អភិបាលខេត្ត​កោះកុង​កោតសរសើរ​គជប​អនុវត្ត​នីតិវិធី​ការបោះឆ្នោត​ក្រុមប្រឹក្សា​​ដោយ​យុត្តិធម៌​

569
ចែករម្លែក

​អត្ត​ប​ទៈ​សុ​ផានី​តា​/​កោះកុង​៖​ត្បិត​លទ្ធផល​ការបោះឆ្នោត​ជ្រើសរើស​ក្រុមប្រឹក្សា​ប្រកាស​ជា​ផ្លូវការ​រួចរាល់​ហើយក៏​ពិតមែន​ក៏​អភិបាលខេត្ត​កោះកុង​នៅតែ​បង្ហាញ​ការកោតសរសើរ​ចំពោះ​គណៈកម្មការ​រៀបចំ​ការ​បោះឆ្នោត​ខេត្ត​ដែល​បាន​យកចិត្ត​ទុក​ខិតខំ​បំពេញការងារ​ដោយ​តម្លាភាព​សេរីភាព​និង​យុត្តិធម៌​ប្រកបដោយ​ស្មារតី​ទទួលខុសត្រូវ​ខ្ពស់​។​

​គណៈកម្មការ​រៀបចំ​កា​របោះ​ឆ្នោត​ខេត្តកោះកុង​បានរួម​គ្នា​រក​ដំណោះស្រាយ​នានា​ជាមួយ​អាជ្ញាធរ​សមត្ថកិច្ច​និង​បណ្តា​គណបក្សនយោបាយ​អ​ង្គ​ការ​ស៊ីវិល​លើ​វិធាន​ការបង្ការ​និង​ទប់ស្កាត់​រាល់​បញ្ហា​ទំនាស់​ទាំងឡាយ​ដែល​អាច​កើតមានឡើង​ជាយថាហេតុ​នៅ​គ្រប់​ដំណាក់កាល​រៀបចំ​ការបោះឆ្នោត​ក្រុមប្រឹក្សា​កន្លងទៅ​។​

​កិច្ចខិតខំ​បំពេញការងារ​តាម​ជំនាញ​នេះ ត្រូវបាន​លោកស្រី មិថុនា ភូ​ថង អភិបាលខេត្ត​កោះកុង កោតសរសើរ​យ៉ាងខ្លាំង​ដែល​បានធ្វើឱ្យ​ការបោះឆ្នោត​ក្រុមប្រឹក្សា​រាជធានី​ខេត្ត​ក្រុង​និង​ស្រុក​កាលពី​ថ្ងៃទី​២៦​ខែឧសភា​កន្លងទៅ​ដំណើរការ​យ៉ាង​រលូន​គួរឱ្យកត់សម្គាល់​ដោយ​ពុំមាន​បាតុភាព​អាក្រក់​មួយណា​កើតឡើង​នោះទេ​។​រឹតតែ​ពិសេស​គឺ​គ្មាន​ឡើយ​ពាក្យបណ្តឹង​តវ៉ា​លទ្ធផល​បោះឆ្នោត​។​

​ការ​ថ្លែង​លើកទឹកចិត្ត​របស់​អភិបាលខេត្ត​កោះកុង​អំឡុងពេល​អញ្ជើញ​បើក​អង្គសន្និបាត​បូកសរុប​ការងារ​បោះឆ្នោត​ជ្រើសរើស​ក្រុមប្រឹក្សា អណ​ត្តិ​ទី​៣ និង​ការពិនិត្យ​ប​ញ្ចី​ឈ្មោះ និង​ការចុះឈ្មោះ​បោះឆ្នោត ឆ្នាំ​២០១៩​។​

លោកស្រី មិថុនា ភូ​ថង ជំរុញ​ដល់​មន្ត្រី​គណៈកម្មការ​រៀបចំ​ការ​បោះឆ្នោត​ខេត្តកោះកុង ចាំបាច់​សហការគ្នាជាមួយ​អាជ្ញាធរខេត្ត ក្រុង ស្រុក ឃុំ និង​ភូមិ ពិសេស​សមត្ថកិច្ច​មូល​ដ្ឋា​ន​ពាក់ព័ន្ធ ដើម្បី​ធ្វើយ៉ាងណា​ធានា​នូវ​ការពិនិត្យ​បញ្ជី​ឈ្មោះ​និង​ការចុះឈ្មោះ​បោះឆ្នោត​មាន​ទិន្នន័យ​ត្រឹមត្រូវ​សុវត្ថិភាព ស្របតាម​ស្ថានភាព​បច្ចុប្បន្ន​។​

​ដោយឡែក​ចំពោះ​រាល់​ចំណុច​ខ្វះចន្លោះ​លោកជំទាវ​អភិបាល​ក៏​ជំរុញ​ដល់​មន្ត្រី​គណៈកម្មការ​រៀបចំ​ការ​បោះឆ្នោត​ខេត្ត​បន្ត​ខិតខំ​សម្របសម្រួល​ពង្រឹងសមត្ថភាព​ក៏ដូចជា​អប់រំ​ផ្សព្វផ្សាយ​ព័ត៌មាន​ដល់​សាធារណជន​បាន​យល់ដឹង​ពី​ដំណើរការ​រៀបចំ​ការបោះ​ឆ្នោត សម្រាប់​ការបោះឆ្នោត​អាណ​តិ្ត​ក្រោយៗ​ទៀត ប្រកបដោយ​សុ​ឆ​ន្ទះ​ពិតប្រាកដ​។​

