អាមេរិក​និង​កូរ៉េខាងត្បូង​ចាប់ផ្តើម​សមយុទ្ធ​ប្រចាំឆ្នាំ ក្រោយ​ពន្យារពេល​មួយខែ​

493

​កូរ៉េខាងត្បូង​និង​សហរដ្ឋអាមេរិក​កាលពី​ថ្ងៃអាទិត្យ​បានចាប់ផ្តើម​លំ​ហាត់​យោធា​រួមគ្នា​ប្រចាំឆ្នាំ​របស់គេ បន្ទាប់ពី​បាន​ពន្យារពេល​ប្រហែល​​មួយខែ​ដោយសារ​ការប្រកួត​កីឡា​អូឡាំពិក​រដូវរងារ និង​ដើម្បី​ជួយ​បង្កើត​លក្ខខណ្ឌ​សំរាប់​ការបន្ត​កិច្ចពិភាក្សា​រវាង​កូរ៉េ​ទាំងពីរ​។​

​សមយុទ្ធ​លើ​ទីលាន​Foal Eagle ដែល​តែង​ចូលរួម​ដោយ​កងទ័ពជើងគោក អាកាស ជើង​ទឹក​និង​ទាហាន​ប្រតិបត្តិការ​ពិសេស នឹងត្រូវ​​ធ្វើ​រយៈពេល​មួយខែ​។​ចំណែក​សមយុទ្ធ​ប្រើ​កុំព្យូទ័រ​ប្រយុទ្ធ​Key Resolve នឹងត្រូវ​រៀបចំ​ធ្វើ​រយៈពេល​កន្លះ​ខែ​នៅ​ពាក់​កណ្តាលខែ​នេះ​។​

​អ្នកនាំពាក្យ​មន្ទីរ​បញ្ច​កោណ បាន​និយាយ​កាលពី​ខែ​មុន​ថា សមយុទ្ធ​ទាំងពីរ​មានការ​ចូលរួម​ពី​ទាហាន​អាមេរិក​ប្រមាណ​២៣.៧០០​នាក់​​និង​ទាហាន​កូរ៉េខាងត្បូង​៣០០.០០០​នាក់​។​

​កូរ៉េខាងជើង​ដែល​តែងតែ​ចោទប្រកាន់​កូរ៉េខាងត្បូង​និង​អាមេរិក​ថា​សម​ហាត់​សម្រាប់​ចូល​ឈ្លានពាន​ខ្លួន​នោះ ពេលនេះ​នៅ​ស្ងៀមស្ងាត់​​លើ​បញ្ហា​នេះ​។​

​សមយុទ្ធ​ត្រូវបាន​ធ្វើឡើង​នៅមុន​ជំនួប​កំពូល​ថ្ងៃ​២៧​មេសា រវាង​មេដឹកនាំ​កូរ៉េ​ទាំងពីរ​និង​កិច្ចប្រជុំ​រវាង​មេដឹកនាំ​កូរ៉េខាងជើង​និង​ប្រ​ធានា​​ធិបតី​អាមេរិក​នៅ​ខែ​បន្ទាប់​អំពី​ការធ្វើអោយ​ឧបទ្វីប​កូរ៉េ​គ្មាន​សព្វាវុធ​នុយក្លេអ៊ែរ និង​ការធ្វើអោយ​ល្អប្រសើរ​ឡើង​នូវ​ទំនាក់ទំនង​រវាង​​កូរ៉េ​ទាំងពីរ​៕​ដោយ​៖​វាសនា​

​សមយុទ្ធ​ត្រូវបាន​ពន្យារពេល​មួយខែ ដោយសារ​ការប្រកួត​កីឡា​អូឡាំពិក​នៅ​កូរ៉េខាងត្បូង តែ​បានចាប់ផ្តើម​នៅ​ថ្ងៃអាទិត្យ​ទី​១​មេសា​