អាមេរិក​ទទូច​ទាហាន​អោយ​អនុញ្ញាតអោយ​ជំនួយ​ចូល ខណៈ​មេដឹកនាំ​ប្រឆាំង​បន្ត​យុទ្ធនាការ​បណ្តេញ​ប្រធានាធិបតី​ម៉ា​ឌូ​រ៉ូ​

442
ចែករម្លែក
  • 140
    Shares

រដ្ឋមន្ត្រីការបរទេស​អាមេរិក​លោក​ម៉ៃ ផ​ម​ផេវ កំពុង​អំពាវនាវ​អោយ​កងកម្លាំង​សន្តិសុខ​វេ​ណេ​ស៊ុយអេ​ឡា «​ធ្វើ​ការងារ​ត្រឹមត្រូវ​»​ដោយ​អនុញ្ញាត​អោយ​ជំនួយ​មនុស្សធម៌​ចូល​​ក្នុងប្រទេស​វេ​ណេ​ស៊ុយអេ​ឡា​។​

​នៅក្នុង​សេចក្តីថ្លែងការណ៍​មួយ​កាលពី​យប់​ថ្ងៃ​សៅរ៍ លោក​ផ​ម​ផេវ បាន​និយាយ​ថា​កងកម្លាំង​សន្តិសុខ​គួរ​ការពារ​ជន​ស៊ីវិល​ប្រឆាំងនឹង​អ្វី​ដែល​លោក​ហៅថា​«​ក្រុមបងធំ​ប្រដាប់​​អាវុធ​»​របស់​ប្រធានាធិបតី នី​កូឡាស ម៉ា​ឌូ​រ៉ូ និង​គាំទ្រ​រដ្ឋធម្មនុញ្ញ​ព្រមទាំង​នីតិរដ្ឋ​របស់វេ​ណេ​ស៊ុយអេ​ឡា ។​

​លោក​រដ្ឋមន្ត្រី​បាន​និយាយថា​«​ឥឡូវ​វា​ដល់ពេល​ចាត់ការ​ដើម្បី​គាំទ្រ​លទ្ធិប្រជាធិបតេយ្យ និង​ឆ្លើយតប​ចំពោះ​តំរូវការ​របស់​ប្រជាជន​វេ​ណេ​ស៊ុយអេ​ឡា​ដែល​ត្រូវការ​ជា​ចាំបាច់​»​។​លោក​​ក៏​បាន​ធ្វើ​ការព្រមាន​ជា​ថ្មី​ពី​រដ្ឋាភិបាល​អាមេរិក​ថា អ្នក​ដែល​ជំទាស់​នឹង​ការស្តារ​លទ្ធិប្រជាធិបតេយ្យ​ដោយ​សន្តិវិធី នឹង​ទទួលខុសត្រូវ​។​

​ការអំពាវនាវ​របស់​ផ​ម​ផេវ បាន​កើត​ឡើង​បន្ទាប់ពី​កងកម្លាំង​សន្តិសុខ​វេ​ណេ​ស៊ុយអេ​ឡា បាញ់​ឧស្ម័ន​ហៀរ​ទឹកភ្នែក​លើ​អ្នក​ប្រឆាំង​តវ៉ា​ដែល​ព្យាយាម​នាំ​ជំនួយ​ចូលមក​ពី​ខាង​កូឡុំប៊ី​​និង​ប្រេ​ស៊ីល​។​មនុស្ស​២​នាក់​ត្រូវបាន​សម្លាប់​និង​៣០០​នាក់​រងរបួស​។​

​ក្នុងពេល​ជាមួយគ្នា មេដឹកនាំ​ប្រឆាំង​លោក​ហ្ស័ន ក្វាយ​ដូ និយាយថា​លោក​នឹង​ស្នើ​សុំ​សហគមន៍​អន្តរជាតិ​រក្សា​«​រាល់​ជំរើស​ទាំងអស់​»​ដើម្បី​បណ្តេញ​ប្រធានាធិបតី​នី​កូឡាស ម៉ា​ឌូ​រ៉ូ ​ចេញ​ពី​អំណាច​។​

​លោក​ក្វាយ​ដូ បានប្រកាស​ខ្លួនឯង​ជា​ប្រធានាធិបតី​បណ្តោះអាសន្ន និង​មាន​ការទទួលស្គាល់​ពី​អាមេរិក​រួម​ទាំង​ប្រទេស​ប្រមាណ​៥០​។​លោក​បាន​និយាយថា​លោក​នឹង​ជួបប្រជុំ​​ជាមួយ​អនុ​ប្រធានាធិបតី​អាមេរិក និង​អ្នកការទូត​តំបន់​នៅ​ក្នុង​កិច្ចប្រជុំ​របស់​ក្រុម​Lima Group​នៅ​ថ្ងៃ​ចន្ទ​ទី​២៥​កុម្ភៈ​៕​ដោយ​៖​វាសនា​