​ប្រធាន​គណៈកម្មការ​រៀប​ចំការ​បោះឆ្នោត​ខេត្ត លោក សេង ណេង លើកឡើងថា ខេត្តកោះកុង ការបោះឆ្នោត​ជ្រើសរើស​ក្រុមប្រឹក្សា​ខេត្ត​ក្រុង​និង​ស្រុក​កាលពី​ថ្ងៃទី​២៦​ខែឧសភា​មាន​គណបក្សនយោបាយ​ចំនួន​៣​ចូលរួម​ប្រកួតប្រជែង​ដោយមាន​អ្នកបោះឆ្នោត​ចំនួន​១៦៧​នាក់​។​

ក្នុងនោះ​មាន​គណបក្ស​ប្រជាជន​កម្ពុជា​គណបក្ស​ស​ញ្ជា​ត្តិ​កម្ពុជា​និង​គណបក្ស​យុវជន​កម្ពុជា​។​ប្រធាន​គណៈកម្មការ​រៀប​ចំការ​បោះឆ្នោត​ខេត្ត​បង្ហាញថា​លទ្ធផល​នៃ​ការបោះឆ្នោត​គឺ​មន្ត្រី​កូតា​មកពី​គណបក្ស​ប្រជាជន​កម្ពុជា​ទទួល​ជ័យលាភី បាន​ក្លាយជា​ប្រធាន និង​សមាជិក សមាជិក ក្រុមប្រឹក្សា​ខេត្ត ក្រុង និង​ស្រុក​ទាំងអស់​។

​លោក សេង ណេង អះអាង​ទៀតថា ទោះបីជា​មានការ​សម្រេច​បាន​នូវ​ជោគជ័យ​បែបនេះ​ក្តី ក៏​ជា​បទពិសោធន៍​ការងារ​បន្ថែម​សម្រាប់​មន្ត្រី​របស់ខ្លួន​ខ​ណៈ​ភាព​ប្រឈម​ខ្វះចន្លោះ​ចេះ​កើតមាន​បន្តបន្ទាប់ រួមមាន​៖ ដោយ​គណបក្ស​មួយចំនួន​មិនបាន​ដាក់​ភ្ញាក់​ងារ​សង្កេតការណ៍​គ្រប់​ការិយាល័យ និង​ទីស្នាក់ការ​ច្បាស់លាស់​ដែលនាំឱ្យ​លំបាក​ទំនាក់ទំនង​។​

ថវិកា​ឧបត្ថម្ភ​ដល់​សមត្ថកិច្ច​និង​មន្ត្រី​ចុះ​មូលដ្ឋាន​ប្រជាពលរដ្ឋ​ទៅពិនិត្យ​បញ្ជី​ឈ្មោះ​និង​ចុះឈ្មោះ​បោះឆ្នោត​ថ្មី​នៅមាន​ចំនួន​តិចតួច​និង​ការលំបាក​បញ្ចូល​ទិន្នន័យ​ចុះឈ្មោះ​ព្រោះតែ​តំបន់​រស់នៅ​ពលរដ្ឋ​ឆ្ងាយ​ដាច់​ស្រ​យោល​គ្មាន​សេវា​ទូរស័ព្ទ និង​Internet ជាដើម​។​

​យោងតាម​លទ្ធ​ផលរប​ស់​គណៈកម្មការ​រៀបចំ​ការបោះឆ្នោត​ខេត្តកោះកុង បង្ហាញថា ការពិនិត្យ និង​ការចុះឈ្មោះ​បោះឆ្នោត​ឆ្នាំ​២០១៩ ដែលមាន​រយៈពេល​២២​ថ្ងៃ ចាប់ពី​ថ្ងៃទី​១ ដល់​ថ្ងៃទី​២២ ខែឧសភា​ថ្មីៗ​នេះ​មាន​ពលរដ្ឋ​មក​ចុះឈ្មោះ​បោះឆ្នោត​ថ្មី​៧៤២​នាក់​ផ្ទេរ​ចូល​ចំនួន​១០២​និង​ប្តូរ​ការិយាល័យ​ក្នុង​ឃុំ​សង្កាត់​ចំនួន​៥​នាក់​។​

ក៏មាន​ដែល​ការ​លុប​អ្នកបោះឆ្នោត​ចេញពី​បញ្ជី​បោះឆ្នោត​ចំនួន​២៤៤​នាក់ ដោយសារតែ​ការ​មរណភាព​ផ្លាស់​ទីលំនៅ​និង​ប្តូរ​ការិយាល័យ​។​បច្ចុប្បន្ន​ពលរដ្ឋ​មានឈ្មោះ​ក្នុង​បញ្ជី​បោះឆ្នោត​ឆ្នាំ​២០១៩​ចំនួន​សរុប​៦៦.២៥៣​នាក់​៕S/

​លោកស្រី មិថុនា ភូ​ថង អភិបាលខេត្ត​កោះកុង