រើន​ទសវត្សរ៍​ចាប់តាំងពី​ទទួលបាន​ឯករាជ្យ​ពី​ចក្រភព​អង់គ្លេស​ក្នុង​ឆ្នាំ ១៩៤៨៕ ដោយ៖ កញ្ញាដាលីស

លោក ហ្គោ​តា​បា​យ៉ា រ៉ា​ចា​ប៉ាក់​សា ឈ្នះ​ការបោះឆ្នោត​ប្រធានាធិបតី​ស្រីលង្កា