អប់រំ​សីលធម៌​តាម​លំ​អាន​ព្រះ​ពុ​ទ្ឋ​សាសនា​ដល់​សិស្សានុសិស្ស​នៅ​វិទ្យាល័យ​អារញ្ញ​សាគរ​ស៊ី​អែ​ហ្វ​ស៊ី​CFC

792
ចែករម្លែក

ដោយ​: គូលែន​
​សៀមរាប​:
សមាគម​មរតក​ព្រះ​ពុ​ទ្ឋ​សាសនា​ដឹកនាំ​ដោយ​ព្រះ​តេជគុណ​រតន​ឃោស​កោ សោម សេរី​ឬ​ទ្ឋី ស្ថាបនិក និង​ជានា​យក​ប្រតិបត្តិ​សមាគម បានរៀបចំ​ទិវា​អប់រំ​សីលធម៌​តាម​លំ​អាន​ព្រះ​ពុ​ទ្ឋ​សាសនា និង​ឧបត្ថម្ភ​សម្ភារៈ​សិក្សា​ដល់​សិស្សានុសិស្ស​៨៥៥​រូប នៅ​វិទ្យាល័យ​អារញ្ញ​សាគរ​ស៊ី​អែ​ហ្វ​ស៊ី​CFC កាលពី​រសៀល​ថ្ងៃទី​២៥ ខែមិថុនា ឆ្នាំ​២០១៩ ស្ថិតនៅ​សង្កាត់​សៀមរាប ក្រុង​សៀមរាប ខេត្តសៀមរាប ក្រោម​ព្រះអធិបតីភាព ព្រះមហា​វិមលធម្ម ពិន សែម សិរី​សុ​វ​ណ្ណោ ព្រះ​រាជាគណៈ​ថ្នាក់​ទោ និង​ជា​ឧ​ត្ត​ម​ទីប្រឹក្សា​គណៈសង្ឃ​នាយក​ជា​សមាជិក​ថេរៈ​សភា​សង្ឃ និង​ជា​ព្រះចៅអធិការ​វត្ត​រាជ​បូ​ណ៌​, ព្រះ​វត្តមាន ព្រះ​សុ​មង្គល​សិលា​ចា​រ្យ អាភាក​រោ ជុំ គឹម​ឡេង ព្រះ​មេគណ​ខេត្ត​,​និង លោកស្រី យូ សុភា អភិបាលរង​នៃ​គណៈ​អភិបាលខេត្ត​សៀមរាប​។​

​ព្រះ​តេជគុណ​រតន​ឃោស​កោ សោម សេរី​ឬ​ទ្ឋី បាន​មាន​សង្ឃដីកា​ថា ទិវា​នេះ​រៀបចំឡើង​ក្នុង​គោលបំណង​ទ្រទ្រង់​និង​លើកស្ទួយ​ព្រះ​ពុ​ទ្ឋ​សាសនា​ឲ្យ​ស្ថិតស្ថេរ​គ្រប់​៥​ពាន់​ព្រះវស្សា ឲ្យ​វិស័យនេះ​រីកចម្រើន​រុងរឿង​សមស្រប​ទៅតាម​ស្ថានភាព​សង្គមជាតិ និង ដើម្បី​ឲ្យ​សិស្សានុសិស្ស​ស្វែងយល់​ពី​ពុ​ទ្ឋោ​វាទ និង ដើម្បី​ចែករំលែក​ចំណេះដឹង និង​បណ្តុះ​នូវ​សង្គហធម៌ សីលធម៌ សុជីវធម៌ ដល់​ពុ​ទ្ឋ​សាសន​ខេមរជន ដល់​សិស្សានុសិស្ស ។

​ព្រះ​តេជគុណ បាន​មាន​សង្ឃដីកា​បន្តថា ម្យ៉ាងទៀត​ដោយសារ​ចង់​ឲ្យ​កូនចៅ​ជំនាន់​ក្រោយ​ទទួលបាន​ការសិក្សា​មានចំណេះដឹង​ពិតប្រាកដ ស្គាល់​ពី​បុណ្យ​បាប គុណ​ទោស ចេះ​គោរព​ប្រតិបត្តិ​ម្តាយ​ឪពុក ចាស់​ព្រឹ​ទ្ឋា​ចា​រ្យ លោកគ្រូ​អ្នកគ្រូ និង ដើម្បី​ផ្សារភ្ជាប់ រវាង​ព្រះសង្ឃ​និង សិស្សានុសិស្ស ក្នុងន័យ​ជួយ​លើក​កំពស់​វិស័យ​អប់រំ​និង​លើកទឹកចិត្ត​ដល់​សិស្ស ឲ្យ​យកចិត្តទុកដាក់​សិក្សា​រៀនសូត្រ ក៏ដូចជា​បណ្តុះ​គុណធម៌ អប់រំ​សីលធម៌ ចរិយា​ធម៌​ដល់​សិស្សានុសិស្ស ដែល​ពួកគាត់​ជា​យុវជន​ជំនាន់​ក្រោយ ជា​ទំពាំង​ស្នង​ឬ​ស្សី​នាពេល​អនាគត ។

​លោកស្រី យូ សុភា បាន​បញ្ចា​ក់ថា ការរៀបចំ​ទិវា​អប់រំ​សីលធម៌​តាម​លំ​អាន​ព្រះ​ពុ​ទ្ឋ​សាសនា​នេះ ជាការ​បញ្ជាក់​កាន់តែច្បាស់​ថា រាជរដ្ឋាភិបាល​កម្ពុជា​បានផ្តល់​តួនាទី​យ៉ាងសំខាន់​ដល់​ព្រះ​ពុ​ទ្ឋ​សាសនា​ក្នុងសង្គម​ខ្មែរ តាំងពី​អតីតកាល​រហូតដល់​ប​ច្ចុ​ប្បន្ន និង​ទៅ​អនាគត ហើយ​បាន​ចារិក​ទុក​ក្នុង​រដ្ឋធម្មនុញ្ញ​ថា ព្រះ​ពុ​ទ្ឋ​សាសនា​ជា​សា​នា​របស់​រដ្ឋ ។

​ដូច្នេះ​រដ្ឋ​មាន​តួនាទី​ផ្សព្វផ្សាយ​និង​លើកតម្កើង​គ្រឹះស្ថាន​អប់រំ​ផ្នែក​ព្រះពុទ្ធសាសនា​រួមមាន សាលា​បាលី និង ពុ​ទ្ឋិ​ក​សិក្សា​នៅ​គ្រប់​កម្រិត លើសពីនេះ វិស័យ​ពុទ្ធចក្រ និង អាណាចក្រ ដែល​វិស័យ​ទាំងពីរ​នេះ ត្រូវ​ដើរ​ទន្ទឹមគ្នា​ទើប​ធ្វើ​ឲ្យ​ជាតិ​ទទួលបាន​នូវ​ភាព​ថ្កុំថ្កើង​រុងរឿង ក្នុង​សុខសន្តិភាព​បរិបូរណ៍ ។

​លោកស្រី បន្តថា​ទោះបី​ជំនឿ​ត្រូវ​យើង​ប្រតិបត្តិ​យ៉ាង​ខ្ជាប់ខ្ជួន​ក្តី តែ​ក៏​យើង​ត្រូវខិតខំ​ធ្វើ​ឲ្យ​ប្រសើរឡើង​ថែមទៀត លើ​កត្តា​សំខាន់ៗ​មួយចំនួន ដូចជា​ពង្រឹង​នូវ​ការអនុវត្ត​នូវ​ខ្លឹមសារ អនុ​សំ​វច្ចរ​មហាសន្និបាត​ម​ន្ត្រី​សង្ឃ​ឲ្យ​មាន​ប្រ​សិ​ទ្ឋ​ភាព ពង្រឹង​តួនាទី​និង​ភារកិច្ច​មន្ត្រី​សង្ឃ​គ្រប់​ថ្នាក់​ឲ្យ​កាន់តែ​ប្រសើរឡើង និង កាត់បន្ថយ​អធិករណ៍​ក្នុង​វត្ត​អារាម​ឲ្យ​កាន់តែ​តិច​ទៅៗ និង ឈានទៅ​លុបបំបាត់​ទាំងស្រុង និង​បង្កើន​គំនិត​បណ្តុះ​គុណធម៌ សីលធម៌ ចរិយា​ធម៌ ឲ្យ​មាន​ទឹកចិត្ត​ស្រឡាញ់​គោរព សណ្តោស​និង​ការដឹងគុណ​នៃ​អ្នកមានគុណ​ទាំងឡាយ​របស់​ពលរដ្ឋ​៕ ល​